Dulúð Indlands

Í þessari ævintýraferð upplifum við undur Indlands, skoðum tignarlegar hallir, siglum á hinu helga fljóti Ganges og kynnumst broti af menningu þessa fjölmennasta lýðræðisríki heims. Þjóðin á sér langa og merka sögu með dulda og framandi menningararfleifð, sérstaka siði og trúarvenjur. Fjölskrúðugar frásagnir hindúatrúarinnar og búddismans heilla ekki síður en konungshallir og glæsibyggingar hinna fyrrum voldugu mógúla. Ferð okkar hefst í Delí þar sem við skoðum m.a. forsetahöllina, þinghúsið og Indlandshliðið. Í Jaipur ríðum við á fílum upp að Amber Fort kastalanum og skoðum Hawa Mahal eða höll vindanna og njótum andstæðna gamla og nýja tímans. Komum til Agra og skoðum Taj Mahal, eitt þekktasta grafhýsi í heimi og heimsækjum hina fornu, yfirgefnu sandsteinsborg, Fatehpur Sikri. Síðast en ekki síst förum við til einnar elstu borgar heims, Varanasi, borgarinnar eilífu sem er pílagrímaborg og helgasti staður hindú. Ferðinni lýkur í Delí og þar verður Gamla Delí skoðuð og upplifum við m.a. ævintýralegan markað.

Verð á mann 369.900 kr.

Aukagjald fyrir einbýli 67.800 kr.


Innifalið

  • 11 daga ferð.
  • Áætlunarflug með Icelandair: Keflavík - Helsinki - Keflavík.
  • Áætlunarflug með Finnair: Helsinki - Delí - Helsinki.
  • Flugvallaskattar fyrir alla ferðina.
  • Innanlandsflug og rútuferðir samkvæmt ferðalýsingu.
  • Skoðunarferðir og aðgangseyrir samkvæmt ferðalýsingu.
  • Ferð á fílsbaki í Amber Fort.
  • Rickshaw hjólaferð í Delí.
  • Bátsferð á Ganges.
  • Gisting í 10 nætur á 4* og 5* hótelum samkvæmt landsmælikvarða.
  • Sjá í ferðalýsingu hvaða máltíðir eru innifaldar.
  • Staðarleiðsögn.
  • Íslensk fararstjórn.
  • Undirbúningsfundur með fararstjóra fyrir ferð.

Ekki innifalið

  • Vegabréfsáritun.
  • Bólusetningar.
  • Aðrar máltíðir en þær sem nefndar eru undir innifalið.
  • Þjórfé.
  • Forfalla- og ferðatryggingar.

Kort af ferðinni

FerðalýsingPrenta ferðalýsingu

21. mars | Flug til Delí

Flug með Icelandair frá Keflavík til Helsinki kl. 10:25. Mæting í Leifsstöð í síðasta lagi 2 klst. fyrir brottför. Lending í Helsinki kl. 15:55 að staðartíma. Flogið áfram frá Helsinki kl. 20:20 og lent í Delí kl. 06:40 (+1) að staðartíma. 

22. mars | Skoðunarferð um Nýju Delí

Lending í Delí kl. 06:40 (+ 5 ½ klst.) að staðartíma og ekið sem leið liggur á hótel. Fáum okkur góðan morgunverð og hvílum okkur eftir langt ferðalag. Síðdegis verður farið í skoðunarferð um Nýju Delí sem er sá hluti borgarinnar sem árið 1911 varð hin nýja höfuðborg breska heimsveldisins á Indlandi. Við skoðum mikilfenglegar byggingar, þ. á m. Qutab Minar, tæplega 73 m háan steinturn frá lokum 12. aldar, svo og Indlandshliðið sem reist var til minningar um fallna indverska hermenn, forsetahöllina og þinghúsið. Gistum í Delí 1 nótt.

  • Morgunverður
  • Hádegisverður
  • Kvöldverður

23. mars | Agra – Taj Mahal

Eftir góðan morgunverð höldum við með rútu til borgarinnar Agra sem stendur við bakka árinnar Yamuna. Ferðalagið frá Delí tekur um 5 klst. og við njótum þess að vera hér í tvo daga. Eftir komu okkar heimsækjum við Taj Mahal sem er tvímælalaust einn stórkostlegasti minnisvarði veraldar og talin ein fallegasta bygging í heimi, byggð á 17. öld. Mógúllinn Shah Jahan lét reisa þessa frægu byggingu í minningu um persneska eiginkonu sína. Að byggingunni komu alls 20 þúsund handverksmenn og það tók 22 ár að reisa grafhýsið, en efniviðurinn var fluttur frá gervöllu Indlandi og öðrum svæðum Asíu. Taj Mahal er á heimsminjaskrá UNESCO. Gistum 2 nætur í Agra.

  • Morgunverður
  • Hádegisverður
  • Kvöldverður
Opna allt

24. mars | Agra Fort - I'timād-ud-Daulah – Sikandra

Í dag förum við í skoðunarferð um borgina Agra. Við heimsækjum Agra Fort sem er einnig einstaklega mikilfengleg bygging með mikla sögu, en hún var áður miðpunktur ættarveldis mógúlanna. Ekki spillir fyrir einstakt útsýni m.a. yfir til Taj Mahal. Einnig skoðum við grafreitinn I'timād-ud-Daulah sem greyptur er í marmara og stendur á upphækkuðum palli og að lokum Sikandra, úthverfi Agra þar sem er að finna grafreit Akbars hins mikla. Síðdegis gefst frítími til að kíkja á markaði eða í búðir og fylgjast með mannlífinu. 

  • Morgunverður
  • Hádegisverður
  • Kvöldverður

25. mars | Fatehpur Sikri - Jaipur

Hin æsispennandi, sögulega Jaipur, höfuðborg Rajasthan fylkisins, oft þekkt sem bleika borgin, er lokaáfangi dagsins í dag. Byggingar eldri hluta Jaipur eru allar málaðar bleikar og hefur verið haldið í þá hefð síðan Edward VII, prinsinn af Wales, eiginmaður Viktoríu Bretadrottningar sótti borgina heim 1876. Borgin er þekkt sem borg andstæðna þar sem fílar og rafknúin farartæki eru t.a.m. hlið við hlið á umferðarljósum! Jaipur er einnig þekkt fyrir glæsihallir og virki, en borgin var byggð fyrir tæpum 300 árum og er áberandi hversu vel skipulögð hún er. Á leið okkar þangað skoðum við draugaborgina Fatehpur Sikri sem var yfirgefin vegna vatnsskorts eftir aðeins 14 ára búsetu árið 1585. Einnig verður komið við í Galtaji, fornum pílagrímastað sem liggur á milli lágra hóla, mustera, laufskála og lauga með helgu vatni. Umhverfis hann er gróðursælt og gerir staðinn að aðlaðandi áfangastað. Endum daginn á kvöldverði á hótelinu okkar í Jaipur þar sem gist verður í 2 nætur.

  • Morgunverður
  • Hádegisverður
  • Kvöldverður

26. mars | Amber Fort á fílsbaki

Fyrir hádegi heimsækjum við Amber Fort, áður höfuðstað fyrrum konungsfjölskyldunnar í Jaipur. Amber Fort liggur hátt, umkringdur klettum og virkisveggjum og fáum við notið að ferðast á fílsbaki upp tröppurnar að höllinni. Seinni partinn gefst frítími til að kanna litríkan götumarkað.

  • Morgunverður
  • Hádegisverður
  • Kvöldverður

27. mars | Jaipur – Flug til Varanasi

Fyrri hluta dags liggur leið okkar að einu þekktasta kennileiti Jaipur, hinni fögru Hawa Mahal sem á íslensku er oftast nefnd höll vindanna. Seinni part dags fljúgum við til Varanasi. Farið beint á hótel þar sem bíður okkar kvöldverður. Gist í Varanasi næstu 2 nætur.

  • Morgunverður
  • Hádegisverður
  • Kvöldverður

28. mars | Varanasi – Sarnath

Eftir morgunverð er ferðinni heitið í skoðunarferð um Sarnath á slóðir Búdda þar sem hann hélt sína fyrstu prédikun og þar standa rústir munkaklaustra sem byggð voru fyrir 2000 árum. Við skoðum svo hina fögru borg Varanasi, en borgin var miðstöð menntunar og trúarlífs og er enn sótt heim af fjölda pílagríma. Hún liggur við bakka árinnar Ganges og er ein litríkasta og mest heillandi borg í heimi og kemur stöðugt á óvart! Hún er sú borg í heiminum sem búið hefur verið í óslitið frá upphafi og er helgasta borg hindúa. Flestir þeir sem sækja borgina heim eru sammála um að hún búi yfir töfrum og að ganga um götur og svokölluð ghats eða fylgjast með sólarupprás við ána eða úr báti sé ógleymanlegt. Heimsækjum svo Banaras Hindu háskólann sem býr yfir stærsta háskólasvæði í Asíu. Lítum einnig á musterin kennd við Bharat Mata og Durga, Aurangzeb‘s moskuna, heilaga nautið og margt fleira. Að skoðunarferð lokinni gefst tími til að skoða sig um á götumarkaði. Eftir kvöldverð gefst tækifæri til að fylgjast með trúarathöfn hindúa, Deepmala, við bakka árinnar Ganges. Hundruð fljótandi ljósa á ánni sem er einstök upplifun. 

  • Morgunverður
  • Hádegisverður
  • Kvöldverður

29. mars | Bátsferð á Ganges – Flug til Delí – Indversk móttaka

Árla morguns er ferðinni heitið að ánni Ganges þar sem við stígum um borð í báta og siglum meðfram bökkum árinnar. Við sólarupprás upplifum við helga stund þar sem hundruð pílagríma baða sig í helgu vatni árinnar og votta guði sólarinnar virðingu sína. Margir lýsa þessari siglingu sem ferð inn í annan heim. Förum aftur á hótelið og snæðum morgunverð áður en haldið verður í út á flugvöll. Flogið til Delí eftir hádegi. Síðdegis heimsækjum við indverskt heimili og fáum hefðbundnar móttökur að hindúasið, með sveigum og trúarlegri athöfn, Arti. Gæðum okkur á indverskum smáréttum og drykkjum. Konur fá tækifæri til að prófa indverskt sarí og karlarnir konunglega túrbana.

  • Morgunverður
  • Hádegisverður
  • Kvöldverður

30. mars | Gamla Delí – Bahá‘í og Akshardham musterin

Delí er borg þar sem mögulegt er að ferðast um tímann! Frá Nýju Delí með þinghúsbyggingar sínar frá nýlendutímanum til Gömlu Delí og fylgst þar með verkamönnum bera sekki með kryddi og skartgripasala vigta gull á rykföllnum vigtum. Þessi múslímski hluti borgarinnar er gjörólíkur þeim nýrri. Gamla Delí er einnig kölluð Shahjahanabad til heiðurs keisaranum Shah Jahan sem byggði borgina. Við ferðumst um í hjólavögnum (rickshaws eða jinrikisha) og fylgjumst með skarkala þessa hluta borgarinnar, verslunum, ævintýralegum mörkuðum sem selja allt á milli himins og jarðar; skartgripi, brúðarkjóla, bækur, krydd, sætmeti, þurrkaða ávexti, raftæki og allt þar á milli. Seinni part dags gefst frítími til að kanna litríka markaði Delí.

  • Morgunverður
  • Hádegisverður
  • Kvöldverður

31. mars | Delí

Fyrir hádegi heimsækjum við hið fræga og stórglæsilega Lotus musteri bahá‘í trúarinnar. Það er hannað fyrir kyrrláta tilbeiðslu og býður upp á einkennilega ró inni í þessari erilsömu borg. Musterið er í laginu eins og lótusblóm og var skapað til að sameina mismunandi trúarbrögð og er gestum boðið að biðja eða hugleiða samkvæmt eigin trú. Eftir hádegi verður Swaminarayan Akshardham musterið skoðað, en það er einungis byggt úr sandsteini og marmara! Minnisvarði þessi er samblanda mismunandi arkitektúrs úr bleikum steini sem táknar tryggð á eilífu blómi og hreinum hvítum marmara sem táknar algjöran hreinleika og frið.

  • Morgunverður
  • Hádegisverður
  • Kvöldverður

1. apríl | Heimferð um Helsinki

Eftir ævintýralega ferð er komið að heimferð. Haldið út á flugvöll snemma að morgni og flogið til Helsinki kl. 09:45 með Finnair og lent þar kl. 14:45 (-2,5 klst.) að staðartíma. Flogið áfram með Icelandair kl. 15:35 og lent í Keflavík kl. 16:00 (-3 klst.) að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

  • Morgunverður

Myndir úr ferðinni

Fararstjórn

Guðrún Bergmann

Guðrún Bergmann hefur víðtæka reynslu af ferðalögum um framandi menningarheima. Auk sinna eigin ferðalaga vítt og breitt um heiminn hefur Guðrún starfað sem fararstjóri í ferðum Bændaferða frá árinu 2005. Á þeirra vegum hafa leiðir hennar legið til Egyptalands, Perú, Bólivíu, Ástralíu, Nýja-Sjálands, Kína og vesturstrandar Bandaríkjanna, en einnig hefur Guðrún starfað í Tyrklandi og á Tenerife. Innanlands hefur hún starfað sem fararstjóri fyrir sérhópa frá árinu 1999, en um fimm ára skeið rak hún ferðaskrifstofuna Guiding Light Tours og tíu ár Hótel Hellna.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00