Vesen á skíðum

Gönguklúbburinn Vesen og vergangur í samstarfi við Bændaferðir bjóða upp á spennandi skíðaferð til Austurríkis í fyrri hluta mars. Ferðinni er heitið til Lanersbach í Zillertal en þar liggur nærliggjandi skíðasvæði í allt að 3250 m hæð yfir sjávarmáli og er því talið eitt af snjóöruggustu skíðasvæðum Austurríkis. Svæðið býður upp á fullkomna skíðagleði á stærsta skíðasvæði í heimi en skíðabrekkur þessa stórsvæðis eru um 535 km, í öllum erfiðleikastigum og gott net er af afbragðs lyftum og kláfum sem ætti að tryggja öllu skíðafólki gott skíðafrí. Gist er á glæsilegu 4* hóteli í austurrískum stíl þar sem innifalið er morgunverðarhlaðborð, síðdegishressing og kvöldverður með mismunandi valmatseðli dag hvern. Á hótelinu er einnig líkamsræktarsalur og góð heilsulind þar sem hægt verður að láta líða úr sér eftir góðan skíðadag. Fararstjóri er með hópnum alla ferðina, gistir á sama hóteli og sér um að skipuleggja skíðaferðir fyrir þá sem það vilja. 

Verð á mann 228.800 kr.

Aukagjald fyrir einbýli 24.400 kr.


Innifalið

  • 8 daga ferð.
  • Flug með Icelandair og flugvallaskattar.
  • Ferðir milli flugvallarins í München og hótelsins í Zillertal.
  • Gisting í herbergi með baði á fjögurra stjörnu hóteli.
  • Morgunverðarhlaðborð.
  • Síðdegishressing.
  • Fjögurra rétta kvöldverður af valmatseðli ásamt salatbar, þar af 1x hlaðborð eða fondue-kvöld.
  • Aðgangur að öllu því sem heilsulindin hefur upp á að bjóða.
  • Frítt í skíðarútuna.
  • Íslensk fararstjórn.

Ekki innifalið

  • Hádegisverðir.
  • Aukagjald fyrir skíði í flug 4.700 kr. á fluglegg.
  • Skíðapassi (6 daga skíðapassi fyrir fullorðinn ca € 267).
  • Forfalla- og ferðatrygging.

Kort af ferðinni

FerðalýsingPrenta ferðalýsingu

Skíðasvæðið

Skíðasvæðið Zillertal 3000 liggur beint upp frá hótelinu í eingöngu tveggja mínútna fjarlægð með skíðarútunni. Það samanstendur af skíðafjöllunum Eggalm, Rastkogel, Finkenberg, Penken/Mayrhofen, Ahorn og Hintertux jöklinum. Skíðabrekkurnar á þessu svæði eru um 202 km í öllum erfiðleikastigum og ættu því allir að geta fundið brekkur við sitt hæfi. Svæðið tilheyrir svo einu af fjórum stórskíðasvæðunum í Zillertal sem telja samtals um 535 km. Á Rastkogel svæðinu í Zillertal 3000 er gott byrjenda- og barnasvæði (margar bláar brekkur), en fyrir vant skíðafólk er upplagt að byrja á Hintertux jöklinum og skíða í gegnum „svörtu pönnuna“ alveg niður í dalinn. Einnig er hægt að njóta yndislegs útsýnis þegar skíðað er niður á Penken/Horberg svæðinu. Á svæðinu eru þrjár upplýstar sleðabrekkur og tveir snjóbretta- og „freestyle“ garðar (Van Penken Park sem er einn sá stærsti í Evrópu og Eldorado). Skíðasvæðið liggur frá 630 m upp í 3250 m yfir sjávarmáli og telst því til snjóöruggustu svæða Austurríkis.

 
Einar, fararstjóri ferðarinnar, mun aðstoða samferðamenn við að leigja skíði, kaupa skíðapassa og fara í skíðakennslu við hæfi. Fyrir þá sem vilja, mun hann einnig skipuleggja skíðaferðir um svæðið þar sem hægt er að fylgja honum hluta úr degi eða allan daginn. Hann mun síðan að sjálfsögðu gera eitthvað skemmtilegt með hópnum og má þar nefna ómissandi sleðaferð og kvöldvökur. Þess má geta að skíðapassinn gildir einnig fyrir þrjú nærliggjandi skíðasvæði (Hochzillertal-Hochfügen-Spieljoch, Zillertal Arena og Mayrhofner Bergbahnen) og verður farið í eina eða tvær hópferðir á þau svæði. Heildarvegalengd skíðabrekkna í boði er því um 535 km og lyfturnar um 180 talsins.

Flugið

Flogið verður með Icelandair til München þann 11. mars. Brottför frá Keflavík kl. 7:20 en mæting í Leifsstöð í síðasta lagi 2 klst fyrir brottför. Lending í München kl. 12:05 að staðartíma. Frá flugvellinum í München eru um 180 km til Zillertal svo gera má ráð fyrir að rútuferðin taki um 2,5 klst. Á brottfarardegi leggjum við snemma af stað út á flugvöll og síðan er flogið heim kl. 13:05 frá München. Lending á Íslandi kl. 16:00. 

Myndir úr ferðinni

Fararstjórn

Einar Skúlason

Einar Skúlason er fæddur í Kaupmannahöfn 1971. Hann er með BA gráðu í stjórnmálafræði frá HÍ og MBA gráðu frá Háskólanum í Edinborg.

Hann hefur unnið við markaðsstörf á nokkrum stöðum, var framkvæmdastjóri Alþjóðahússins og kynningarstjóri Fréttablaðsins en hefur síðustu ár starfrækt gönguklúbbinn Vesen og vergang og gönguappið Wapp-Walking app. Í tengslum við gönguklúbbinn hefur Einar verið leiðsögumaður og fararstjóri í hundruðum ferða innanlands og erlendis.

Einar skrifaði jafnframt tvær bækur um gönguleiðir í nágrenni Reykjavíkur.

Hótel

Hotel Tirolerhof í Tux

Hotel Tirolerhof Tux er glæsilegt fjögurra stjörnu alpahótel. Hótelið er heimilislegt, í tírólastíl og eru öll herbergin búin sérbaðherbergi með sturtu/baðkari, sjónvarpi, útvarpi, öryggishólfi, hárþurrku og síma. Baðsloppar eru á herbergjum. Á hótelinu er einnig líkamsræktarsalur og heilsulind þar sem gott er að slappa af eftir góðan dag í fjöllunum. Eins er boðið upp á setustofu þar sem hægt er að tefla, drekka kaffi og ylja sér við arineld. Á hótelinu er góður veitingastaður ásamt bar og kaffistofu. Hótelið er staðsett í bænum Lanersbach og er útsýnið magnað í allar áttir. Um 15 mínútna ganga er í miðbæinn og í næstu verslanir en leiðin þangað er eftir fallegri, upplýstri göngubraut meðfram bæjarlæknum. Hótelið býður upp á stutta kynningarferð með skíðarútu á öll helstu skíðasvæðin í dalnum en svo tekur skíðarútuna einungis 2 mínútur að keyra frá hótelinu að helstu skíðalyftunum í dalnum. Fyrir þá sem vilja fara upp á jökulskíðasvæðið, gengur frí skíðarúta á 15 mínútna fresti upp að lyftu og tekur sú ferð u.þ.b. 15 mínútur Einnig er hægt að taka rútuna að hinum skíðasvæðunum sem tilheyra skíðapassanum.

 
Vefsíða hótelsins.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00