Hjólað í Toskana & Cinque Terre

Nú höldum við af stað áleiðis til bæjarins Lucca. Leið okkar liggur upp eftir einum hinna fornu vega sem lágu til Rómar. Við komum að sögulegu þorpi, Pietrasanta, en hér er tilvalið að líta á San Martino dómkirkjuna frá 14. öld. Höldum því næst áfram hluta hins forna pílagrímsvegar, Via Francigena, til Lucca sem er gömul virkisborg og var á 13. og 14. öld ein af valdamestu borgum Evrópu. Við munum hjóla eftir virkisveggjunum frá miðri 17. öld og njóta stórkostlegs útsýnis yfir borgina ásamt því að fara í stutta skoðunarferð fótgangandi um hana. Ekið verður til baka á hótelið í rútu. 

• Vegalengd: u.þ.b. 50 km
• Hækkun: u.þ.b. 480 m
• Erfiðleikastig: létt til miðlungserfið 

Þennan dag hjólum við af stað eftir Versilíaströndinni til Luni sem nú er þorp en var eitt sinn kunn hafnarborg. Luni er þekkt fyrir fornar rústir rómversks hringleikahúss. Þaðan er svo farið í annan heillandi, gamlan bæ, Sarzana. Hér skoðum við okkur um, röltum eftir notalegum, litlum strætum og kíkjum svo á kastala umluktan varnarveggjum sem hafa varðveist ótrúlega vel. Ekið verður til baka á hótelið í rútu. 

• Vegalengd: u.þ.b. 43 km
• Hækkun: u.þ.b. 200 m
• Erfiðleikastig: létt til miðlungserfið

Þennan dag er tilvalið að láta hugsanlegar harðsperrur líða úr sér og njóta þess sem hótelið hefur upp á að bjóða, slappa af við sundlaugina eða kynna sér nágrennið á eigin vegum. Hjólin eru til staðar ef einhverjir vilja skreppa í hjólaferð á eigin vegum.

Í dag munum við heimsækja Cinque Terre þjóðgarðinn einstaka en hann er á heimsminjaskrá UNESCO sökum einstakra menningarminja. Þorpin eru staðsett í miklu brattlendi og því verður aðeins hjólað á milli tveggja af þorpunum fimm. Við höldum af stað með rútu til bæjarins La Spezia en þaðan hjólum við af stað til Manarola sem tekur á móti okkur með sinni litlu fallegu höfn. Hjólum áfram og njótum útsýnis yfir sjóinn, vínekrur og ilmandi Miðjarðarhafsgróður þangað til við komum að Monterosso, sem er stærsta þorpið og það eina með sandströnd þar sem gott er að slaka á. Eftir að hafa skoðað okkur um góða stund höldum við með lest aftur til La Spezia þar sem rútan bíður okkar og flytur aftur á hótelið.

• Vegalengd: u.þ.b. 33 km
• Hækkun: u.þ.b. 700 m
• Erfiðleikastig: miðlungserfið til krefjandi

Rútan flytur okkur á upphafsreit dagleiðarinnar en nú munum við hjóla í gegnum dásamlegt landslag Toskana héraðsins til fallega bæjarins Bolgheri. Til að komast þangað hjólum við í gegnum hinn þekkta Viale dei Cipressi, eða sýprus veginn, sem afmarkast af fornum en tignarlegum sýprustrjám sem leiða okkur að Bolgheri kastalanum. Frá Bolgheri höldum við áfram eftir vínleiðinni sem er hlaðin vínekrum með girnilegum vínberjum og silfurlituðum ólífutrjám að fallegu bæjunum Bibbona og Casale Marittimo. Lokaspotti dagsins leiðir okkur niður að sjó þar sem við getum notið vel verðskuldaðrar hvíldar á ströndinni. Ekið verður til baka á hótelið í rútu.

• Vegalengd: u.þ.b. 48 km
• Hækkun: u.þ.b. 380 m
• Erfiðleikastig: miðlungserfið

Flogið verður með Icelandair til til Mílanó þann 25. maí. Brottför frá Keflavík kl. 08:20 en mæting í Leifsstöð u.þ.b. 2,5 klst fyrir brottför. Lending í Mílanó kl. 14:30 að staðartíma. Frá flugvellinum í Mílanó á gististað er um 300 km akstur. Á heimleið 1. júní flytur rúta okkur til Mílanó en þaðan verður flogið kl. 15:30. Lending á Íslandi kl. 17:45 að staðartíma.