Töfrar Andalúsíu

Márar bjuggu í Andalúsíu í 800 ár og settu því mikinn svip á arkitektúr borgarinnar. Við ætlum að kynnast því áhugaverðasta sem þessi merka og yndislega borg hefur upp á að bjóða. Hér er m.a. að finna elstu dómkirkju heims og það er tilkomumikið útsýni yfir borgina úr klukkuturni kirkjunnar, La Giralda. Við skoðum eina fallegustu höll Andalúsíu, Real Alcázar höllina, sem byggð var í márískum stíl á 14. öld. Sevilla er sögusvið frægu óperunnar Carmen og hér á Kristófer Kólumbus að hafa skipulagt sjóferð sína til að finna Ameríku. Það er yndislegt að rölta um litlar, þröngar götur gamla gyðingahverfisins, Santa Cruz, með sínum fjölbreyttu kaffi- og veitingahúsum. Frjáls tími verður til að skoða sig betur um á eigin vegum. Um kvöldið verður farið á líflega flamenco sýningu með dans og söng.

Í dag höldum við í skemmtilega ferð suður á bóginn til Santa Maria en þaðan förum við í ljúfa siglingu á tvíbytnu til gömlu borgarinnar Cádiz sem er elsta borg Vestur-Evrópu en þarna tók byggð fyrst á sig mynd í kringum 1100 f. Kr. Eftir góðan tíma þar verður komið til Jerez sem er þekkt fyrir konunglega reiðskólann sinn og vínframleiðslu, sér í lagi dýrindis sérrí heimamanna. Auðvitað er ekki hægt að fara héðan án þess að sækja einn bóndann heim þar sem við fáum að smakka á mjöð þeirra áður en ekið verður aftur til Sevilla.

Nú verður stefnan tekin á Málaga en á leiðinni þangað verður komið við í litla fjallabænum Ronda sem situr á stórbrotinni klettasyllu. Í Ronda voru háðir miklir bardagar í spænsku borgarastyrjöldinni 1936-1939 og einnig er frægt atriði í skáldsögu Ernest Hemingways, Hverjum klukkan glymur, sagt vera innblásið af raunverulegum atburðum héðan. Við skoðum okkur aðeins um í Ronda, förum að nautaatshringnum og njótum töfrandi útsýnis til nærliggjandi fjalla. Eftir það ætlum við að kynna okkur vínframleiðslu á svæðinu og fá að smakka á afurðum heimamanna ásamt léttum hádegisverði. Við höldum svo áfram för okkar til yndislegu borgarinnar Málaga þar sem gist verður síðustu tvær næturnar.

Daginn byrjum við á skemmtilegri og fróðlegri skoðunarferð um Málaga en þessi borg hefur upp á svo margt að bjóða og skoðum við m.a. rómverska leikhúsið. Hér upplifir maður yndislegar strendur Costa del Sol strandlengjunnar og svo örlítið ofar, uppi í gömlum þröngum götum borgarinnar, taka á móti manni litlir krúttlegir veitingastaðir í bland við góða vínkjallara. Í Málaga fæddist hinn heimsfrægi listamaður Pablo Picasso og myndlistaráhugafólk ætti að heimsækja Picasso safnið. Eins er vert að heimsækja Alcazaba, vígvirkið ofan við borginni, og njóta einstaklega fallegs útsýnis yfir strandlengjuna. Þessum síðasta degi okkar ljúkum við með glæsilegum kveðjukvöldverði í miðbæ Málaga.

Nú er komið að heimferð eftir yndislega daga. Frjáls tími er til að kanna umhverfið og njóta lífsins þar til haldið verður út á flugvöll. Brottför frá Málaga er klukkan 17:40 og lending í Keflavík klukkan 20:30 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.