Konungsríkið Jórdanía

Jórdanía, stundum kölluð diplómatinn í Miðausturlöndum, hefur skapað sér sérstöðu sem ferðamannaland og það ekki að ástæðulausu. Ferðin okkar er fjölbreytt því við kynnumst menningu og listum Miðausturlanda, upplifum stórbrotna og margbreytilega náttúru og fáum að sjá og upplifa hvað tíminn er afstæður þegar heimsótt verða sögusvið heimsfrægra fornminja. Flogið verður til Amman og þar hefst ævintýri okkar. Við heimsækjum Wadi Rum í undurfagri rauðsteins eyðimörkinni sem margir kannast við úr kvikmyndinni um Arabíu Lawrence. Eins höldum við til Aqaba þar sem við eigum góðan dag við Rauðahafið og getum jafnvel snorklað eða synt í kóralrifunum. Við förum að sjálfsögðu til fornu klettaborgarinnar Petru sem er ein helsta þjóðargersemi Jórdaníu og ein af sjö nýju undrum veraldar. Petra er arfleið Nabateans þjóðflokksins sem komu sér fyrir í Jórdaníu fyrir meira en 2000 árum síðan og voru á sínum tíma dáðir fyrir fágaða menningu og glæsilegan arkitektúr. Í ferðinni förum við fram hjá Dana, stærsta friðlandi Jórdaníu, þar sem meðal annars má finna plöntur og dýrategundir frá þremur heimsálfum. Sumir segja að ekkert jafnist á við störnubjartan næturhimininn á þessu svæði. Við förum niður undurfagra hlykkjótta vegi að lægsta punkti jarðar og heimsækjum Dauðahafið, dveljum þar um stund og leyfum okkur að fljóta í söltu vatninu. Miðausturlönd eru þekkt fyrir mósaíklist og í borginni Madaba verður hægt að sjá best varðveitta mósaíklistaverk sem fundist hefur. Rétt fyrir utan borgina er Nebo fjall, staðurinn þar sem Móses stóð og horfði yfir landið helga. Þar má einnig finna úrval fallegra mósaíklistaverka. Á leið okkar um fornar slóðir krossfaranna verður Shobak kastalinn og við förum ekki frá Jórdaníu án þess að skoða Jerash sem er með stærstu og best varðveittu rómönsku borgum í heimi. Þetta verður menningar-, ævintýra- og landkönnunarferð, þar sem við gefum okkur tíma til að staldra við, næra skynfæri og njóta ilms, birtu og gestrisni þeirra sem landið búa.

Verð á mann 439.900 kr.

Aukagjald fyrir einbýli 87.700 kr.


Innifalið

  • Áætlunarflug með British Airways: Keflavík – London Heathrow – Amman – London.
  • Áætlunarflug með Icelandair: London Heathrow – Keflavík.
  • Flugvallaskattar fyrir alla ferðina.
  • Allar rútuferðir samkvæmt ferðalýsingu í loftkældri rútu.
  • Skoðunarferðir og aðgangseyrir samkvæmt ferðalýsingu.
  • Gisting í 9 nætur í tveggja manna herbergi á 4* og 5* hótelum, samkvæmt landsmælikvarða.
  • Gisting í lúxus Bedúínatjaldbúðum í Wadi Rum.
  • Sjá í ferðalýsingu hvaða máltíðir eru innifaldar.
  • (M = morgunverður, H = hádegisverður, K = kvöldverður).
  • 4 tíma 4x4 jeppa safarí í eyðimörkinni.
  • Staðarleiðsögn.
  • Íslensk fararstjórn.
  • Undirbúningsfundur með fararstjóra fyrir ferð.

Ekki innifalið

  • Þjórfé fyrir erlenda staðarleiðsögumenn og rútubílstjóra.
  • Aðrar máltíðir en þær sem taldar eru upp í ferðalýsingu.
  • Forfalla- og ferðatryggingar.

Valfrjálst

  • Úlfaldaferð við sólarlag í Wadi Rum ca $ 35 á mann.
  • Tyrkneskt bað í Petra ca $ 35 á mann.

Kort af ferðinni

FerðalýsingPrenta ferðalýsingu

8. október | Flug til London & Amman

Brottför frá Keflavík kl. 10:50. Mæting í Leifsstöð í síðasta lagi 2 klst. fyrir brottför. Lending í London kl. 14:45 að staðartíma. Fljúgum áfram til Amman kl. 16:05. Áætlaður lendingartími kl. 23:20 að staðartíma (+3 klst.). Ekið rakleiðis á hótelið okkar þar sem við gistum í nótt.

9. október | Amman – Aqaba

Eftir morgunverð förum við með rútu til Aqaba og upplifum umhverfið við Rauðahafið. Slökum á og njótum sólarinnar, hitans og sjávargolunnar. Hér gefst okkur tækifæri til að synda í sjónum á meðal kóralrifjanna eða jafnvel snorkla. Aqaba ber með sér afslappað andrúmsloft smábæjar en íbúar telja þó um 80.000. Snæðum kvöldverð á hótelinu og gistum hér 1 nótt.

  • Morgunverður
  • Kvöldverður

10. október | Wadi Aqaba – Wadi Rum

Við nýtum fyrri hluta dags við ströndina í Aqaba en seinni partinn ferðumst við í norður til Wadi Rum eyðimerkurinnar sem er skráð á heimsminjaskrá UNESCO. Wadi Rum er allt sem búist er við af dæmigerðri eyðimörk, gífurlegur hiti á sumrin og kalt á veturna. Hér snæðum við kvöldverð undir stjörnuhimni og dveljum eina nótt í tjaldbúðum sem er einstök upplifun.

  • Morgunverður
  • Hádegisverður
  • Kvöldverður
Opna allt

11. október | Wadi Rum – Litla Petra – Petra

Eftir morgunverð verður farið í fjögurra klukkustunda jeppaferð þar sem helstu hápunktar svæðisins verða skoðaðir. Við förum að uppsprettulind Arabíu Lawrence en hún myndar laufskrýdda paradís í miðri eyðimörkinni sem nú er eitt af mikilvægum vatnsbólum fyrir úlfaldalestir sem ferðast á milli Sýrlands og Arabíuskagans. Einnig sjáum við hús Lawrence eða það sem eftir er af því, byggt á rústum brunns Nabatea. Nærri húsinu er að finna merkilegar áletranir Nabatea en þetta afskekkta svæði og óhindrað útsýnið á rósrauðar sandöldurnar og klettamyndanir er kyngimagnað. Eftir hádegisverð förum við norðar til Siq Al Barid sem í daglegu tali er kölluð litla Petra. Spennandi svæði sem gaman er að skoða en hér er að finna elstu byggðir í heimi, þ.á m. Al Beidha.

  • Morgunverður
  • Kvöldverður

12. október | Petra

Hin forna borg Petra, sem liggur hálffalin djúpt í inni í klettagljúfri í vindblásnu landslagi í Suður-Jórdaníu, er einn merkasti og dýrmætasti staður sem skráður er á heimsminjaskrá UNESCO og er eitt af sjö nýju undrum veraldar. Petra er arfleifð Nabateanna, iðins þjóðflokks sem settist að á þessu svæði fyrir meira en 2000 árum síðan. Ávallt var dáðst að Nabateum fyrir fágaða menningu, tilkomumikinn arkitektúr og margslungið hugvit þegar kom að hönnun og byggingu stíflna og skurða. Við tökum daginn í að kanna þennan stórkostlega stað, ganga í gegnum hlykkjótt klettagöng til frægustu byggingar Petru, Al Khazneh eða Treasury eins og hún er kölluð á ensku, en hún er á ótrúlegan hátt meitluð í klettaveggi líkt og rómverska leikhúsið og aðrar byggingar og helgistaðir Nabateanna. Fyrir þá sem vilja er hægt að ganga upp að klaustrinu. Hér fáum við hádegisverðarpakka áður en haldið verður aftur til baka til Petru þegar liðið er á daginn. Um kvöldið verður kvöldverður snæddur hjá heimamönnum sem er einstök upplifun.

  • Morgunverður
  • Hádegisverður
  • Kvöldverður

13. október | Petra – Dana - Dauðahafið

Eftir morgunverð förum við að náttúruverndarsvæði Dana sem er einn falinna fjársjóða Jórdaníu, 15. aldar sandsteinsþorp í hlíðum ofan við þjóðveg konunganna og er útsýnið þaðan yfir dalinn einstakt. Yndislegur staður og ætlum við að ganga um þorpið og njóta notalegs andrúmslofts og fallegs umhverfis. Eftir það höldum við að lægsta punkti jarðar, 431 m undir sjávarmáli, Dauðahafinu. Hér ætlum við að slaka á og hægt verður að fá sér sundsprett eða öllu heldur láta sig fljóta. Dauðahafið hefur löngum verið þekkt fyrir græðandi áhrif á húðina en það er ríkt af bæði salti og steinefnum. Við fylgjumst með sólsetrinu yfir á Vesturbakkanum hinum megin við vatnið og sjáum jafnvel ljósin í Jerúsalem og fleiri borgum Vesturbakkans í fjarska! Gistum 1 nótt á svæðinu.

  • Morgunverður
  • Kvöldverður

14. október | Dauðahafið – Nebo fjall – Madaba – Amman

Fyrri hluta dags ætlum við að dvelja við Dauðahafið, slaka á, fljóta svolítið meira eða njóta þess sem heilsulind hótelsins hefur upp á að bjóða. Upp úr hádegi ferðumst við upp í fjöllin til Nebo fjalls, minningarstaðar Móses en þaðan er frábært útsýni yfir Dauðahafið. Næst höldum við til Madaba, vingjarnlegs bæjar sem er þekktur fyrir mósaíklist og kirkjur. Fáum okkur hádegisverð á Hikayyet Sitti veitingastaðnum og könnum bæinn. Keyrum
til baka til Amman þar sem við gistum síðustu
3 næturnar.

  • Morgunverður
  • Hádegisverður
  • Kvöldverður

15. október | Amman – Jerash – Ajloun

Eftir morgunverð höldum við í norður til borgarinnar Jerash og skoðum rústir forna hluta hennar. Þessar fornu rústir eru þekktar fyrir hversu óvenju vel varðveittar þær eru. Göngum fram hjá musteri Seifs og Artemisar og einnig skeiðvellinum þar sem kappreiðar fóru fram til forna. Eftir hádegisverð hjá heimamönnum verður farið áfram að Ajloun virkinu, vel varðveittu virki múslíma frá 12. öld.

  • Morgunverður
  • Hádegisverður
  • Kvöldverður

16. október | Amman skoðunarferð

Byrjum daginn á skoðunarferð um borgina. Förum í borgarvirkið Jabal al-Qal'a og musteri Herkúlesar, rómverska leikhúsið og þjóðminjasafnið. Könnum mannlífið og hægt verður að kíkja inn í spennandi verslanir og á markaði. Snæðum hádegisverð á veitingastað eða kaffihúsi sem verður á vegi okkar og njótum þessa síðasta dags okkar í Jórdaníu.

  • Morgunverður
  • Kvöldverður

17. október | Heimferð

Þá er komið að heimferð. Leggjum snemma af stað frá hóteli eftir snemmbúinn morgunverð og förum út á flugvöll. Fljúgum frá Amman til London kl. 08:00 og lendum kl. 11:40 að staðartíma. Fljúgum áfram til Íslands kl. 20:50. Lendum kl. 22:55 að íslenskum tíma.

  • Morgunverður

Myndir úr ferðinni

Fararstjórn

Björk Håkansson

Björk Håkansson er fædd á Íslandi um hásumar árið 1967 og hefur alla sína ævi verið á faraldsfæti, fyrst með foreldrum sínum og síðar á eigin vegum, svo ekki sér fyrir endann á.

Fyrir rúmum þrjátíu árum fór Björk fyrst til Mið-Austurlanda og settist á skólabekk í Amman í Jórdaníu. Þar með voru línurnar lagðar hvað varðar reglulega búsetu, samskipti og samstarf við arabaheiminn.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir