Portofino & Cinque Terre

26. maí – 2. júní 2018 (8 dagar)

Hér er á ferðinni spennandi gönguferð um tvö af fallegustu göngusvæðunum við Miðjarðarhafið, Portofino skagann og Cinque Terre ströndina. Brattir klettar og höfðar, þaktir ilmandi og litríkum miðjarðarhafsgróðri sem speglar sig í túrkisbláum sjónum. Gangan er farin í byrjun sumars þegar gróðurinn er hvað fallegastur og hafgolan kælir í sólskininu. Helstu bæir Cinque Terre strandarinnar verða skoðaðir, en dvalið í einum þekktasta þeirra, Santa Margherita Ligure á huggulegu hóteli. Portofino skaginn, sem dregur nafn sitt af bænum fræga Portofino, er allur undir náttúruvernd vegna gróðurs og dýralífs og þar er náttúrufegurðin hvað mikilfenglegust. Gengið verður um allan skagann og stoppað í ævintýralega bænum Camogli og við San Fruttuoso víkina.

Seinni hluta ferðarinnar er gengið um Cinque Terre, sem er þjóðgarður á heimsminjaskrá UNESCO vegna einstakra minja um líf fyrr á öldum, sem einkenndist af fiskveiðum og vínrækt. Göngurnar eru við allra hæfi, en gott er að hafa í huga að nokkuð mikið er af tröppum eða þröngum stígum og geta hlutar þeirra verið nokkuð brattir. Einungis er gengið með dagpoka.

Verð á mann í tvíbýli 244.400 kr.

Aukagjald fyrir einbýli 62.900 kr.


Innifalið

  • 8 daga ferð.
  • Flug með Icelandair til Mílanó og flugvallarskattar.
  • Rútuferð frá Mílanó til Santa Margherita og tilbaka út á flugvöll.
  • Gisting í 7 nætur á 4* hóteli í Santa Margherita.
  • 7 morgunverðir.
  • 5 kvöldverðir.
  • Drykkir með kvöldverði (½ flaska vatn & ¼ flaska borðvín).
  • Íslensk fararstjórn.

Ekki innifalið

  • Aðgangur í Cinque Terre þjóðgarðinn ca. € 18.
  • Kostnaður vegna lestarferða, bátsferða og strætisvagna.
  • Hádegisverðir og annar tilfallandi kostnaður á göngunum.
  • 1 kvöldverður.
  • Forfalla- og ferðatryggingar.

Forsendur gönguferðar

Erfiðleikaflokkur: Léttar til miðlungserfiðar gönguferðir.

Mikilvægt er að þátttakendur séu í ágætis gönguformi, en besti undirbúningurinn fyrir þá sem búa á höfuðborgarsvæðinu er að ganga upp að Steini í Esjunni einu sinni í viku, a.m.k. tvisvar til þrisvar sinnum fyrir ferðina. Þeir sem búa fjær velja sér sitt staðarfjall til að ganga á og sameina þar með undirbúning og útiveru. Því fylgir mikil ánægja að æfa fyrir gönguferð af þessu tagi og farþegar njóta sjálfrar ferðarinnar betur ef þeir æfa og undirbúa sig vel fyrir ferðina.

Kort af ferðinni

Ferðalýsing

Prenta ferðalýsingu

26. maí | Flug til Mílanó & Portofino

Brottför frá Keflavík kl. 13:50. Mæting í Leifsstöð í síðasta lagi 2 klst. fyrir brottför. Lending í Mílanó kl. 19:40 að staðartíma. Fararstjórinn tekur á móti hópnum á flugvellinum og er haldið með rútu beinustu leið niður að strönd Miðjarðarhafsins til bæjarins Santa Margherita Ligure sem stendur austan megin í Portofino höfðanum. Athugið að komið verður seint á hótelið. Gist í miðsvæðis í bænum 7 nætur.

27. maí | Gengið frá Santa Margherita til Rapallo

Við byrjum á því að skoða okkur um í bænum Santa Margherita, sem er í senn glæsilegur  og rómantískur, enda hefur hann lengi verið vinsæll af listamönnum. Við skoðum miðbæinn og höldum síðan eftir ströndinni yfir í næsta bæ, Rapallo. Á leiðinni göngum við framhjá glæsivillum og virðum fyrir okkur miðjarðarhafsgróðurinn sem er í blóma, en þegar komið er til Rapallo virðum við fyrir okkur þennan fallega bæ og könnum  strandlengjuna. Hægt er að ganga sömu leið til baka eða taka bátinn til Santa Margherita Ligure. 

  • Göngutími ca. 4 klst.
  • Létt ganga um bæinn og á milli þeirra tveggja.

28. maí | Gengið umhverfis bæinn Portofino & Portofino víkin

Í dag fylgjum við skemmtilegum göngustíg sem liggur utan í höfðanum til nágrannabæjarins Portofino. Leiðin liggur í gegnum bæinn og fyrir ofan hann má sjá garðrækt bæjarbúa, en þar njótum við einstaklega fagurs útsýnis yfir Tigulio-flóann.

Vegurinn tekur okkur niður að Parodi-ströndinni og þaðan áfram eftir hrífandi leið í hina rómuðu Portofino vík. Hér liggja glæsilegar snekkjur alls staðar að úr heiminum við bryggju. Gengið verður upp fyrir bæinn og alla leið fram á fremstu brún skagans þar sem vitinn trónir. Eftir góðan tíma í bænum göngum við meðfram glæsilegri ströndinni á fallegum göngustíg aftur til baka, en einnig verður hægt að fara með bát til baka á hótelið.

  • Göngutími ca. 4 klst & 1 klst ef gengið er tilbaka.
  • Hækkun ca. 200 m.
  • Auðveld ganga.
Opna allt

29. maí | Ruta di Camogli & Portofino

Gangan í dag hefst í fjallaþorpinu Ruta, sem er í 250 m hæð fyrir ofan Camogli. Þangað förum við með strætisvagni. Gengin verður óskaplega falleg leið um skóginn upp í 500 m hæð yfir sjávarmáli, en þaðan er glæsilegt útsýni yfir Camogli, Paradísarflóann og allt til Genova. Við höldum svo áfram yfir höfðann þar til útsýnið opnast í austur yfir Tigulio-flóann. Síðan fer að halla undan fæti og við komum niður á enda skagans þar sem frægi bærinn Portofino liggur við lokaða vík. Farið verður til baka með báti eða strætisvagni. 

  • Göngutími ca. 4,5 klst.
  • Hækkun ca. 250 m.
  • Auðveld ganga.

30. maí | Cinque Terre þorpin

Í dag munum við heimsækja Cinque Terre þorpin einstöku. Eftir stutta lestarferð komum við til bæjarins Monterosso al Mare sem er í Cinque Terre þjóðgarðinum. Garðurinn er sem fyrr segir á heimsminjaskrá UNESCO sökum einstakra menningarminja. Við skoðum okkur þar um góða stund og göngum síðan yfir í þorpið Vernazza eftir göngustíg sem liggur í klettahlíðum um vín- og sítrónuræktarlönd.

Á leið okkar milli næstu þorpa munum við taka lest, þar sem hluti gönguleiðanna er lokaður. Gera má ráð fyrir allt að € 30 aukakostnaði á mann þennan dag í almenningssamgöngur og aðgangseyri í þjóðgarðinn.

Gangan á milli Monterosso og Vernazza er um 250 m upp og sama niður og tekur um 2 tíma. Göngustígarnir er oft á tíðum þröngir og stór hluti þeirra tröppur. Langur dagur.

31. maí | Frjáls dagur í Santa Margherita

Í dag slökum við á og njótum þess sem hótelið og nágrenni þess hefur upp á að bjóða.  Áhugasamir geta farið á ströndina, kíkt í heillandi búðirnar í bænum eða á kaffi- og veitingahús. Hugguleg sólarverönd er við hótelið og sundlaug fyllt með sjó þar sem hægt er að láta gönguþreytu liðinna daga líða úr sér.

1. júní | Camogli, San Rocco & San Fruttuoso víkin

Dagurinn byrjar með stuttri lestarferð yfir í bæinn Camogli sem er staðsettur vestan megin við Portofino skagann. Camogli hefur verið fiskimannabær frá miðöldum og er einn sérstakasti bærinn í Ligúríu. Eftir að hafa skoðað þennan skemmtilega bæ nánar tökum við stefnuna upp á höfðann og eftir um 40 mín. göngu erum við komin upp í bæjarkjarnann San Rocco. Gönguleiðin hér er ótrúlega falleg þar sem hún liggur um verndað svæði með útsýni yfir sjóinn og eftir allri ströndinni. Gengið er um í dæmigerðum miðjarðarhafsgróðri utan í höfðanum með bláan sjóinn í bakgrunni.

Þegar við höldum niður á við birtist San Fruttuoso víkin sem ýmsir telja fallegasta staðinn við allt Miðjarðarhafið. Hér er gamalt klaustur og lítil strönd þar sem yndislegt er að hvíla sig eftir gönguna og kæla sig í sjónum. Héðan er tekinn bátur til baka til Santa Margherita Ligure.

  • Göngutími ca.4 klst.
  • Hækkun ca. 450 m.
  • Góður göngustígur, tröppur upp fyrsta hlutann en síðan í gegnum skóglendi.
  • Lækkun 450 m eftir skógarstíg.

2. júní | Heimferð

Fram að brottför gefst smá tími til að njóta dvalarinnar, kíkja á mannlífið og versla síðustu minjagripina. Möguleiki er fyrir áhugasama að fara í stutta ferð upp í Montallegro kirkjuna fyrir ofan Rapallo, en þangað er hægt að komast með kláfi, strætisvagni eða með því að ganga. Síðdegis ferjar rúta hópinn út á flugvöll í Mílanó, þaðan sem flogið verður heim kl. 20:40. Lent í Keflavík kl. 22:55.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Guðrún Sigurðardóttir

Guðrún Sigurðardóttir er fædd og uppalin í Hlíðunum, Reykjavík. Hún kom fyrst til Ítalíu árið 1980 í framhaldsnám og hefur verið þar að mestu leyti síðan, bjó í næstum 3 áratugi við Como vatn og býr nú til skiptis á Ítalíu og á Íslandi. Hún hefur verið fararstjóri með Íslendinga víðs vegar um Ítalíu og víðar í fjölda ára. Einnig hefur hún unnið sem leiðsögumaður með ítali á Íslandi.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00