Hjólað & siglt um perlur Dónár

26. ágúst – 2. september 2018 (8 dagar)

Hér fer saman einstaklega þægileg hjólaferð í sambland við skemmtisiglingu með fljótaskipi eftir ánni Dóná sem hlykkjast um fjölda landa og á milli spennandi borga. Nýir og spennandi áfangastaðir mæta okkur á hverjum degi án þess að skipta þurfi um gististað. Heimsborgirnar Passau, Bratislava, Búdapest og Vín, munu verða á vegi okkar. Vínekrur, sveitaþorp, kastalar og virki mun bera fyrir augu á yndislegum hjólaleiðum meðfram árbakkanum. Um borð í 4* fljótaskipinu MS Carissima er aðbúnaðurinn eins og á glæsihóteli, notalegar káetur, veitingastaður, útsýnisbar og heilsulind. Siglt verður frá Passau til Búdapest og aftur til baka, en áð á mismunandi stöðum hvora leið. Er skipið leggst að landi, er hjólunum raðað upp á bryggjunni og hjólað verður að næsta áfangastað skipsins, að meðaltali um 40 - 50 km daglega. Leiðirnar eru miðlungserfiðar og rólegur ferðahraði tryggir að farþegar njóti umhverfisins og því sem fyrir augu ber í þessu dásamlega umhverfi.

Verð á mann í tvíbýli á aðal þilfari 238.800 kr.

Ekki er hægt að fá einbýli á aðal þilfari.

Aukagjald fyrir tvíbýli á miðju þilfari 26.900 kr.
Ekki er hægt að fá einbýli á miðju þilfari.

Aukagjald fyrir tvíbýli á efra þilfarii 38.700 kr.
Aukagjald fyrir einbýli á efra þilfari 79.500 kr.

 
Innifalið

  • 8 daga ferð.
  • Flug með Icelandair og flugvallaskattar.
  • Ferðir á milli flugvallarins í München og hafnarinnar í Passau.
  • Móttaka hjá skipstjóranum fyrsta daginn um borð með fordrykk.
  • Gisting í tveggja manna káetu með baði/sturtu á MS Carissima **
  • Herbergisþjónusta og fersk handklæði á hverjum degi.
  • Fullt fæði allan tímann; morgunverðarhlaðborð, hádegisverður eða nestispakki fyrir hjólaferðir, kaffi og kökur síðdegis og kvöldverður með vali um 2 – 3 aðalrétti. Miðnætursnarl.
  • Gala kvöldverður með kveðjukokteil síðasta kvöldið.
  • Skemmtiatriði um borð.
  • Lifandi tónlist um borð öll kvöld.
  • Hjólaprógramm með upplýsingum og kortaefni fyrir hverja káettu.
  • Hverju hjóli fylgir rúmgóð vatnsheld hjólataska, handhæg stýristaska, hjólapumpa og lás.
  • Íslensk fararstjórn.

Ekki innifalið

  • Leiga á 24 gíra trekkinghjóli í 6 daga 11.800 kr.
  • Leiga á rafhjóli í 6 daga 26.600 kr.
  • Aðgangseyrir inn á söfn, í hallir og kirkjur.
  • Þjórfé.

Undirbúningur

Hjólaferð er fyrir alla þá sem haldið geta jafnvægi á hjóli. Gott að hafa vanið sig við að sitja nokkra klukkutíma á hnakknum áður en lagt er í ferð eins og þessa. Ráðlegt væri að festa kaup á gelhnakk eða hjólabuxum með rasspúðum. Farastjóri mun boða þátttakendur í eina stutta eða fleiri hjólferðir hér heima áður en haldið verður utan. Öll hjólin á skipinu koma með rúmgóðri 20 l hliðartösku og tösku á stýrið. Farþegar þurfa að koma með eigin hjálm og hjólafatnað, en slíkt er einnig selt um borð.

Kort af ferðinni

Ferðalýsing

Prenta ferðalýsingu

26. ágúst | Flug til München & ekið til Passau

Flogið verður með Icelandair til München. Brottför frá Keflavík kl. 7:20, en mæting í Leifsstöð í síðasta lagi 2 klst fyrir brottför. Lending í München kl. 13:05 að staðartíma. Frá flugvellinum í München eru um 150 km til Passau svo gera má ráð fyrir að rútuferðin taki um 2 klst. Borgin Passau stendur við ármót Dónár, Inn og Ilz í Bæjaralandi og setja árnar þrjár einstaklega fallegan svip á borgina og eru margir þeirrar skoðunar að bæjarstæðið sé eitt fallegasta í Evrópu. Ef tími vinnst til munum við líta aðeins nánar á Passau áður en farið verður um borð í skipið.

27. ágúst | Frá Engelhartszell til Aschach

Þegar við rumskum af værum svefni hefur skipið lagt að bryggju í Engelhartszell í Austurríki. Nú hefjum við fyrsta hjóladaginn og njótum dýrðarinnar sem fyrir augu ber. Við hjólum yndislega leið eftir árbakkanum um Dónárbugðuna, sem er einn fegursti hluti árinnar. Leið okkar liggur framhjá krúttlegum bóndabýlum og kyrrlátum þorpum, en hér og þar bjóða veitingastaðir við vegkantinn upp á hálfgerjað vín sem kallað er Most eða Sturm og annað góðgæti af svæðinu. Þegar við höfum náð áfangastað í bænum Aschach verður stigið um borð og siglt inn í nóttina.

  • Vegalengd dagsins er um 42 km.

28. ágúst | Virki Devin & Bratislava

Hjólaleið dagsins hefst á mjóum stígum yfir svæði þar sem járntjaldið varnaði leið hér áður. Við hefjum ferðina við Devin virki og hjólum að glæsilegum barrokk garði kastalans Hof sem er einn tilkomumesti lystigarður Evrópu. Áfram er haldið um óspillta náttúru og skömmu seinna komum við inn í ys og þys Bratislava. Áhugasamir geta hér farið í skoðunarferð um borgina.

  • Vegalengd dagsins er um 43 km.
Opna allt

29. ágúst | Búdapest & listamannabærinn Szentendre

Þegar siglt er inn til Búdapest blasir við okkur stórkostleg sýn yfir allar frægustu byggingar borgarinnar. Dóná aðskilur borgarhlutana tvo, hallarhverfið og borgarhlutann, Búda og Pest, en fjöldi voldugra og fallegra brúa tengja þá saman og setja sterkan svip á þessa fallegu borg. Þegar akkerum hefur verið kastað er möguleiki að fara í skoðunarferð um borgina. Frá Búdapest hjólum við meðfram skógum og eyrum á árbakkanum uns við komum að listamannabænum Szentendre. Bærinn á sér meira en 1.000 ára sögu og bera þröng stræti og lítil torg merki um það. Hér er í boði að fara á sýningu heimamanna með hefðbundnum söng og dansi. Í Búdapest verður hægt að njóta kvöldsins þar sem skipið fer ekki frá borginni fyrr en eftir miðnætti.

  • Vegalengd dagsins er um 54 km.

30. ágúst | Dónáhnéð & Esztergom

Á þessu svæði er Dóná umvafin snarbröttum fjöllum og aflíðandi hólum í heillandi umhverfi sem við njótum í hjólaferð dagsins. Við höldum til bæjarins Esztergom þar sem við stígum aftur um borð í fljótaskipið. Bærinn er einn af elstu bæjum Ungverjalands, en basilíkan þar var vígð árið 1869 með flutningi tónverks, sem var sérstaklega samið við þetta tilefni og stjórnað af Franz Liszt.

  • Vegalengd dagsins er 43 km.

31. ágúst | Hjólað um Vínarborg

Í dag förum við í skoðunarferð á reiðhjólunum um þessa virðulegu höfuðborg Austurríkis.  Við hjólum hringveginn, en við hann standa allar helstu byggingar borgarinnar svo sem óperan, ráðhúsið, þinghúsið, lista- og náttúrugripasafnið og háskólinn ásamt fjölda grænna garða og minnismerkja. Meðal annars verður litið inn í Stephansdom dómkirkjuna og  farið að hinu þekkta Hundertwasser húsi. Að skoðunarferðinni lokinni gefst frjáls tími til að fá sér hressingu og kanna borgina á eigin vegum. Áhugasamir geta hjólað eftir Dounau Insel, bíllausri 22 km langri eyju sem liggur mitt í Dóná og er algjör útivistarparadís. Um kvöldið leysir fljótaskipið landfestar og siglir sem leið liggur til Wachau. 

1. september | Konungsleiðin

Síðasta hjólaleið þessarar ferðar er kölluð konungsleiðin. Hjólað er milli notalegra þorpa sem kúra í hæðóttu landslaginu, framhjá fornum virkjum og glæstum höllum. Svæðið er þekkt fyrir ávaxtarækt og þá sérstaklega vínrækt og þekja vínekrurnar hæðirnar í stöllum eins langt og augað eygir. Tilvalið er að staldra við og hvíla lúin bein á einni af þeim fjöldamörgu vínkrám sem standa við veginn og bragða á framleiðslu heimamanna.

  • Vegalengd dagsins er um 37 km.

2. september | Heimferð

Að morgunverði loknum leggst skipið að bryggju í Passau. Við keyrum þá beint á flugvöllinn í München, en flogið verður heim kl. 14:05 og lending á Íslandi áætluð kl. 16:00 að staðartíma.

Myndir úr ferðinni

Fararstjórn

Bjarni Torfi Álfþórsson

Bjarni Torfi Álfþórsson er fæddur 1960, menntaður lögreglumaður, grunnskólakennari og kerfisfræðingur. Hann starfaði í átta ár í umferðardeild lögreglunnar í Reykjavík, þrjú ár sem grunnskólakennari og í 11 ár í hugbúnaðargeiranum. Frá árinu 2011 hefur Bjarni verið framkvæmdastjóri Specialisterne á Íslandi.

Skip

MS Carissima

Fljótaskipið MS Carissima **** er einstaklega glæsilegt skip. Þar er frábær  veitingastaður, setustofa og bar með útsýni til þriggja átta, heilsulind með gufubaði og  nuddpotti ásamt útisundlaug á útsýnisdekki, en þaðan er einstaklega góð sýn á árbakkana beggja megin. Káeturnar eru 14 m2 að stærð og allar hafa þær sérbaðherbergi, hárþurrku, sjónvarp og öryggishólf. Stilla má hitastig í hverri káetu fyrir sig. Greiða þarf fyrir nettengingu um borð, en hafa skal í huga að gæði tengingarinnar fer mjög eftir því hvar skipið er staðsett. 

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir