Útivist við Achensee

Achensee vatn liggur í fögrum dal í Austurríki, innrammað af fjallgörðum Karwendel- og Rofanfjalla. Á svæðinu eru meira en 500 km af merktum gönguleiðum og möguleikarnir eru því fjölbreyttir.

Gengið verður um græna dali í hlíðum Karwendelfjallanna sem búa yfir stærsta náttúruverndarsvæði norður Alpafjalla, vesturbakka Achensee vatns sem er með öllu laus við bílaumferð og mun kláfur ferja okkur upp á háslétturnar þar sem gengið verður á engjum og í skógum milli fjallasela, en þar fáum við laun erfiðisins, dásamlegar veitingar úr eigin framleiðslu. Landslagið er hrífandi og útsýnið á fjöllunum stórkostlegt. Innlendur staðarleiðsögumaður í samvinnu við íslenska fararstjórann mun velja hentugar gönguleiðir hvern dag og leiða hópinn í sameiningu um þessa heillandi fjallasali. Gist verður allar næturnar á 4* útivistarhóteli í nágrenni vatnsins. Hágæða matseld og vel búin heilsulind með innilaug og ýmsum tegundum gufubaða auka enn á ánægjulega upplifun í þessari ferð.

Verð á mann í tvíbýli 184.800 kr.

Aukagjald fyrir einbýli 18.200 kr.


Innifalið

  • 8 daga ferð.
  • Flug með Icelandair og flugvallaskattar.
  • Ferðir milli flugvallarins í München og hótelsins í Achenkirch.
  • Gisting í 7 nætur í tveggja manna herbergi með baði
  • Glæsilegt morgunverðarhlaðborð.
  • Fimm rétta kvöldverður með salatbar.
  • Aðgangur að innisundlaug og heilsulind hótelsins.
  • Afnot af baðslopp á meðan á dvöl stendur.
  • Leiga á hjóli og hjálmi í einn dag.
  • Göngudagskrá.
  • Leiðsögn staðarleiðsögumanns í göngu- og hjólaferðum.
  • Íslensk fararstjórn.

Ekki innifalið

  • Aðgangseyrir í söfn, hallir og kirkjur.
  • Kostnaður vegna lestarferða, bátsferða og strætisvagna.
  • Kláfar eða stólalyftur upp á fjöll.
  • Hádegisverðir og annar tilfallandi kostnaður á göngunum.
  • Forfalla- og ferðatryggingar.
  • Þjórfé.

Undirbúningur

Mikilvægt er að þátttakendur séu í ágætis gönguformi, en besti undirbúningurinn fyrir þá sem búa á höfuðborgarsvæðinu er að ganga upp að Steini í Esjunni einu sinni í viku, a.m.k. tvisvar til þrisvar sinnum fyrir ferðina. Þeir sem búa fjær velja sér sitt staðarfjall til að ganga á og sameina þar með undirbúning og útiveru. Sé undirbúningurinn góður og nýttur sem hvatning í hreyfingu áður en farið er í ferðina, bæði að ganga á fjöll sem og hjóla mun ferðin verða leikur einn!

Kort af ferðinni

Ferðalýsing

Prenta ferðalýsingu

Flogið til München

Flogið verður með Icelandair til München þann 18. ágúst. Brottför frá Keflavík kl. 7:20, en mæting í Leifsstöð í síðasta lagi 2 klst. fyrir brottför. Lending í München kl. 13:05 að staðartíma. Frá flugvellinum í München er tæplega 2 tíma akstur til Achensee. Á heimleið 25. ágúst leggjum við af stað út á flugvöll að loknum morgunverði og flogið verður heim kl. 14:05 frá München Lending á Íslandi kl. 16:00 að staðartíma

Tillögur að dagleiðum

Eftirfarandi eru mögulegar leiðir á svæðinu fyrir fjóra göngudaga en í raun verður ekki endanlega ákveðið fyrr en með skömmum fyrirvara nákvæmlega hvaða leiðir verða valdar og fer það eftir veðri og aðstæðum. Þá er einn hjóladagur og einn frídagur í ferðinni, en auðvitað geta þátttakendur hvenær sem er valið að taka daginn rólega á hótelinu og njóta aðstöðunnar.

Dagleið 1 | Meðfram Achensee

Þessi ganga er tilvalin til að kynnasta næsta nágrenni hótelsins og þessu fallega vatni nánar. Gengið er frá hótelinu á grænum engjum og gegn um skógarspildu. Þegar komið er að læk förum við yfir og fylgjum svo læknum upp að fjöllum. Þar mjókkar vegurinn meðfram fjallshlíðinni og verður að einstigi yfir kristaltæru vatninu. Hér er vissara að vera fótviss og slæmt að vera lofthræddur, en dásamleg sýn er yfir vatnið og alla seglbátana frá stígnum. Komið verður að Gaisalm seli sem einungis hægt að nálgast fótgangandi eða frá vatninu. Bakvið selið er áhugaverð gjá þar sem oft má sjá steingeitur stökkva listilega milli stalla. Eftir því sem við nálgumst Pertisau þorpið verður stígurinn breiðari og fjölfarnari. Við skoðum okkur um í Pertisau og svo er val um að fara með bát til baka og ganga í 20-30 mín í viðbót eða taka strætó alla leið.

  • Göngutími: ca 3,5 klst.
  • Hæðarmunur: 260 m
  • Erfiðleikastig: létt, 9,8 km
Opna allt

Dagleið 2 | Kögljoch fjall

Frá verönd hótelsins má sjá meirihluta leiðarinnar. Við göngum gegn um þorpið Achenkirch og síðan á hlykkjóttum skógarhöggsvegi upp hlíðina. Eftir um klukkustundar göngu er komið að Kaiser Max útsýnisstaðnum við lítið vatn. Hér er sannarlega keisaralegt útsýni yfir vatnið og dalinn. Um hálftíma síðar er komið að Kögl seli þar sem ómissandi er að fá sér hressingu, þó ekki væri nema glas af heimagerða snapsinum þeirra. Við höldum áfram upp fjallið og komum að öðru seli, Schönjochalm, þar sem einnig mætti fá sér hádegismat ef maður er ekki búin að því. Á leiðinni niður er gengið á skógarvegum framhjá fóðurstöðvum fyrir villt dýr. Með fjallasýnina allt um kring er gengið um rjóður og skóga uns komið er að litla þorpinu Steinberg. Göngunni lýkur niður í dalnum við upphafspunkt skíðalyftunnar. Þaðan er tekinn strætó aftur á hótelið.

  • Göngutími ca: 4 klst.
  • Hæðarmunur: 660m
  • Erfiðleikastig: létt, 10,4 km

Dagleið 3 | Hringur um Zwölferkopf

Við tökum strætó að upphafspunkti göngunnar í nágrenni Pertisau. Ganga okkar hefst á svokölluðum íhugunarvegi þar sem spakleg máltæki hvetja til skjálfsskoðunar og hugleiðslu. Stígurinn er í aflíðandi halla í skugga trjánna, en síðan er komið á gamlan kerruveg sem fer tvisvar gegn um göng, en þess á milli er fögur sýn yfir dalinn. Yfir skíðaslóð og eftir skógarvegi er loks komið að Bärenbad seli þar sem boðið er upp á dásamlegar veitingar úr hráefni af svæðinu. Aðeins örlítið lengra er útsýnispunktur og þar er það er hreinlega skylda að taka mynd af þessu ógleymanlega útsýni! Svo er gengið aftur niður í dalinn á hlykkjóttum stíg í gegn um skóginn. Þegar niður er komið stendur valið aftur um skip eða strætó heim á hótel.

  • Göngutími ca: 3 klst.
  • Hæðarmunur: 500m
  • Erfiðleikastig: létt

Dagleið 4 | Karwendel útsýnisvegur

Gengið er til norðurs frá hótelinu. Í útjaðri þorpsins er farið upp tröppur þar til komið er upp á hæð í dalnum sem teygir sig inn með vesturhlið dalsins til norðurs. Á göngu okkar um hæðina förum við gegn um skóga, yfir tún og engi. Útsýnið yfir dalinn og á fjallgarðinn á móti gleður augað alla leið. Skemmtileg leið liggur niður að Blaserbach læknum, en þorpið Kalvarienberg er við enda slóðans. Fjöldinn allur af tröppum færir okkur aftur niður á dalbotninn þar sem val er um veitingastaði til að fá sér hressingu. Tilbaka er gengið í hlíðum fjallsins austanmegin í dalnum með útsýni til fjallanna í vestri, uns komið er aftur til Achenkirch. 

  • Göngutími ca: 4 klst.
  • Hæðarmunur: 460 m.
  • Erfiðleikastig: létt, 12,4 km.

Dagleið 5 | Hjóladagur – Achensee vatnið

Á hjólunum komumst við yfir stærra svæði og við nýtum okkur það til að kanna nánar hið dásamlega Achensee vatn og stórkostlegt umhverfi þess. Um vatnið liggur þægilegur hjólavegur á jafnsléttu. Hjólað verður kringum þetta kyrrláta seglum prýdda vatn, allt til Pertisau, en þar endar vegurinn og getum við annað hvort tekið skip yfir vatnið tilbaka, eða snúið aftur sömu leið.

  • Hjólaleið Achenkirch – Pertisau: ca 1,5 tímar önnur leið

Myndir úr ferðinni

Fararstjórn

Anna Sigríður Vernharðsdóttir

Anna Sigríður var ekki há í loftinu þegar hún steig fyrst á skíði en skíðamennska hefur verið áhugamál hennar síðan. Mest hefur hún verið á svigskíðum og fjallaskíðum en undanfarin ár hafa gönguskíðin heillað meir og meir. Þegar ekki viðrar til skíðaiðkunar hleypur hún um borg og bý eða gengur til fjalla. Anna Sigga, eins og hún er alltaf kölluð, hefur áhuga á alls konar útivist og nýtir hvert tækifæri til ævintýra og útivistar. Fjallgöngur, hlaup, sund, hjólreiðar og skíðaganga eru í uppáhaldi.
 
Anna Sigga hefur verið fararstjóri í nokkrum gönguskíðaferðum á vegum Bændaferða.

Hótel

Hotel Achentalerhof

Gist verður allar næturnar á 4* útivistarhótelinu Achentalerhof í þorpinu Achenkirch, 800m frá Achensee vatninu. Hótelið liggur beint að náttúruverndarsvæðinu og er með stórum garði þar sem legubekkir eru til reiðu fyrir gesti. Á kvöldin er fimm rétta kvöldverður með valréttum og morgunverðarhlaðborðið er fjölbreytt með úrval afurða frá lífrænum framleiðendum á svæðinu. Á hótelinu er heilsulind með innisundlaug, sauna, eimbaði, innrauðum klefa, ljósabekkjum og hvíldarherbergi. Boðið er upp á ýmsar heilsumeðferðir gegn gjaldi. Gestir fá afnot af sloppum og inniskóm á meðan á dvöl þeirra stendur. Einnig eru baðhandklæði til reiðu. Á hótelinu er líkamsræktaraðstaða. Hótelið lánar bakpoka, göngustafi, regnslár og drykkjarflöskur að kostnaðarlausu á meðan byrgðir leyfa. Herbergin eru öll með baði/sturtu, hárþurrku, sjónvarpi með erlendum stöðvum, síma og öryggishólfi. Ókeypis þráðlaus nettengin er á hótelinu nema í heilsulind og veitingasölum. Gestir fá fríðindakort við komu sem veitir þeim frían aðgang að almenningssamgöngum og afslátt af þjónustu á svæðinu.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00