Trítlað í Ramsau

Landslagið í bænum Ramsau við Dachstein er einstaklega fallegt. Bærinn liggur á Ramsauer hásléttunni í 1000 –1300 m hæð og tignarlegir alpatindar gnæfa yfir til suðurs. Í ferðinni verður boðið upp á fjölbreyttar gönguleiðir sem liggja allar um stórkostlegt landslag, fjöll og dali. Sem dæmi má nefna gönguferðir að stöðuvötnunum Spiegelsee og Duisitzkarsee sem eru sannkallaðir gimsteinar. Einnig göngum við að fallegum fjallaskálum og njótum einstaks útsýnis yfir til að mynda Tauern fjöllin. Dachstein fjöllin bíða okkar og farið verður með kláfi upp á Dachstein jökulinn, þar sem við skoðum íshelli, lítum á ótrúlegar höggmyndir og njótum þaðan stórkostlegs útsýnis. Gist verður á ekta austurrísku 4* alpahóteli sem býr yfir glæsilegri heilsulind. Í þessari ferð fer saman útivist, hreyfing og skemmtilegur félagsskapur í sannkölluðu ævintýralandslagi. 

Verð á mann 219.900 kr.

Aukagjald fyrir einbýli 16.600 kr.


Innifalið

  • 8 daga ferð.
  • Flug með Icelandair og flugvallarskattar.
  • Ferðir á milli flugvallarins í München og hótelsins í Ramsau.
  • Gisting í 2ja manna herbergi með baði.
  • Morgunverðarhlaðborð með heilsuhorni.
  • Vel útilátinn 4 rétta kvöldverður með salatbar.
  • Aðgangur að öllu því sem heilsulindin hefur upp á að bjóða.
  • Baðsloppur og inniskór fyrir dvölina.
  • Frítt internet á hótelinu.
  • Göngudagskrá.
  • Leiðsögn staðarleiðsögumanns í gönguferðum.
  • Sumarkort sem veitir aðgang að kláfum, söfnum, sundlaug, bátsferð og ýmsum fallegum svæðum.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll (aðra en þá sem sumarkortið gildir fyrir).
  • Hádegisverðir.
  • Þjórfé.

Kort af ferðinni

FerðalýsingPrenta ferðalýsingu

Svæðið

Ramsau er snotur 2.800 íbúa bær sem liggur við rætur Dachstein jökulsins. Bærinn stendur á bjartri og sólríkri hásléttu sem er eins og risastór verönd hátt í fjöllunum.
Þetta svæði er mjög snjóöruggt á veturna og er því vinsælt skíðasvæði. Á sumrin býður svæðið einnig upp á einstaka náttúrufegurð og er því afar vinsælt til útivistar. Á Dachstein jöklinum er útsýnispallur með veitingaskála en þangað er hægt að fara upp með kláfi og njóta stórfenglegs útsýnis til allra átta; það sést til Slóveníu til suðurs og Tékklands til norðurs. Fjölbreyttar gönguleiðir og einstakt fjallaútsýni gerir Ramsau við Dachstein að sérlega skemmtilegum stað sem eftirsóknarvert er að heimsækja.

Gönguferðirnar

Farið verður í skipulagðar gönguferðir með staðarleiðsögumanni en íslenski fararstjórinn verður að sjálfsögðu með í för. Teknar verða ákvarðanir um leiðirnar með skömmum fyrirvara eftir veðri og öðrum aðstæðum. Hvaða dag sem er geta þátttakendur valið að fara styttri leiðir á eigin vegum eða taka það rólega á hótelinu og njóta þess sem nágrennið hefur upp á að bjóða. Suma daga er mögulegt að taka þurfi strætó eða fjallakláf frá göngustaðnum. 

Tillögur að dagleiðum

Hér á eftir eru tekin dæmi um 6 mismunandi dagleiðir sem eru líklegar til að vera á dagskránni þessa viku.

Opna allt

Dagleið 1 | Rittisberg hringurinn

Gangan í dag er þægileg byrjun á göngufríinu en genginn verður Rittisberg hringurinn. Við göngum beint frá hótelinu yfir Tannenweg í átt að Rittisberg þar sem við tekur breiður göngustígur sem leiðir okkur meðal annars fram hjá fögrum engjum. Við göngum að 400 ára gamla bóndabýlinu, Halseralm, sem þekkt er fyrir flamberaðar keisarapönnukökur (Kaiserschmarrn) sem mætti kalla þjóðareftirrétt Austurríkis. Við Sonnenalm fáum við notið útsýnisins yfir fjallgarðinn Tauern og höldum því næst niður í móti að Ochsenalm og eftir skógarslóða fram hjá fallegri fiskatjörn aftur að Tannenweg og á hótelið.

  • Göngutími: ca 4 klst.

Dagleið 2 | Reiteralm – Spiegelsee

Dagurinn í dag mun vonandi gefa af sér margar fallegar ljósmyndir en nú förum við á vinsælasta ljósmyndunarsvæði héraðsins. Við tökum rútu frá hótelinu til Reiteralm þar sem gangan okkar hefst. Við göngum fallegan slóða upp fjallið Rippeteck (2126 m) og þaðan að Gasslsee vötnunum en annað þeirra ber nafnið Spigelsee, eða speglavatnið, vegna þess hversu fallega Dachstein fjöllin speglast í vatninu.

  • Göngutími: ca 5 klst.
  • Hækkun ca 400 m

Dagleið 3 | Gengið gegnum fjallaskarð

Í dag tökum við rútu að Dachstein kláfnum þaðan sem við göngum yfir að Südwandhütte (1910 m) og að Pernerweg. Þessi ganga leiðir okkur með fram 300 m bröttum suðurveggjum Dachstein fjallsins. Þá tekur við gangan upp í fjallaskarðið sem eru risastórar dyr frá náttúrunnar hendi í 2033 m hæð og afmarkast af Rauchech og Torstein fjallstindunum. Þarna er áhrifamikið útsýni yfir suðurhluta Dachstein, fjallið Bischofsmütze, Tauern fjöllin og fallega bithaga þar sem gemsur sjást oft og tíðum. Eftir að hafa hvílst og dáðst að útsýninu göngum við í gegnum Schnittlauchboden (sem kennt er við villta, ilmandi graslauka sem þarna vaxa) að Bachlalm þar sem í boði er að fóðra
múrmeldýr. Að lokum göngum við niður skógarveg og förum svo aftur í rútu síðasta spölinn.

  • Göngutími: ca 5 klst.
  • Hækkun ca 660 m

Dagleið 4 | Dachstein & Dachsteiner kláfurinn

Okkar bíður spennandi dagur þegar farið verður upp á Dachsteinfjöllin, sem er vinsælasti ferðamannastaðurinn í Steiermark, enda á heimsminjaskrá UNESCO. Dachsteiner kláfurinn ferjar okkur upp í 2.700 m hæð, þaðan sem fjallasýnin er mögnuð. Fimm útsýnispallar standa til boða og þeirra á meðal er einn með glergólfi. Þeir sem þora að stíga á þann pall munu sjá hvernig klettaveggur Hunerkogelfjallsins er 250 m lóðrétt niður beint undir fótum hans. Við munum einnig virða fyrir okkur víðáttumikinn íshelli en þar hafa, auk náttúrulegra ísmyndana, verið gerðir alls kyns skúlptúrar. Eftir að hafa skoðað okkur um geta þeir sem vilja farið í stutta jöklagöngu að Dachsteinwarte, fjallaskála sem umkringdur er af ís Dachstein jökulsins.

  • Göngutími: ca 45 mínútur

Dagleið 5 | Ganga til Duisitzkarsee

Milli hárra og brattra fjalla liggur hið næstum hringlaga Duisitzkarsee stöðuvatn sem er alger gimsteinn í Schladminger Tauern fjallgarðinum. Farið verður akandi áleiðis en því næst gengið frá Eschachalm (1213 m) í gegnum skóglendi að beitilandinu Saghütten. Við komuna til Duisitzkar er stórkostlegt að ganga út úr skóglendinu og við blasir víðáttumikil fjallasýn sem og hið hringlaga Duisitzkarsee stöðuvatn. Þarna eru tveir alpafjallaskálar með fallegri lindaruppsprettu sem gefur svæðinu skemmtilegt yfirbragð.

  • Göngutími: ca 3-4 klst.
  • Hækkun ca 660 m

Dagleið 6 | Fimm skála ganga

Sjarmerandi sveitabæir, litlir lækir og jafnvel smá snjóskaflar eru það sem bíður okkar í dag á einni fallegustu gönguleið svæðisins. Við göngum frá hótelinu að upphafsstað Dachstein kláfsins en við göngum beint undir kláfnum til að komast að Südwandhütte (1910 m) þar sem við fáum okkur smá hressingu áður en lengra er haldið. Við göngum að Maralmboden og þaðan til Almhüttendorf Neustattalm, áfram til Glösalm þar sem við stoppum
aðeins áður en við förum til Schlitzenalm og aftur til baka á Ramsau svæðið. Tilkomumikil fjallasýn svo langt sem augað eygir fylgir okkur alla þessa gönguleið.

  • Göngutími: ca 5-6 klst.
  • Hækkun ca 740 m

Undirbúningur

Mikilvægt er að þátttakendur séu í ágætis gönguformi en besti undirbúningurinn er að ganga reglulega á fjöll. Fyrir þá sem búa á höfuðborgarsvæðinu er gott að fara upp að Steini í Esjunni a.m.k. þrisvar til fjórum sinnum fyrir ferðina. Ágætis viðmið er að geta gengið upp að Steini Esjunnar á innan við 2 klst. og líða vel eftir gönguna. Þeir sem búa fjær velja sér sitt staðarfjall til að ganga á og sameina þar með undirbúning og útiveru. Því fylgir mikil ánægja að æfa fyrir gönguferð af þessu tagi og farþegar njóta sjálfrar ferðarinnar miklu betur ef þeir æfa og undirbúa sig vel fyrir ferðina.

Myndir úr ferðinni

Fararstjórn

Sigrún Valbergsdóttir

Sigrún Valbergsdóttir er fædd í Hafnarfirði og alin upp í Reykjavík. Sem barn dvaldi hún öll sumur í Svarfaðardal en á unglingsárunum rak móðir hennar sumarhótel í Grundarfirði og þar gekk hún um beina á daginn en upp til fjalla þegar kvöldaði. Sigrún hefur verið fararstjóri hjá Bændaferðum í aðventuferðum til Þýskalands og Austurríkis, einnig í Gardavatnsferðum og gönguferðum um Austurríki og Færeyjar. 

Hótel

Hotel Matschner í Ramsau

Gist verður allar næturnar á Hotel Matschner. Þetta hlýlega fjölskyldurekna 4* hótel í bænum Ramsau er vel staðsett, en skíðagöngubrautirnar liggja beint fyrir utan hótelið. Á hótelinu eru hugguleg herbergi með baði/sturtu, sjónvarpi, síma, öryggishólfi og netaðgangi. Öll herbergin eru reyklaus og með svölum. Á hótelinu er vetrargarður, bar og verönd þar sem upplagt er að hittast og eiga notalega stund. Gestir hafa aðgang að stórri heilsulind sem er tengd við hótelið með undirgöngum. Þar er hægt
að slaka á eftir góðan skíðadag. Í heilsulindinni er m.a. að finna innisundlaug, setlaug, barnalaug og 600m2 saunasvæði með ýmis konar gufuböðum. Enn fremur er hægt að bóka ýmsar tegundir af nuddi gegn gjaldi.

Vefsíða hótelsins

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00