Á gönguskíðum í Seefeld 3

Vetrarfrí á gönguskíðum í skemmtilegum félagsskap og fallegu umhverfi er sannkallaður draumur útivistarfólks. Seefeld býður upp á allt það besta til að gera ferðina að ógleymanlegu vetrarævintýri. Svæðið við Seefeld er einstaklega fallegt og fjölbreytt. Skíðabrautir svæðisins eru rúmlega 245 km langar, þær eru í 1.200 – 1.550 m hæð yfir sjávarmáli og henta jafnt byrjendum sem lengra komnum. Gist verður á glæsilegu 4* hóteli í bænum en þar er boðið upp á fjölbreyttan matseðil og þægileg herbergi. Á hótelinu er heilsulind með úrvali gufubaða og sauna. Flogið er með Icelandair til München og ekið sem leið liggur til Seefeld en þangað eru um 160 km. Markmiðið í þessari ferð er að allir njóti sín við bestu mögulegu aðstöðu sem Alparnir hafa upp á að bjóða. 

Verð á mann í tvíbýli 214.900 kr.

Aukagjald fyrir einbýli 38.800 kr.


Innifalið

  • Flug með Icelandair og flugvallarskattar.
  • Ferðir á milli flugvallarins í München og hótelsins í Seefeld.
  • Gisting í tveggja manna herbergi með baði á fjögurra stjörnu hóteli.
  • Morgunverðarhlaðborð.
  • Vel úti látinn fjögurra rétta kvöldverður ásamt salatbar.
  • Hátíðarkvöldverður og fordrykkur á sunnudegi.
  • Léttir drykkir (kaffi, te, gos, vatn, léttvín og bjór) frá kl. 7:30-22:30.
  • Aðgangur að heilsulind hótelsins.
  • Íslensk fararstjórn.

Ekki innifalið

  • Kaupa þarf sérstakt kort fyrir skíðagöngubrautir svæðisins (vikukort ca €20).
  • Aukagjald fyrir skíði í flug, 4.700 kr. á fluglegg
  • Hádegisverðir
  • Forfalla- og ferðatrygging

Myndband - Seefeld - paradís skíðagöngufólks

Kort af ferðinni

FerðalýsingPrenta ferðalýsingu

Skíðasvæðið

Seefeld er 3.300 manna bær í um 1.200 metra hæð yfir sjávarmáli. Þessi huggulegi bær er einn vinsælasti ferðamannabærinn í Tíról. Seefeld hásléttan er umvafinn Wetterstein-, Mieminger- og Karwendelfjöllunum en hér áður var þetta mikið vatnasvæði eins og nafn bæjarins ber með sér. Ólympíuleikarnir í norrænum greinum voru haldnir þarna 1964 og 1976 og heimsmeistarakeppnin árið 1985 og aftur árið 2019. Árin 2005, 2007 og 2008 var Seefeld valið besta skíðagöngusvæðið af 232 tilnefndum svæðum í Evrópu. Á Seefeld svæðinu má finna fjöldann allan af skíðagöngubrautum enda eru skíðabrautir svæðisins rúmlega 245 km langar og henta jafnt byrjendum sem og lengra komnum. Svæðið er fimm stjörnu skíðagöngusvæði og er snjóöruggt allt fram í byrjun apríl. Skíðagöngubrautirnar eru samtengdar fimm þorpum á svæðinu þ.e. Seefeld, Leutasch, Möseren, Reith og Scharnitz og því hægt að fara nýjar og spennandi leiðir á hverjum degi. Einnig er upplagt að taka Roshütte kláfinn upp á Seefeld Spitze fjallið í 1784 m hæð og njóta stórfenglegs útsýnis til allra átta en þar er vinsæll veitingaskáli.

Vefsíða Seefeld.

Vefsíða skíðasvæðisins í Seefeld.

Flugið

Flogið verður með Icelandair til München þann 8. febrúar. Brottför frá Keflavík kl. 7:20 en mæting í Leifsstöð í síðasta lagi 2 klst fyrir brottför. Lending í München kl. 12:05 að staðartíma. Frá flugvellinum í München eru um 160 km til Seefeld svo gera má ráð fyrir að rútuferðin taki um 2,5 klst. Á brottfarardegi leggjum við snemma af stað út á flugvöll og síðan er flogið heim kl. 13:05 frá München. Lending á Íslandi kl. 16:00. 

Myndir úr ferðinni

Fararstjórn

Íris Marelsdóttir

Íris Marelsdóttir er fædd árið 1961. Hún útskrifaðist sem sjúkraþjálfari frá HÍ 1986 og hefur starfað sem sjúkraþjálfari  hér heima og í Bandaríkjunum, meðal annars sem yfirsjúkraþjálfari á Reykjalundi og á Hjarta- og lungnastöðinni  í Reykjavík.

Árni Ingólfsson

Árni Ingólfsson er fæddur 1961 í Kópavogi. Hann er vélvirki, vinnur í vélsmiðjunni Héðni hf og sér um gæða- og öryggismál fyrirtækisins. Hann hefur verið félagi í Hjálparsveit skáta Kópavogi um 30 ára skeið og starfar þar með rústaflokki sem er hluti af íslensku alþjóðasveitinni. Útivist hefur hann stundað alla tíð og farið í jeppaferðir, gönguferðir, skíðaferðir og kayakferðir.

Hótel

Hotel Karwendelhof

Hotel Karwendelhof er glæsilegt 4 stjörnu hótel sem er staðsett á göngugötu bæjarins Seefeld. Hótelið, sem hefur verið starfrækt frá árinu 1930, var um tíma í eigu listmálarans Fritz Wilberger og má sjá mörg verka hans á veggjum hótelsins. Öll herbergin eru innréttuð í Tírólastíl og eru með baði/sturtu, sjónvarpi, útvarpi, síma, öryggishólfi og hárþurrku. Á hótelinu er gufubað og eimbað þar sem tilvalið er að slaka á og eiga notalega stund. Boðið er upp á ljósabekki og nudd gegn gjaldi og virka daga er ókeypis aðgangur að Olympia sundlauginni sem er aðeins í 4 mínútna göngufjarlægð frá hótelinu. Við hliðina á hótelinu er spilavítið Casino Seefeld þar sem hægt er að freista gæfunnar.
 
Vefsíða Hotel Karwendelhof

Við hjá Bændaferðum höfum einskæran áhuga á útivist og öllu sem henni tengist. Við bjóðum upp á breitt úrval af frábærum hreyfiferðum í Evrópu og á framandi slóðum, allt eftir árstíma. Ferðirnar geta bæði verið léttar og krefjandi og til þeirra teljast hjólaferðir, gönguferðir, útivistarferðir með blandaðri hreyfingu, svigskíðaferðir, gönguskíðaferðir og síðast en ekki síst, hlaupaferðir. Það er ógleymanleg upplifun að næra líkama og sál á erlendri grundu í spennandi umhverfi, en ferðir okkar eru ávallt á frábærum áfangastöðum með mjög góðri aðstöðu.

Hreyfðu þig með okkur!

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir