Trítlað í Suður-Tíról

Dólómítafjöllin eru mikilfenglegur kalksteinsfjallgarður í norðurhluta Ítalíu eða Suður-Tíról og eru hluti af Alpafjöllunum. Hæsti tindurinn heitir því skemmtilega nafni Marmolada og er 3.343 m. Á milli fjallanna er að finna hugguleg fjallaþorp, græn engi, barrskóga og fjallavötn. Svæðið er einstakt til útivistar, jafnt sumar sem vetur og er hér að finna fjölda dásamlegra gönguleiða. Innlendur leiðsögumaður í samvinnu við íslenska fararstjórann mun fræða okkur um flóru og dýralíf, jarðfræði og sögu þessa heillandi svæðis. Gist verður allar næturnar á hlýlegu 4* hóteli í alpastíl skammt frá miðbæ St. Ulrich. Á hótelinu er heilsulind þar sem gott er að láta líða úr sér eftir góða göngu. Tilgangur ferðarinnar er að njóta útivistar á þessu yndislega fjallasvæði og anda að sér fersku fjallalofti.

Verð á mann í tvíbýli 236.600 kr. 

Aukagjald fyrir einbýli 24.500 kr.

Innifalið

  • 8 daga ferð
  • Flug með Icelandair og flugvallaskattar.
  • Ferðir á milli flugvallarins í München og hótelsins í Suður-Tíról.
  • Gisting í tveggja manna herbergi með baði á 4 stjörnu hóteli.
  • Ríkulegt morgunverðarhlaðborð.
  • Fimm rétta kvöldverður með salatbar.
  • Aðgangur að sundlaug og öllu því sem heilsulindin hefur upp á að bjóða.
  • Göngudagskrá.
  • Frítt í almenningssamgöngur á svæðinu með Mobil Card sérkjarakorti frá hótelinu.
  • Innlend leiðsögn í gönguferðum.
  • Íslensk fararstjórn.

Ekki innifalið

  • Aðgangseyrir inn á söfn, í hallir og kirkjur.
  • Kláfar eða stólalyftur upp á fjöll.
  • Leigubílaakstur.
  • Hádegisverður.
  • Mælt er með að fólk kaupi sér 6 daga kort í kláfana ca € 86.
  • Þjórfé.

Flugið

Flogið verður með Icelandair til München þann 1. september. Brottför frá Keflavík kl. 7:20, en mæting í Leifsstöð í síðasta lagi 2 klst fyrir brottför. Lending í München kl. 13:05 að staðartíma. Frá flugvellinum í München eru um 200 km til Suður-Tíról svo gera má ráð fyrir að rútuferðin taki um 3,5 klst. Á heimleið 8. september leggjum við snemma af stað út á flugvöll en flogið verður heim kl. 14:05 frá München. Lending á Íslandi kl. 16:00 að staðartíma. 

Undirbúningur og gönguferðirnar

Farið verður í skipulagðar gönguferðir með staðarleiðsögumanni, en íslenski fararstjórinn verður að sjálfsögðu með í för. Teknar verða ákvarðanir um leiðirnar með skömmum fyrirvara eftir veðri og öðrum aðstæðum. Hvaða dag sem er geta farþegar valið að fara styttri leiðir á eigin vegum eða hreinlega taka það rólega á hótelinu og njóta þess sem heilsulindin og nágrennið hefur upp á að bjóða.

Mikilvægt er að þátttakendur séu í ágætis gönguformi en besti undirbúningurinn er að ganga reglulega á fjöll. Fyrir þá sem búa á höfuðborgarsvæðinu er gott að fara upp að Steini í Esjunni a.m.k. tvisvar til þrisvar sinnum fyrir ferðina. Ágætis viðmið er að geta gengið upp að Steini Esjunnar á innan við 2 klst. og líða vel eftir gönguna. Þeir sem búa fjær velja sér sitt staðarfjall til að ganga á og sameina þar með undirbúning og útiveru. Því fylgir mikil ánægja að æfa fyrir gönguferð af þessu tagi og farþegar njóta sjálfrar ferðarinnar miklu betur ef þeir æfa og undirbúa sig vel fyrir hana.

Kort af ferðinni

FerðalýsingPrenta ferðalýsingu

Göngusvæðið

Blómleg beitilönd, djúpgrænir furuskógar og tignarlegir tindar Dólómítanna umlykja bæinn St. Ulrich í Suður-Tíról. Svæðið er einkar heillandi en á sama tíma róandi og endurnærandi. Ótal gönguleiðir eru á svæðinu inni á milli fjallanna um óspillta náttúru. Svæðið er ekki aðeins aðlaðandi fyrir náttúruunnendur, heldur einnig þá sem fræðast vilja um menningu og sögu svæðisins. Margar kirkjur og ótal hallir, sem og Wolkenstein kastalarústirnar, eru eitthvað sem gestir í Grödnerdalnum ættu ekki að láta fram hjá sér fara. Í St. Ulrich má finna tréútskurðameistara sem þekktir eru um heim allan fyrir listsköpun sína. 

Tillögur að dagleiðum 1. – 8. september

Hér á eftir eru tekin dæmi um 6 mismunandi dagleiðir sem eru líklegar til að vera á dagskránni þessa viku.

Dagleið 1 | Seiser Alm - Saltria

Tekin verður lest að fjallaenginu Seiser Alm og þaðan gengið á góðum vegi í átt til Hótel Sonne. Hjalandi lækur verður á vegi okkar og þaðan höldum við yfir votlend engi á Gran Paluch. Áfram niður á við eftir grænum beitilöndum allt til Saltria en þar eru nokkrir veitingastaðir og tilvalið að fá sér hressingu. Síðan gengið á skógarvegum í Jender dalnum og á sveitavegum framhjá blómlegum býlum aftur til St. Ulrich. Möguleiki að lengja gönguna og fara aðrar leiðir til baka.

  • Göngutími: ca 3-4 klst.
  • Lækkun: 600 m
  • Erfiðleikastig leiðar: létt
Opna allt

Dagleið 2 | Brogleshütte

Við förum með kláfi upp til Raschötzer Bergstation. Við göngum í hlíðum fjallsins fyrir ofan skógarlínuna, mest yfir grösug engi allt til Brogelshütte sem er einstaklega fallegur staður. Hér hefur verið smalakofi og fjallabeit í mörg hundruð ár. Á þessari göngu er stórkostlegt útsýni yfir Dólómítafjöllin. Við getum valið að fara alla leið til baka með kláfnum eða hálfa leið og ganga svo frá Seceda sem tekur um 1 klst, eða jafnvel fara aukalega yfir Panascharte fjallaskarðið til Seceda en sú 1,5 klst ganga er krefjandi og nokkuð brött.

  • Göngutími: ca 3- 4 klst.
  • Hækkun: lítil, aðeins upp og niður
  • Erfiðleikastig leiðar: létt/miðlungserfitt/erfitt

Dagleið 3 | Regensburger Hütte

Upp með kláfi til Seceda Bergstation 2.453m og gengið þaðan. Á leiðinni höfum við Geislerspitzen tindana nokkurn veginn beint af augum og á vegi okkar verður fjöldi huggulegra alpaselja og sólrík beitilönd. Piera Longia dranginn þykir merkileg sjón og eftir að hafa myndað hann í bak og fyrir höldum við að Plan Ciautier enginu. Þaðan hallar undan fæti til Regensburger Hütte. Á bakaleiðinni getum við valið um mismunandi erfiðar leiðir, allt frá 20 mín göngu að næstu stöð kláfsins eða ganga alla leið til baka sem tekur um 2,5 tíma.

  • Göngutími: ca 3,5 klst.
  • Hækkun: ekki mikil, 400 m niður í móti
  • Erfiðleikastig leiðar: miðlungserfitt

Dagleið 4 | Monte Pana til Langkofelhütte

Nú er það strætó sem flytur okkur til St. Christina en þaðan tökum við stólalyftu á Monte Pana og Mont de Seura. Við göngum yfir Ciaulong heiði en síðan tekur við grýttur spölur á leið til Langkofelhütte. Við snúum aftur til Monte Pana og tökum stólalyftuna niður. Frá St. Christina er aðeins 3,5 km gangur til St. Ulrich en auðvitað er líka hægt að taka strætó.

  • Göngutími: ca 3- 4 klst.
  • Hækkun: ein klst upp í móti, tvær niður í móti
  • Erfiðleikastig leiðar: miðlungserfitt

Dagleið 5 | Col Raiser – Steviahütte þjóðgarður

Haldið verður á upphafsstað dagsins, St. Christina, með strætó og þaðan með hringlestinni til Col Raiser. Við sækjum á brattann til Regensburger Hütte. Þaðan liggur stórbrotin leið með einstakri fjallasýn yfir La-Piza fjallaskarðið að Stevia heiði en svo hallar undan fæti í bili. Frá Stevia seli förum við Sylvester Steig leiðina að Juac seli og loks yfir engin til St. Christina. Til baka með strætó eða gangandi.

  • Göngutími: ca. 5 klst.
  • Hækkun: þó nokkur bratti
  • Erfiðleikastig leiðar: nokkuð erfitt

Dagleið 6 | Sellastock

Við hefjum dagleiðina með strætó til Grödner Joch og göngum upp fjalladalinn Val Setus til Pisciaduseehütte í 2.587 m hæð. Frá Boéhütte fikrum við okkur eftir einstigi á Val-Tita-Kessel og þar er eins gott að vera ekki lofthræddur. Áfram yfir Lastie dalinn. Frá Pordoi skarði getum við valið um að fara áfram upp að Pordoi lestarstöðinni eða ganga niður að Pordoijoch. Hægt er að fara til baka á hótel með lest eða strætó.

  • Göngutími: ca 5,5 klst.
  • Hækkun: nokkuð mikil
  • Erfiðleikastig leiðar: erfitt, einungis fyrir fótvissa

Myndir úr ferðinni

Fararstjórn

Sigrún Valbergsdóttir

Sigrún Valbergsdóttir er fædd í Hafnarfirði og alin upp í Reykjavík. Sem barn dvaldi hún öll sumur í Svarfaðardal en á unglingsárunum rak móðir hennar sumarhótel í Grundarfirði og þar gekk hún um beina á daginn en upp til fjalla þegar kvöldaði. Sigrún hefur verið fararstjóri hjá Bændaferðum í aðventuferðum til Þýskalands og Austurríkis, einnig í Gardavatnsferðum og gönguferðum um Austurríki og Færeyjar. 

Hótel

Alpenhotel Rainell

Hótelið Alpenhotel Rainell er 4* alpahótel í fjölskyldueigu, sem staðsett er skammt frá miðbæ St. Ulrich í Suður-Tíról. Hótelið er með 27 herbergjum sem öll eru með svölum og búin sturtu/baðkari, flatskjá, öryggishólfi, hárþurrku, míníbar og síma. Á hótelinu er hugguleg heilsulind með sundlaug, sauna, gufubaði og nuddpotti, þar sem gott er að slaka á eftir góðan göngudag. Gestir hafa einnig aðgang að sundlaugargarði í 10 mín fjarlægð. Hótelið er staðsett á stórfenglegum stað í Dólómítunum og njóta gestir glæsilegs útsýnis beint úr herbergisgluggum sem og á göngu um svæðið.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir