Hjólað um perlur Tíról

2. – 9. september 2018 (8 dagar)

Tíról í Austurríki er heill ævintýraheimur út af fyrir sig. Fegurð Alpafjallanna umlykur okkur og náttúran skartar sínu fegursta á þessum árstíma. Bærinn Seefeld hvílir í fögrum fjallasal milli Wetterstein, Mieminger og Karwendelfjallanna og er með þekktustu ferðamannabæjum Tíról. Hér lokka grænir dalir, greniskógar, fjallasel og dásamlegt útsýni af fjallstoppum. Farnar verða skipulagðar hjólaferðir í þessu fríska fjallalofti með fararstjóra og innlendum staðarleiðsögumanni sem í sameiningu munu velja hentugar leiðir hvern dag og fræða okkur um staðhætti á leiðinni. Hjólað verður um dali milli hrífandi fjallstinda, meðfram fallegum vötum og ám. Gist verður allar næturnar á huggulegu hóteli með úrvals heilsulind þar sem boðið er upp á hollt fæði og snarl, en ásamt því eru allir drykkir innifaldir. Þessi ferð er fullkomin til að upplifa hreyfingu og útiveru í stórfallegu umhverfi Alpanna. 

Verð á mann í tvíbýli 199.900 kr.

Aukagjald fyrir einbýli 16.600 kr.


Innifalið

  • 5 daga ferð
  • Flug með Icelandair og flugvallaskattar.
  • Ferðir á milli flugvallarins í München og hótelsins í Seefeld
  • Gisting í tveggja manna herbergi með sturtu/ baði á 4 stjörnu hóteli.
  • Fullt fæði allan tímann á hóteli.
  • Hjólaprógramm í 5 daga.
  • Innlend staðarleiðsögn í hjólaferðum.
  • Íslensk fararstjórn.

Ekki innifalið

  • Leiga á trekking hjóli í 5 daga 18.900 kr.
  • Leiga á rafhjóli í 5 daga 18.900 kr.
  • Aðgangseyrir inn á söfn, í hallir og kirkjur.
  • Kláfar eða stólalyftur upp á fjöll.
  • Hádegisverðir.
  • Þjórfé.

Undirbúningur

Þetta er miðlungserfið hjólaferð sem ætti að henta flestu hjólafólki. Við ráðleggjum gestum okkar að fara í nokkra lengri dagstúra og festa kaup á gelhnakki eða hjólabuxum.  Fararstjóri mun boða farþega sína í stutta hjólaferð eða ferðir hér heima áður en haldið verður erlendis. 

Kort af ferðinni

Ferðalýsing

Prenta ferðalýsingu

Flogið til München

Flogið verður með Icelandair til München þann 2. september. Brottför frá Keflavík kl. 7:20, en mæting í Leifsstöð í síðasta lagi 2 klst fyrir brottför. Lending í München kl. 13:05 að staðartíma. Frá flugvellinum í München er um 2,5 tíma keyrsla til Seefeld. Á brottfarardegi verður farið á flugvöll strax að loknum morgunverði. Brottför flugs kl. 14:05 og lending á Íslandi kl. 16:00.

Tillaga að dagleiðum 3. – 8. september

Ólafur Örn Haraldsson er reyndur hjólamaður og mun hann hafa innlendan staðarleiðsögumann sem er alvanur hjólreiðamaður, sér til stuðnings á hjólaleiðunum. Eftirfarandi eru leiðarlýsingar til viðmiðunar fyrir 5 hjóladaga auk eins hvíldardags. Fararstjóri mun í samráði við staðarleiðsögumann taka endanlegar ákvarðanir um val á dagleiðum eftir aðstæðum og hentugleika hverju sinni. 

Dagleið 1 | Vötnin þrjú

Á þessari léttu hringferð munum við sjá þrjú af fjallavötnum svæðisins, Wildmoossee, Lottensee og Möserersee. Hjólað er meðfram Möserer engjum upp aflíðandi halla í átt til bæjarins Mösern. Möserersee er mjög kyrrlátt vatn á fallegum stað og oft bregður fólk sér þar til sunds á sumrin. Á Wildmoos hásléttunni eru tvö vötn til viðbótar, en Wildmoossee og Lottensee myndast í leysingum á vorin og hverfa svo skyndilega á haustin. Þetta er áhugavert náttúrufyrirbæri þar sem ferlið er óútreiknanlegt. Meðfram þessum vötnum er fjöldi orlofshúsa, enda vinsælt svæði. Mikið af fallegum útsýnisstöðum á leiðinni.

  • Vegalengd: ca. 16,3 km
  • Hæðarmunur: 389 m
  • Tími: ca. 2,5 klst.
Opna allt

Dagleið 2 | Hämmermoos- og Gaistal selin

Þessi ferð er ekki erfið þótt vegalengdin sé með þeim lengri. Hjólað er upp í Gaistal sem er fallegur dalur með ósnerta náttúru og hrífandi landslag. Dalurinn hvílir milli fjallgarðanna Mieminger og Wetterstein, svo fjallasýnin er fögur. Moosalm selið er með huggulega sólarverönd og þar er boðið upp á girnilegar veitingar. Stundum er þar meira að segja leikið á hörpu. Aðeins hærra í dalnum er svo Gaistal selið.

  • Vegalengd: ca. 54 km
  • Hæðarmunur: ca. 400 m
  • Erfiðleikastig: frekar létt

Dagleið 3 | Kasten sel

Fyrsti spölurinn er upp á móti og gegn um skóginn en svo er haldið inn dal. Hjólað verður inn með Isar ánni allt þar til komir er að uppsprettu hennar innst í dalnum, en þar er fjallaselið Kastenalm sem býður upp á góðar veitingar. Þessi staður er vinsæll upphafspunktur af fjallgöngum. Hjólum sömu leið til baka með fjalladýrð á báða vegu.

  • Vegalengd: ca. 32 km
  • Hæðarmunur: ca. 575 m
  • Erfiðleikastig: miðlungserfið

Dagleið 4 | Rosshütte

Rosshütte er heimafjall Seefeld. Það er nokkuð bratt að komast upp og um að gera að nota hjálparmótorinn sér til aðstoðar. Á leið okkar verður Hochegg selið, en við höldum áfram að fjallavatninu Kaltwassersee. Þetta er fallegur staður að heimsækja á sumrin og gaman að ganga kringum vatnið. Þetta er vatnsforðabúr Seefeld. Við komum loks að skíðaskálanum á Rosshütte en þar má njóta veitinga sem og stórkostlegs útsýnis yfir alla hásléttuna sem Seefeld liggur á og fjöllin í kring. Svo látum við okkur renna þægilega aftur niður til Seefeld.

  • Vegalengd: ca. 15,5 km
  • Hækkun: ca. 690 m
  • Erfiðleikastig: miðlungserfið

Dagleið 5 | Mittenwald

Nú förum við í millilandaferð á hjólunum, en Mittenwald er afskaplega skemmtilegur bær rétt hinum megin við þýsku landamærin. Þessi 7.000 manna bær státar af gamaldags myndskreyttum byggingum sem gleðja augað. Einnig er bærinn frægur fyrir framleiðslu á fiðlum og sellóum. Mestan hluta leiðarinnar til Mittenwald fylgjum við ánni Isar við skógarjaðarinn í gegn um hlýlega alpadali.

  • Vegalengd: ca. 32 km
  • Hæðarmunur: ca. 287 m
  • Erfiðleikastig: miðlungserfið

Myndir úr ferðinni

Fararstjórn

Ólafur Örn Haraldsson

Ólafur Örn hefur stundað fjallamennsku hérlendis og erlendis og klifið mörg háfjöll þ.á m. Mont Blanc, Kilimanjaro, Aconcagua hæsta fjall Suður Ameríku og lægri fjöll í Nepal. Einnig var hann í fyrstu skíðaleiðangrum Íslendinga yfir Grænlandsjökul og á Suðurpólinn. Ólafur Örn hefur ferðast um ýmis lönd utan Evrópu s.s. N. og S. Ameríku, nokkur lönd Afríku, Nepal, Buthan, Mijanmar (Burma), Azerbasjan, Kosovo, Síberíu o.fl. 
 
Ólafur Örn hefur verið alþingismaður og þjóðgarðsvörður á Þingvöllum og er nú forseti Ferðafélags Íslands. Hann er kvæntur Sigrúnu Richter og eiga þau þrjá syni, Harald, Örvar og Hauk.

Hótel

Hótel Bergland

Gist verður allar næturnar á 4* hóteli í miðbæ Seefeld, Hótel Bergland. Fullt fæði er innifalið; morgunverðarhlaðborðið er vel úti látið, hádegissnarlið er með tvenns konar súpu, salati og snarli, síðdegis er kökuhlaðborð og á kvöldin er fjögurra rétta máltíð með salatbar og velja má milli 3 eða 4 aðalrétta. Íþróttadrykkir og ávextir eru til reiðu til að taka með sér í hjólatúrinn og allir drykkir (áfengir og óáfengir) frá 11.00 á morgnanna til 22.00 á kvöldin eru innifaldir. Ekki er ætlast til að fólk taki þá drykki með sér upp á herbergi. Notaleg heilsulind er á hótelinu með sundlaug, sauna, eimbaði með salt- og ilmstillingu, innrauðum hitaklefa, köldum kerum og ilmandi jurtagarði. Boðið er upp á ýmsar heilsumeðferðir gegn gjaldi. Heilsubarinn býður svo upp á te, ávaxtasafa og hollustusnarl. Herbergin eru öll með baði/sturtu, hárþurrku, síma, kapalsjónvarpi og öryggishólfi. Gestir fá baðslopp til afnota á meðan á dvölinni stendur. Ókeypis þráðlaust net er á hótelinu.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir