Páskadraumur í Dubrovnik

Austurlenskur blær, hefðir, minjar og ólýsanleg náttúrufegurð hrífa okkur í glæsilegri ferð til Dubrovnik og Poreč í Króatíu við Adríahafið.

Við hefjum ferðina í Brixen í Suður-Tíról og siglum frá Ancona á Ítalíu yfir til sögufrægu borgarinnar Split í Króatíu. Ekið verður til Dubrovnik, sem er ein aðal menningar- og listaborg landsins. Á leiðinni þangað verður farið í töfrandi siglingu á Neretva ánni sem kemur upp í Bosníu Hersegóvínu og rennur inn í Króatíu. Siglt verður um svæði stundum kallað Flórída Króatíu og óshólma hennar við Adríahafið. Farið verður yfir til Svartfjallalands þaðan sem við siglum með ferju yfir Kotorflóann til gömlu Kotor borgarinnar en elsti hluti hennar er á heimsminjaskrá UNESCO. Önnur spennandi sigling er yfir á eyjuna Maríu á kletti sem er á Kotorflóa. Einnig verður ekið um Pelješac skagann og siglt yfir til eyjunnar Korcula. Við njótum góðra daga í bænum Rovinj í Króatíu sem er yndislegur listamannabær við Istríaströndina. Við endum góða ferð með glæsilegum hætti í tónlistarborginni Salzburg í Austurríki en hún er ein fallegasta borg Austurríkis.

Verð á mann í tvíbýli 299.900 kr.

Aukagjald fyrir einbýli 61.00 kr.

 
Innifalið

  • 14 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Sigling frá Ancona til Split með gistingu um borð.
  • Kvöld- og morgunverður á skipinu frá Ancona til Split.
  • Ferja yfir Kotorflóann til Kotor.
  • Íslensk fararstjórn.

Ekki innifalið

  • Aðgangseyrir inn á söfn, í hallir og kirkjur.
  • Siglingar og ferjur.
  • Vínsmökkun.
  • Hádegisverðir.
  • Þjórfé.

Valfrjálst

  • Virkisveggir í Dubrovnik ca € 20.
  • Sigling yfir á eyjuna Maríu á kletti ca € 10.
  • Sigling út á Korkula eyjuna ca € 15.

Kort af ferðinni

FerðalýsingPrenta ferðalýsingu

16. apríl | Flug til München

Brottför frá Keflavík kl. 7:20 og er mæting í Leifsstöð í síðasta lagi 2 klst. fyrir brottför. Lending í München kl. 13:05 að staðartíma. Þaðan verður ekin fögur leið yfir Brenner skarðið til Suður-Tíról á Ítalíu og gist eina nótt í Brixen.

17. apríl | Ancona & sigling á Adríahafi

Í dag höldum við ferð okkar áfram til Ancona við Adríahafið, höfuðborgar héraðsins Marche. Sögu hennar má rekja aftur til 5. aldar f. Kr. þegar Grikkir flúðu frá Sýrakúsa og settust þar að. Um kvöldið verður siglt frá Ancona til Split í Króatíu og tekur siglingin um 10 klukkustundir. Gist verður í skipinu í tveggja manna klefum með sturtu og salerni og mun kvöldverður bíða okkar um borð. 

18. apríl | Split, Dubrovnik & Sigling á ánni Neretva

Árla dags leggur skipið að landi í Split, sem telst með fegurri borgum landsins. Að loknum morgunverði á skipinu verður stefnan tekin á hina hrífandi Dubrovnik. Á leiðinni þangað verður farið í töfrandi siglingu á Neretva ánni og við fáum hádegishressingu að hætti Neretva íbúa. Eftir skemmtilega siglingu höldum við ferð okkar áfram til Dubrovnik, þar sem gist verður í 5 nætur á góðu hóteli við ströndina. 

Opna allt

19. apríl | Skoðunarferð um Dubrovnik

Dubrovnik er ein aðal menningar- og listaborg landsins. Við förum í skoðunarferð um þessa líflegu og sögufrægu borg, sem hefur að geyma fjölmargar glæstar byggingar frá endurreisnar- og barokktímanum. Borgin iðar af mannlífi og hefur upp á margt skemmtilegt að bjóða. Gengið verður um gömlu virkisveggi borgarinnar sem ná utan um elsta hluta hennar.

20. apríl | Svartfjallaland, Kotorflóinn & borgin Kotor

Spennandi dagur er nú fyrir höndum en ekið verður yfir til Svartfjallalands að Kotor flóanum. Þar förum við með ferju yfir flóann á leið til gömlu Kotor borgarinnar en elsti hluti borgarinnar er á heimsminjaskrá UNESCO. Þar förum við í skemmtilega skoðunarferð, fræðumst örlítið um brot af 2000 ára sögu borgarinnar og upplifum menningu hennar og mannlíf. Einnig verður farið í töfrandi siglingu yfir á eyjuna Maríu á kletti sem er á Kotorflóa.

21. apríl | Frjáls dagur í Dubrovnik

Í dag gefst hverjum og einum tækifæri á að skoða borgina Dubrovnik á eigin spýtur. Upplagt er að taka strætisvagn inn í gamla bæinn en einnig er að sjálfsögðu hægt að slaka á og njóta aðstöðunnar á hótelinu. 

22. apríl | Peljesac skaginn & sigling yfir á Korcula eyju

Peljesac skaginn og Korcula eyjan eru á dagskrá okkar í dag. Ekið verður um skagann sem er annar stærsti skagi landsins. Náttúran er sérlegt augnayndi, t.d. má sjá ólífu-, fíkju- og sítrónurækt og hér er einnig að finna þekktustu vínhéruð landsins. Við siglum út í eyjuna Korcula sem er ein af perlum Adríarhafsstrandarinnar. Skoðunarferð verður farin um bæinn Korcula sem er líflegur og skemmtilegur miðaldabær. 

23. apríl | Ekið um Dalmatíu til Rovinj á Istríaskaganum í Króatíu

Í dag kveðjum við Dubrovnik eftir yndislega daga og ökum upp með Dalmatíu yfir á Istríaskagann í Króatíu þar sem gist verður í 3 nætur í bænum Rovinj sem er yndislegur listamannabær við Istríaströndina. Hótelið er með einkaströnd, inni- og útisundlaug, fallegum garði, heilsulind og líkamsrækt.

24. apríl | Gönguferð í Rovinj og notalegheit

Við könnum umhverfið nánar á skemmtilegri göngu inn í miðbæ Rovinj sem er litríkur bær sem iðar af mannlífi. Upplagt er að ganga upp að barokkkirkju heilagrar Euphemiu, en þaðan er glæsilegt útsýni yfir eyjarnar og gamla bæinn. Úti fyrir Rovinj eru 22 eyjar, stærst þeirra er eyjan Sveta Katharina og sést hún vel frá gamla bænum. Einnig munum við halda niður listamannagötuna og um elsta hluta bæjarins. Eftir hádegi getur hver og einn ráðstafað tíma sínum að vild, hvort heldur sem er að skoða bæinn betur eða verja honum í slökun og huggulegheit á hótelinu.

25. apríl | Slökun og rólegheit í Rovinj

Nú er dagur fyrir rólegheit og slökun í Rovinj. Það er hægt að kanna bæinn betur á eigin vegum, líta inn í skemmtilegar, litlar verslanir eða inn á hin fjölmörgu listagallerí sem einkenna Rovinj. Skemmtileg kaffi- og veitingahús eru svo á hverju strái og ekki má gleyma frábærri aðstöðu á hótelinu.

26. apríl | Ekið til Salzburg í Austurríki

Nú kveðjum við Poreč og Króatíu og ökum til Salzburg í Austurríki, þar sem gist verður síðustu 3 nætur ferðarinnar. Salzburg er einstaklega heillandi borg, en þekktust er hún fyrir að vera fæðingarborg Mozarts. Borgin hefur verið varðveitt á heimsminjaskrá UNESCO síðan 1997 en tilkomumiklar barrokkbyggingar hennar hafa varðveist vel, sem gerir hana og stórfenglegt umhverfi Alpanna allt í kringum borgina að aðdráttarafli fyrir fjölda ferðamanna ár hvert.

27. apríl | Dagur í Salzburg

Við byrjum á að fara í skoðunarferð um borgina, skoðum Mirabellgarðinn og göngum eftir Getreidegasse sem er með elstu og þekktustu götum borgarinnar þar sem finna má mjög áhugavert Mozartsafn. Einnig verður hægt að fara upp í kastalann Hohensalzburg en þar var hluti kvikmyndarinnar Söngvaseiðs eða Sound of Music tekinn upp. Stórkostlegt útsýni er þaðan yfir Salzburg og nágrenni. Eftir það verður frjáls tími fram að kvöldverði.

28. apríl | Frjáls dagur í Salzburg

Nú er komið að því að njóta Salzburg á eigin vegum. Upplagt er að fara inn á Mozartsafnið eða upplifa skemmtilega götustemningu í þessari fallegu borg. Töfrandi verslanir eru í Getreidegasse og auðvitað tilheyrir að fá sér hádegishressingu á einhverjum af fjölmörgu austurrísku veitingastöðum borgarinnar eða Sacher tertu á kaffihúsi.

29. apríl | Heimferð frá Salzburg

Það er komið að heimferð eftir yndislega ferð, stefnan er tekin á München. Brottför er þaðan kl. 14:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir