Soffía Halldórsdóttir er fædd og uppalin í Svarfaðardal. Hún lauk kennaraprófi í einsöng og tónmennt frá Tónlistarskólanum í Reykjavík á árunum 1991-92 og kenndi síðan tónmennt við grunnskóla Reykjavíkur í nokkur ár. Soffía hugðist taka sér frí frá kennslu í eitt ár og fór til Prag, þar sem hún stundaði nám í tékknesku við Karlsháskólann. Dvölin í Prag varð öllu lengri en áætlað var í fyrstu eða samtals ellefu ár, en Soffía flutti aftur heim til Íslands haustið 2009.
 
Í Prag var Soffía yfirkennari í ensku á einkareknum leikskóla, þar sem hún þróaði eigin hugmyndir að kenna börnum tungumál í gegnum tónlist og leiki. Á þessum sama tíma kenndi hún einnig ensku í tungumálaskóla og ýmsum fyrirtækjum, ásamt því að starfa sem sjálfboðaliði við undirbúning að tónleikum í Pragkastala til fjáröflunar fyrir börn eftir flóðin miklu árið 2002. Það sama ár hóf Soffía störf sem fararstjóri, fyrst í Prag en síðan í mörgum borgum og löndum Evrópu, t.d. Kraká og Búdapest, Spáni, Króatíu, Búlgaríu, Tyrklandi, Gran Canaria og Tenerife. Hún hefur einnig tekið á móti nokkrum kórum í Prag og má þar nefna Háskólakórinn og Samkór Svarfdæla. Soffía hefur unnið sem fararstjóri fyrir Bændaferðir síðan árið 2011, bæði með sérhópa og ferðir í almennri sölu.
 
Soffía hefur ferðast mikið, enda er það eitt af áhugamálum hennar og hefur hún komið til tæplega þrjátíu landa. Hún á tvo syni og fjögur barnabörn.