Útivist á Costa Brava ströndinni

Þennan fyrsta göngudag munum við þræða strandstíga Empordà og kynnast þannig heillandi umhverfi Costa Brava strandarinnar. Haldið verður frá hótelinu okkar í Calella de Palagrugell og gengið yfir á Castell ströndina. Gönguleiðin er hluti af friðlýsta Castell-Cap Roig náttúrusvæðinu en það þekur bæði sjó og land, skógi vaxna strandlengju með litlum, fallegum víkum og viðamikla óspillta strönd.

• Vegalengd: u.þ.b. 8 km
• Göngutími: u.þ.b. 3,5 klst.

Í dag reynum við annan ferðamáta og hjólum fallega leið um best varðveittu miðaldabæi Empordà svæðisins. Þetta eru bæirnir Pals, Palau-Sator, Peratallada og Sant Feliu de Boada. Í þessum litlu þorpum virðist oft sem tíminn standi í stað þar sem þau eru nánast eins og lítil söfn undir berum himni sem bera vott um anda miðalda. Bærinn Pals er dæmigerður fyrir svæðið, heillandi með hellulögðum götum og handverksverslunum. Bærinn, sem hefur haldið miðaldaútliti sínu afar vel, er staðsettur ofan á hæð og byggður utan um virki. Heimsókn til vínbónda og léttur hádegisverður er innifalinn.

Deginum í dag ætlum við að verja í borginni Girona. Farið verður þangað að morgni með rútu og förum við með fararstjóranum okkar í skoðunarferð um gamla miðbæinn sem minnir töluvert á völundargöng þegar gengið er um þröngar götur hans. Ferðumst aftur í tímann og skoðum líklega best varðveitta gyðingahverfi Evrópu, Call. Girona mætti líkja við konfektkassa af söfnum, galleríum og gotneskum kirkjum, þ.á m. dómkirkju heilagrar Maríu af Girona sem er búin lengsta kirkjuskipi í heimi. Hægt verður að kanna borgina á eigin vegum eftir skoðunarferð eða taka þátt í göngu upp á hæðina fyrir ofan borgina áður en haldið verður aftur á hótel.

• Göngutími (valfrjálst): u.þ.b. 2 klst.

Gönguleið dagsins liggur frá Sant Pol ströndinni eftir hluta hinnar sólríku GR-92 gönguleið til Platja d‘Aro strandarinnar. Gengið verður með fram Costa Brava ströndinni og fram hjá nokkrum afar fallegum víkum á borð við S'Agaró og Sa Conca Cove. Á göngunni mun staðarleiðsögumaðurinn okkar fræða um gróður, dýralíf, söguna, hefðirnar og menningu þessa áhugaverða svæðis. Hádegisveður á indælum veitingastað á leiðinni innifalinn.

• Vegalengd: u.þ.b. 9,5 km
• Göngutími: u.þ.b. 4 klst.

Tossa de Mar er áfangastaður dagsins en bærinn er best varðveitti gamli sjávarbærinn á Costa Brava ströndinni. Fjöll, sléttur og sjálft Miðjarðarhafið sameinast um að gera þetta svæði að algjörum gimsteini. Tossa de Mar býr yfir merkum minjum, meðal annars upp í elsta hluta bæjarins, klettabæinn Vila Vella, sem er umkringdur borgarmúrum og turnum frá 14. öld sem voru reistir til að verja íbúana fyrir árásum sjóræningja. Að koma inn í Vila Vella er eins og að ferðast aftur í tímann en enn er búið í nokkrum gömlu húsanna innan virkisveggjanna. Stórfenglegt útsýni er þaðan yfir gjörvalla klettaströnd Tossa. Hádegisverður þar sem boðið verður upp á spænskt tapas og paellu innifalinn.

• Vegalengd: u.þ.b. 8,5 km
• Göngutími: u.þ.b. 3,5 klst.

Göngum frá gullinni Pals ströndinni að ströndinni í Fornells. Hér er einn brattasti hluti strandstíganna en við göngum í gegnum strendurnar Sa Riera, Aiguafreda, Sa Tuna, Fornells og Aiguablava. Í þessum fallegu víkum eru margir hefðbundnir fiskikofar þar sem sjómennirnir hafa í gegnum árin geymt áhöld sín og báta. Við snæðum hádegisverð á veitingastað á Hotel Aiguablava sem er staðsettur við fallegan flóa og umkringdur furutrjám. Þetta er fullkominn staður til að njóta hádegisverðar með útsýni yfir hafið. 

• Vegalengd: u.þ.b. 9,5 km
• Göngutími: u.þ.b. 2,5 klst.

Nú er komið að því að kveðja Costa Brava ströndina en fyrri hluta dags gefst tækifæri á að skoða sig um í nágrenninu á eigin vegum eða njóta þess að slaka á við hótelið. Við snæðum hádegisverð á Hotel Alga og höldum svo seinnipart dagsins á flugvöllinn í Barcelona. Brottför er með flugi kl. 22:10 og er áætluð lending í Keflavík kl. 00:45 að staðartíma.