Ljúfir dagar í Napólí & Róm
18. - 27. september 2024 (10 dagar)
Glæsileg ferð til tveggja töfrandi, ítalskra borga. Ferðin hefst með ljúfum dögum í hrífandi borginni Napólí sem er höfuðborg Campania héraðs við Napólíflóa. Gamli hluti Napólí hefur yndislegan sjarma, hann var stofnaður á bronsöld og er á heimsminjaskrá UNESCO. Borgin er sem fyrrum konungsborg rík af glæstum byggingum, fallegum torgum og áhugaverðum söfnum. Héðan verður farið í ævintýralega siglingu til sæbrattrar klettaeyjunnar Caprí þar sem siglt verður í kring um eyjuna og farið með stólalyftu upp á hæsta fjall hennar, Monte Solaro. Dásamlega borgin Róm bíður okkar en á leiðinni þangað er áð í Pompei sem geymir frægustu fornminjar veraldar. Engin borg í heiminum er eins rík af fornminjum og Róm og hér verða margir áhugaverðir staðir skoðaðir, m.a. Kapítólhæðin, Forum Romanum, Palatínhæðin, Pantheon og komið að Colosseum. Við upplifum iðandi mannlíf Rómarbúa hjá Treví brunni sem er frægur fyrir hið ljúfa líf kvikmyndar Fellínís, La dolce vita, sæluna við Spænsku tröppurnar og torgið Piazza Navona. Einnig verður Péturskirkjan og söfn páfa í Vatíkaninu sótt heim og San Callisto katakomburnar skoðaðar. Fáar borgir vekja eins mikla aðdáun og Róm en þar verður góður tími til að upplifa og njóta.