Æfingabúðir í Seefeld

27. janúar - 3. febrúar 2018 (8 dagar)

Áhugi almennings á gönguskíðum hefur verið geysimikill á Íslandi undanfarin ár, bæði í Reykjavík og úti á landi. Í kjölfarið varð mikil aukning á þáttöku í  almenningsgöngum bæði hér heima og erlendis. Bændaferðir mættu þessum aukna áhuga með æfingaferð til ólympíubæjarins Seefeld í austurrísku Ölpunu síðasta vetur og komust færri að en vildu. Í vetur endurtökum við leikinn. Ferðin er hugsuð fyrir þá sem hafa stundað skíðagönguna að einhverju marki og vilja bæta færnina enn betur. Seefeld býður upp á allt það besta til að gera æfingaferðina að ógleymanlegu vetrarævintýri. Svæðið við Seefeld er einstaklega fallegt og fjölbreytt. Skíðabrautir svæðisins eru um 280 km langar og í 1.200 – 1.550 m hæð yfir sjávarmáli. Gist verður á glæsilegu 4 stjörnu hóteli í bænum en þar er boðið upp á fjölbreyttan matseðil og þægileg herbergi. Á hótelinu er heilsulind með úrvali gufubaða og sauna. Flogið er með Icelandair til München og ekið sem leið liggur til Seefeld en þangað eru um 160 km. 

Verð á mann í tvíbýli 188.800 kr.

Aukagjald fyrir einbýli 34.900 kr.


Innifalið

  • Flug með Icelandair til München og flugvallaskattar.
  • Ferðir á milli flugvallarins í München og hótelsins í Seefeld.
  • Gisting í tveggja manna herbergi með sturtu/baði á Hotel Karwendelhof.
  • Glæsilegt morgunverðarhlaðborð.
  • Kvöldverður með fjögurra rétta valmatseðli ásamt salatbar og eftirréttahlaðborði. Boðið verður uppá eitt þemakvöld með hlaðborði.
  • Drykkir með kvöldverði, þ.e. vatn, gos, léttvín, bjór, te og kaffi.
  • Aðgangur að heilsulind hótelsins sem býður m.a. upp á mismunandi gufuböð.
  • Íslensk fararstjórn, en fararstjóri leiðbeinir hópnum, verður farþegum innan handar við æfingar sem og í keppninni í Þýskalandi, fyrir þá sem framlengja ferðina.

Ekki innifalið

  • Hádegisverðir.
  • Aukagjald fyrir skíði í flug, 4.700 kr. á fluglegg.
  • Kaupa þarf sérstakt kort fyrir gönguskíðabrautir svæðisins (vikukort ca €10).
  • Forfalla- og ferðatrygging.

Stefnir þú á Landvættina?

Æfingabúðir og König Ludwig Lauf er frábær undirbúningur fyrir skíðagöngufólk sem ætlar sér að taka þátt í stærri keppnum eins og Vasagöngunni og Fossavatnsgöngunni.

Flugið

Flogið verður með Icelandair til München og tekur flugið um 4 klst. Þaðan eru 160 km til Seefeld, en það má gera ráð fyrir að rútuferðin taki um 2,5 klst.
 
27.01.2018      Keflavík – München      FI 532      07:20 – 12:05

03.02.2018      München – Keflavík      FI 533      13:05 – 16:00

Kort af ferðinni

Ferðalýsing

Prenta ferðalýsingu

Um ferðina & Einar fararstjóra

Einar Ólafsson er fararstjóri og þjálfari í ferðinni. Hann er tvöfaldur ólympíufari, margfaldur íslandsmeistari og hefur haldið utan um alla kennslu hjá skíðagöngufélaginu Ulli undanfarna vetur. Einar hefur einnig tekið þátt í fjölda almenningsganga bæði í Evrópu og norður Ameríku og býr yfir mikilli reynslu í fræðunum. Lagt verður upp með að æfa tvisvar á dag flesta daga með bæði krefjandi og skemmtilegum æfingum. Einnig verður farið í tækniæfingar og notast við myndbandsupptökur til að auka færni þátttakenda. Í lok ferðar hafa þátttakendur möguleika á að framlengja ferðina á eigin vegum og taka þátt í König Ludwig Lauf keppninni, sem er ein skemmtilegasta skíðagöngukeppnin í hinni frægu Worldlopp seríunni sem m.a. Fossavatnsgangan á Ísafirði er hluti af.

Þessi ferð er tilvalin fyrir þá sem eru lengra komnir og vilja bæta sig enn frekar fyrir Vasagönguna eða Fossavatnsgönguna næsta vor. Betra er að vera nokkuð reyndur skíðagöngumaður til að taka þátt í ferðinni og fólk þarf að vera nógu vel á sig komið til að þola 2 æfingar á dag flesta dagana til að nýta ferðina sem best. Þjálfunin verður miðuð að getu hvers og eins. Markmiðið er að allir njóti þess að æfa við bestu mögulegu aðstöðu sem Alparnir hafa upp á að bjóða. Þeir sem ákveða að halda áfram ferðinni á eigin vegum geta bætt einni Worldloppet göngu í safnið og fá jafnframt tækifæri og tilsögn til að taka góðum framförum. Rétt er að vekja athygli á því að fólk sem hyggst keppa í Vasagöngunni getur notað árangur sinn í König Ludwig Lauf keppninni til að komast í betri ráshóp í Svíþjóð.

Skíðasvæðið Seefeld

Seefeld er 3.300 manna bær í um 1.200 metra hæð yfir sjávarmáli. Þessi huggulegi bær er einn vinsælasti ferðamannabærinn í Tíról. Seefeld hásléttan er umvafinn Wetterstein-, Mieminger- og Karwendelfjöllunum en hér áður var þetta mikið vatnasvæði eins og nafn bæjarins ber með sér. Ólympíuleikarnir í norrænum greinum voru haldnir þarna 1964 og 1976 og heimsmeistarakeppnin árið 1999. Árin 2005, 2007 og 2008 var Seefeld valið besta gönguskíðasvæðið af 232 tilnefndum svæðum í Evrópu. Á Seefeld svæðinu má finna fjöldann allan af skíðagöngubrautum enda eru skíðabrautir svæðisins 280 km langar sem henta jafnt byrjendum sem og lengra komnum. Svæðið er fimm stjörnu gönguskíðasvæði og er snjóöruggt allt fram í byrjun apríl. Skíðagöngubrautirnar eru samtengdar fimm þorpum á svæðinu þ.e. Seefeld, Leutasch, Möseren, Reith og Scharnitz og því hægt að fara nýjar og spennandi leiðir á hverjum degi. Einnig er upplagt að taka kláfinn upp á Roshütte fjallið í 1784 m hæð og njóta stórfenglegs útsýnis til allra átta, en þar er vinsæll veitingaskáli. 

Vefsíða Seefeld 

Vefsíða skíðasvæðis

Myndir úr ferðinni

Fararstjórn

Einar Ólafsson

Einar Ólafsson er fararstjóri og þjálfari í ferðinni. Hann er tvöfaldur ólympíufari, margfaldur íslandsmeistari og heldur utan um alla kennslu hjá skíðagöngufélaginu Ulli. Einar hefur einnig tekið þátt í fjölda almenningsganga bæði í Evrópu og norður Ameríku og býr yfir mikilli reynslu í fræðunum.

Hótel

Hotel Karwendelhof

Hotel Karwendelhof er glæsilegt 4 stjörnu hótel sem er staðsett á göngugötu bæjarins Seefeld. Hótelið, sem hefur verið starfrækt frá árinu 1930, var um tíma í eigu listmálarans Fritz Wilberger og má sjá mörg verka hans á veggjum hótelsins. Öll herbergin eru innréttuð í Tírólastíl og eru með baði/sturtu, sjónvarpi, útvarpi, síma, öryggishólfi og hárþurrku. Á hótelinu er nuddpottur, gufubað og eimbað þar sem tilvalið er að slaka á og eiga notalega stund. Boðið er upp á ljósabekki og nudd gegn gjaldi og virka daga er ókeypis aðgangur að Olympia sundlauginni sem er aðeins í 4 mínútna göngufjarlægð frá hótelinu. Við hliðina á hótelinu er spilavítið Casino Seefeld þar sem hægt er að freista gæfunnar.
 
Vefsíða Hotel Karwendelhof

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00