Konunglega Marokkó

Dagurinn er tileinkaður skoðunarferð um borgina Fez, elstu menningarborg Marokkó sem stundum er kölluð konungsborgin. Við förum í miðalda medina hverfið en hér er m.a. mikilvægur Kóran skóli sem kominn er á heimsminjaskrá UNESCO og háskóli frá 9. öld, sem talinn er vera sá elsti í heimi. Sjáum einnig hinn fræga Nejjarine gosbrunn. Lífið í gamla bænum með óteljandi litlum verslunum er hrífandi og þar finnum við líka fjölmörg lítil, áhugaverð verkstæði þar sem handverksmenn vinna enn eftir forn austurlenskum aðferðum. Hér er mögulega hægt að sjá trésmiði, málara, fatahönnuði og koparsmiði að ógleymdri leðurvinnslu.

• Morgun- og kvöldverður

Nú kveðjum við Fez eftir góða daga og höldum til bæjarins Ifrane sem liggur í Mið-Atlasfjöllum Marokkó. Hann er þekktur fyrir byggingarlist í alpastíl og nærliggjandi skíðabrekkur og skóga. Við stoppum því næst í bænum Midelt og snæðum þar hádegisverð áður en ekið verður áfram til litla bæjarins Merzouga þar sem við gistum næstu tvær nætur.

• Morgun-, hádegis- og kvöldverður
• Akstursvegalengd u.þ.b: 465 km

Spennandi dagur framundan en nú förum við í skoðunarferð á jeppum að Merzouga sandöldunum þar sem við kynnumst töfrum sandsins við rætur Sahara eyðimerkurinnar. Seinnipartinn getur fólk skoðað sig um á eigin vegum en um kvöldið er hægt að bóka ferð á úlföldum þar sem við upplifum frið og tímaleysi og njótum þess að fylgjast með sólsetrinu.

• Morgun-, hádegis- og kvöldverður

Eftir morgunverð er stefnan tekin á borgina Ouarzazate sem liggur suður af Há-Atlasfjöllunum. Á leiðinni sjáum við stórkostlegt landslag Todra gljúfursins sem varð til þegar áin Todra skar sig öldum saman í gegnum kalksteininn. Gilið lítur næstum því forsögulega út með allt að 400 m háum gljúfurveggjum. Einnig verður áð í borginni Kelaa M‘gouna sem stundum er kölluð Rósardalurinn en árlega er þar haldinn sérstök rósahátíð. Ouarzazate tekur svo á móti okkur en við dveljum þar í eina nótt.

• Morgun-, hádegis- og kvöldverður
• Akstursvegalengd u.þ.b: 400 km

Í dag förum við í skoðunarferð um Ouarzazate og heimsækjum Taourirt Kasbah virkið sem er að mestu leyti gert úr þjöppuðum jarðvegi og moldarmúrsteinum og er meðal glæsilegustu og best varðveittu bygginga sinnar tegundar. Förum einnig að Ait Benhaddou en báðir þessir staðir eru á heimsminjaskrá UNESCO. Eftir hádegisverð er ferðinni haldið til Marrakech í gegnum Há-Atlasfjöllin og Tizi-n-Tichka fjallskarðið sem er í 2260 m hæð og býður okkur upp á frábært útsýni. Komum til Marrakech þar sem við gistum í þrjár nætur.

• Morgun-, hádegis- og kvöldverður
• Akstursvegalengd u.þ.b: 195 km

Hvergi í Marokkó eru eins mikil áhrif frá afrískri og austurlenskri menningu og í Marrakech. Þessi næst elsta keisaraborg landsins er litrík, heillandi og iðar af mannlífi. Um 100.000 pálmatré umlykja virkisveggi borgarinnar og setja fagran svip á umhverfið. Marrakech byggðist upp í eyðimörk, eins og sést á rauðleitum leirhúsunum, og var stofnuð á 11. öld. Merkasti listaarfur hennar er spænsk-máríski arkitektúrinn. Dagurinn verður viðburðaríkur en við förum á Dar si Said safnið sem upprunalega var höll, sjáum Koutoubia moskuna, eitt af meistaraverkum márísks arkitektúrs, og Bahia höllina. Seinnipart dags röltum við um hlykkjóttar götur borgarinnar og lítum við á Djemaâ El Fna markaðinum. Hann iðar af mannlífi, tónlistarmenn spila og slöngutemjarar og eldgleypar sýna listir sínar.

• Morgun- og kvöldverður

Nú er komið að því að slaka á eftir annasama daga og njóta þess að skoða Marrakech á eigin vegum. Það er gaman að rölta um borgina og einnig er hægt að slaka á og nýta sér aðstöðuna á hótelinu en þar er m.a. heilsulind og útisundlaug þar sem gott er að hvíla lúin bein.

• Morgun- og kvöldverður

Eftir yndislega daga verður nú ekið til Casablanca. Nafn borgarinnar kemur úr spænsku og þýðir „hvíta húsið“. Borgin er ein helsta viðskipta- og iðnaðarborg Marokkó og þar er stærsta höfn Norður-Afríku. Við skoðum okkur um í þessari glæsilegu borg en hér má meðal annars sjá Mohamed V torgið, sem skilur á milli gamla og nýja hluta borgarinnar, og Hassan II moskuna sem er ein af stærstu moskum í heimi en þar geta 105.000 manns komið saman. Röltum að lokum meðfram Aïn Diab ströndinni þar sem finna má fjölmarga veitingastaði og upplagt er að fá sér hádegisverð áður en ferðinni verður haldið áfram til Rabat, höfuðborgar Marokkó. Gist í eina nótt í Rabat.

• Morgun- og kvöldverður

Höfuðborgin Rabat er hrífandi borg og við förum í skoðunarferð um borgina en við elsta hluta hennar eru ævintýralegir virkisveggir. Við sjáum m.a. konungshöllina að utan, Kasbah of the Udayas virkið og hálfbyggðan Hassan turninn. Einnig förum við að Mohamed V Mausoleum minnismerkinu þar sem finna má grafhýsi marokkóskra konunga en hönnun minnismerkisins er gott dæmi um hefðbundna marokkóska list. Að skoðunarferð lokinni höldum til Tangier þar sem við gistum í eina nótt.

• Morgun- og kvöldverður
• Akstursvegalengd u.þ.b: 250 km

Við kveðjum nú Marokkó eftir yndislega daga og ógleymanlega upplifun. Siglum frá höfninni í Tangier yfir til Algeciras á Spáni og ökum þaðan áfram til Malaga. Við gistum í tvær nætur á hóteli í miðbæ Malaga þar sem hægt er að njóta stórkostlegs útsýnis yfir alla borgina frá þaksvæði hótelsins.

• Morgun- og kvöldverður

Eftir morgunverð verður farið í skemmtilega skoðunarferð um hina líflegu Malaga sem er borg bæði listamanna og sjómanna. Við skoðum meðal annars þekktasta aðdráttarafl Malaga, Alcazaba virkið, en bygging þess hófst á 12. öldinni og er þetta einn best varðveitti sögulegi minnisvarði Spánar. Einnig munum við skoða dómkirkjuna í Malaga en barokk-endurreisnararkitektúr hennar hrífur flesta. Eftir skoðunarferð verður tími til að slaka á, skoða sig um á eigin vegum og fá sér hressingu. Kvöldverður á eigin vegum.

• Morgunverður

Nú er komið að því að halda heim á leið en brottför frá flugvellinum í Malaga er kl. 17:40 og lending í Keflavík kl. 20:30 að staðartíma. 

Fararstjóri getur fært dagskrárliði á milli daga eftir þörfum þegar komið er á staðinn.

• Morgunverður