Trítlað í Sölden

Ötztal er einn fallegasti dalur austurrísku Alpanna og býður hann upp á einstaka möguleika til gönguferða og útiveru. Á þessu fallega alpasvæði má finna tignarlega tinda, tær vötn, ár og skóga og er dalurinn innrammaður af 250 fjallstindum sem ná upp fyrir 3.000 m hæð. Úr nógu er að velja, en á svæðinu er um 1.600 km af merktum gönguleiðum. Áhersla er lögð á að njóta útivistar á þessum yndislega stað, anda að sér fersku fjallalofti og njóta félagsskapar samferðafólks. Gist verður í 7 nætur á huggulegu 4* hóteli í alpastíl sem rekið er af fjölskyldu á staðnum. Að loknum góðum göngudegi er tilvalið að láta líða úr sér í heilsulind hótelsins sem hefur bæði gufuböð af ýmsu tagi og sundlaug. Í þessum fallegu fjallasölum má svo sannarlega upplifa ógleymanleg ævintýri jafnt sem slökun.

Verð á mann í tvíbýli 189.800 kr.

Aukagjald fyrir einbýli 12.800 kr.

Aukagjald fyrir delux herbergi er 4.400 kr.


Innifalið

  • 8 daga ferð.
  • Flug með Icelandair og flugvallarskattar.
  • Ferðir á milli flugvallarins í München og hótelsins í Sölden.
  • Gisting í tveggja manna herbergi með baði/sturtu á fjögurra stjörnu hóteli í Sölden.
  • Ríkulegur morgunverður.
  • Vel útilátinn 6 rétta kvöldverður með salatbar og eftirréttahlaðborði.
  • Síðdegissnarl með kökum og léttum réttum á hótelinu (drykkir ekki innifaldir).
  • Aðgangur að heilsulind hótelsins.
  • Aðgangur að sundlaugargarðinum Aqua Dome.
  • Aðgangur að líkamsræktarstöðinni Gipfelsturm.
  • Göngudagskrá.
  • Leiðsögn staðarleiðsögumanns í gönguferðum.
  • Íslensk fararstjórn.

Ekki innifalið

  • Aðgangseyrir inn á söfn, í hallir og kirkjur.
  • Kláfar eða stólalyftur upp á fjöll.
  • Leigubílaakstur.
  • Hádegisverður.
  • Þjórfé.
  • Ötztal Card í 7 daga ca. € 75.

Útivistarsvæðið Ötzdalurinn

Ötzdalurinn, sem er 65 km langur, skilur að Stubai fjallagarðinn í austri og Ötztal fjöllin í vestri. Þetta er einstaklega fallegur dalur í vesturhluta Tíról sem líklega er hvað frægastur fyrir ísmanninn Ötzi; um 5.000 ára gamla múmíu sem þýskir ferðamenn á göngu fundu í 3.200 m hæð árið 1991. Gist verður í bænum Längenfeld sem er stærsti bær svæðisins, mitt í dalnum. Längenfeld er í 1.200 m hæð og einungis um 13 km frá hinum þekkta skíðabæ Sölden. Á staðnum er sérlega glæsilegur sundlaugargarður, Aqua Dome, og er aðgangur að honum innifalinn. Ötztal dalurinn býður upp á einstaka möguleika til gönguferða og útiveru, en á þessu fallega alpasvæði má finna tignarlega tinda, tær vötn, ár og skóga. Wildspitze, hæsta fjall Ötztal Alpanna, trónir í 3.770 m yfir dalnum. Þá er stórkostlegt að horfa á Stuibenfall fossinn, hæsta foss landsins, steypast 160 metra niður klettaveggina í skógivöxnum hlíðunum. 

Undirbúningur & gönguferðirnar

Mikilvægt er að þátttakendur séu í ágætis gönguformi, en besti undirbúningurinn fyrir þá sem búa á höfuðborgarsvæðinu er að ganga upp að Steini í Esjunni einu sinni í viku, a.m.k. tvisvar til þrisvar sinnum fyrir ferðina. Þeir sem búa fjær velja sér sitt staðarfjall til að ganga á og sameina þar með undirbúning og útiveru. 

 
Farið verður í skipulagðar gönguferðir með staðarleiðsögumanni, en íslenski fararstjórinn verður að sjálfsögðu ávallt með í för. Ákvarðanir um dagleiðirnar verða teknar með skömmum fyrirvara, eftir veðri og aðstæðum. Hvaða dag sem er geta farþegar valið að fara styttri leiðir á eigin vegum eða hreinlega taka það rólega á hótelinu og njóta þess sem heilsulindin og nágrennið hefur upp á að bjóða.

Kort af ferðinni

Ferðalýsing

Prenta ferðalýsingu

Flugið

Flogið verður með Icelandair til München þann 2. september. Brottför frá Keflavík kl. 7:20 en mæting í Leifsstöð í síðasta lagi 2 klst fyrir brottför. Lending í München kl. 13:05 að staðartíma. Frá flugvellinum eru um 270 km til Sölden svo gera má ráð fyrir að rútuferðin taki um 3 klst. Á heimleið 9. september leggjum við af stað út á flugvöll eftir morgunverð og síðan flogið heim kl. 14:05 frá München. Lending á Íslandi kl. 16:00 að staðartíma.

Tillögur að dagleiðum 3. – 8. september

Hér á eftir eru tekin dæmi um 5 mismunandi dagleiðir sem eru líklegar til að vera á dagskránni þessa viku, en einn dagur er frjáls dagur.

Dagleið 1 | Hauersee

Leigubíll flytur okkur innst í dalinn, upp í 1.964m hæð. (Leigubílakostnaður er um € 20 á mann). Við fylgjum síðan gönguslóða yfir Eggen fjallgarðinn þar til komið er að kyrrláta fjallvatninu Hauersee. Yfir vatninu trónir jökull sem varpar sérstakri birtu á vatnið. Hér munum við staldra við, láta þreytuna líða úr okkur og næra okkur áður en haldið verður til baka. Á bakaleiðinni horfum við yfir hinn gróðursæla Ötzdal og njótum útsýnisins.

  • Göngutími: ca. 3,5 klst
  • Hækkun: 400 m
  • Erfiðleikastig: miðlungserfitt
Opna allt

Dagleið 2 | Stallwiesalm og Kleblealm selin

Farið verður til Sölden og þaðan gengið upp í hlíðarnar fyrir ofan bæinn. Fyrst er gengið á vegum skógarhöggsmanna um greniskóginn, en síðar eftir slóða til Windachtal. Þaðan sækir stutt á brattann þar til við komum að rómantíska enginu við Kleblealm selið. Aðeins seinna er komið að selin Stallwiesalm, en þar er hægt að fá sér hressingu. Haldið verður aftur til Sölden eftir skógarvegum.

  • Göngutími: ca. 4,5 klst
  • Hækkun: 600 m
  • Erfiðleikastig: miðlungserfitt

Dagleið 3 | Wetterkreuzkogen og Wörgetal

Í dag tökum við Acherkogelbahn kláfinn frá Ötz upp í Hochötz og hefjum þar gönguna upp að Wetterkreuz, sem er í 2.572 m hæð, en þaðan njótum við stórkostlegs útsýnis til allra átta. Við tökum hér stutt hlé áður en haldið er áfram upp til Wörgetal. Á leið okkar göngum við framhjá draumkenndum fjallatjörnum og stiklum yfir tifandi læki. Grösug blómaengi breiða á móti okkur faðminn í göngunni að Pochersee vatninu, en þar verður mæðinni kastað áður en farið verður aftur í kláfinn við Hochötz.

  • Göngutími: ca. 5,5 klst
  • Hækkun: 650 m
  • Erfiðleikastig: miðlungserfitt

Dagleið 4 | Rotmoosferner og Obergurgl

Við förum með bílum til Obergurgl, en svo með kláfinum Hohen-Mut-Bahn upp í 2.670 m hæð. Þarna í hæstu hæðum blasa við okkur tugir jökla og tinda yfir 3.000 m á hæð. Gengið verður eftir fjallstíg við rætur Rotmoosferner fjallsins og í bakaleiðinni förum við í gegnum dalinn, en þar má jafnvel finna eðalsteina á stangli. Við enda dalsins tökum við góða pásu við Schönwieshütte í 2.270 m hæð. Síðasta spölinn göngum við í gegnum 300 ára gamlan skóg að upphafspunkti göngunnar.

  • Göngutími: ca. 5 klst
  • Lækkun: 700 m
  • Erfiðleikastig: miðlungserfitt

Dagleið 5 | Hochjoch-Hospiz í Vent

Farið með bílum til Vent en þaðan fylgjum við þægilegum göngustígum að hæstu bóndabæjum Austurríkis sem enn er í byggð. Við göngum um dalinn Rofental eftir voldugu gljúfri þar til komið er að veitingastaðnum Hochjoch-Hospiz. Þar nærum við okkur og hvílum áður en haldið er til baka.

  • Göngutími: ca. 6 klst
  • Hækkun: 800 m
  • Erfiðleikastig: miðlungserfitt

Myndir úr ferðinni

Útsýni af fallegu fjalllendi

Útsýni af fallegu fjalllendi

Þýskar kræsingar

Þýskar kræsingar

Útsýni af fallegu fjalllendi
Þýskar kræsingar

Fararstjórn

Sigrún Valbergsdóttir

Sigrún Valbergsdóttir er fædd í Hafnarfirði og alin upp í Reykjavík. Sem barn dvaldi hún öll sumur í Svarfaðardal en á unglingsárunum rak móðir hennar sumarhótel í Grundarfirði og þar gekk hún um beina á daginn en upp til fjalla þegar kvöldaði. Sigrún hefur verið fararstjóri hjá Bændaferðum í aðventuferðum til Þýskalands og Austurríkis, einnig í Gardavatnsferðum og gönguferðum um Austurríki og Færeyjar. 

Hótel

Wanderhotel Rita

Hotel Rita er glæsilegt fjölskyldurekið 4* heilsuhótel í austurrískum stíl. Herbergin eru hlýlega innréttuð með svölum, baði / sturtu, hárþurrku, sjónvarpi, þráðlausri nettengingu, síma og öryggishólfi. Morgunverðarhlaðborðið er fjölbreytt, kvöldverðurinn samanstendur af 6 rétta matseðli ásamt salatbar og endar á osta- og eftirréttahlaðborði. Síðdegis býður hótelið upp á létta smárétti ásamt sætmeti. Engir drykkir eru innifaldir. Eftir góða gönguferð er kærkomið að slappa af í heilsulind hótelsins, en þar er að finna nokkrar tegundir gufubaða og innisundlaug. Aðgangur er innifalinn og fá gestir slopp, baðhandklæði og inniskó til afnota, en hægt er að panta sér ýmsar heilsu- og snyrtimeðferðir gegn gjaldi. Á hótelinu er hægt að fá leigðan ýmsan útbúnað fyrir gönguferðir, s.s. göngustafi, bakpoka, drykkjarflöskur og púlsúr. Jafnframt er hjólaleiga á hótelinu.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir