Draumasigling um Feneyjar

26. apríl – 3. maí 2018 (8 dagar)

Í þessari glæsilegu siglingu um Feneyjar með fljótaskipinu MS Michelangelo gefst einstakt tækifæri til þess að kynnast þessum kyngi mögnuðu eyjum.

Feneyjar hafa löngum verið nefndar Drottning Adríahafsins og ekki að ástæðulausu. Á rölti meðfram síkjunum verður á vegi okkar allt það sem gerir þetta að einum mest eftirsótta ferðamannastað álfunnar. Við Canal Grande gefur að líta einar 200 glæsihallir, á Markúsartorginu stórkostlega stendur Markúsarkirkjan sem er eins og höllin úr ævintýrinu Þúsund og einni nótt. Á siglingu um lónið Veneto sjáum við þéttbyggðar eyjar, kirkjur, hallir og sjómannaskýli. Siglt verður til eyjunnar Murano þar sem kristall hefur verið framleiddur frá örófi alda og yfir á eyjuna Burano sem fræg er fyrir blúndu-kniplingana sína sem við skoðum á leið okkar þar um. Farið verður í land í gamla fiskiþorpinu Chioggia og keyrt þaðan að heimsækja hina líflegu háskólaborg Padua sem kemur manni töluvert á óvart. Þar kynnumst við viðburðaríkri sögu borgarinnar. 

Verð á mann í tvíbýli 239.500 kr.

Aukagjald fyrir einbýli 52.200 kr.

Aukagjald fyrir káetu á efra þilfari í tvíbýli 24.900 kr.
Ekki er hægt að fá einbýli á efra þilfari.

 
Innifalið

  • 8 daga ferð.
  • Flug með Icelandair og flugvallaskattar
  • Hótelgisting í 2ja manna herbergi með baði á hótelum
  • Morgun- og kvöldverður á hótelum
  • Gisting á skipinu MS Michelangelo í 2ja manna klefa með sturtu / salerni í 4 nætur / 5 daga
  • Morgun-, hádegis- og kvöldverður á skipinu MS Michelangelo
  • Móttökudrykkur á skipinu
  • Allir drykkir á meðan á siglingu stendur, vín, bjór, sterkir drykkir, vatn, gos, kokteilar, kaffi og kökur
  • Hátíðarkvöldverður á skipinu þann 30. apríl
  • Allar skoðunarferðir með rútu samkvæmt ferðalýsingu
  • Íslensk fararstjórn

Ekki innifalið

  • Aðgangseyrir inn á söfn, í hallir og kirkjur.
  • Aðrar siglingar og ferjur.
  • Vínsmökkun.
  • Hádegisverðir.
  • Þjórfé.

Valfrjálst

  • Léttur hádegisverður og vínsmökkun í Rovereto ca. € 18.

Kort af ferðinni

Ferðalýsing

Prenta ferðalýsingu

26. apríl | Flug til München & Brixen

Brottför frá Keflavík kl. 7:20 og er mæting í Leifsstöð í síðasta lagi 2 klst. fyrir brottför. Lending í München kl. 13:05 að staðartíma, en þaðan verður ekin fögur leið yfir Brennersskarðið til Suður-Tíról á Ítalíu og gist eina nótt í bænum Brixen.

27. apríl | Riva del Garda við Gardavatnið & Feneyjar

Á leið okkar til Feneyja verður stoppað í bænum Riva del Garda við Gardavatn, en þar gefum við okkur góðan tíma til að fá okkur hressingu og skoða okkur um. Við komuna til Feneyja bíður okkar fljótaskipið MS Michelangelo í stórhöfninni. Eftir að hafa verið boðin velkomin með drykk og áhöfnin hefur kynnt sig, eigum við notalega kvöldstund. Á meðan á kvöldverði stendur leysir skipið landfestar og siglir inn til Feneyja í nágrenni Markúsartorgsins. Feneyjar eru byggðar á 118 eyjum sem tengdar eru saman með 400 brúm. Undirstaða borgarinnar er á staurum sem reknir eru um 15 – 20 metra niður á botn síkjanna og standa svo þétt saman að þeir mynda fleka. Gist verður um borð í skipinu í 4 nætur. Eftir kvöldverð verður hægt að ganga inn á Markúsartorgið eða slaka á í setustofu skipsins við ljúfa tóna.

28. apríl | Sigling um Veneta lónið, eyjarnar Murano & Burano

Um morguninn verður lagt í siglingu um Veneta lónið sem liggur umhverfis Feneyjar og er skilið frá Adríahafinu með landrifi. Á siglingunni verða á vegi okkar þéttbyggðar eyjar, kirkjur, hallir, sjómannsskýli og munum við kynnast forvitnilegri sögu og lífi eyjaskeggja. Að loknum hádegisverði leggjum við að bryggju í Feneyjum, skiptum yfir í minni fljótabáta og siglum yfir á eyjuna Murano. Eyjan er heimsþekkt fyrir framleiðslu á kristal, sem staðið hefur óslitin frá árinu 1291. Á eyjunni er einnig að finna fjölda verslana og verksmiðja. Að skoðun lokinni höldum við för okkar áfram yfir á eyjuna Burano sem þekkt er fyrir framleiðslu á blúndu-kniplingum. Við kynnumst framleiðslunni, kíkjum í verksmiðjurnar ásamt því að upplifa heillandi mannlífið á eyjunni, ganga þröngar götur og skoða okkur um. 

Opna allt

29. apríl | Skoðunarferð um Feneyjar & frjáls tími

Í dag höldum við í áhugaverða skoðunarferð um Feneyjar með heimamann í fararbroddi. Auður og íburður blasir hvarvetna við í borginni. Við röltum um hellulagðar og hlykkjóttar götur, yfir fjöldamargar brýr og á vegi okkar verða stórfenglegar sögulegar byggingar eins og hertogahöllin sem er ein glæsilegasta bygging borgarinnar. Við skoðum líka Markúsartorgið þar sem Markúsarkirkjan stendur. Hún er ein merkilegasta kirkjubygging veraldar, byggð í austrænum stíl og minnir á höllina úr ævintýrinu 1001 nótt. Við komum að hinni frægu Rialto brú sem liggur yfir Grand Canal skurðinn, en hann mun vera 3,8 km langur og 900 m breiður og við hann standa hvorki meira né minna en 200 hallir. Skoðunarferðin endar við MS Michelangelo, þar sem okkar býður hádegisverður. Eftir hádegi er frjáls tími til að kanna borgina á eigin vegum og gefst þá færi á að fara upp í borgarturninn eða upp á svalir Markúsarkirkjunnar. Áhugavert er að virða fyrir sér veraldlegum íburði hertogahallarinnar, en höllin geymir málverkið Paradís eftir Tinderetto sem mun vera eitt stærsta málverk í heimi. Upplagt er að fá að fljóta með einhverjum af fjölmörgum gondólaræðurum um þröng en heillandi síki borgarinnar, en margir hverjir skemmta farþegum sínum einnig með söngnum Ó sóló míó, sem hlýtur að vera einstök upplifun. Að loknum góðum tíma í borginni bíður okkar glæsilegur kvöldverður á fljótaskipinu okkar.

30. apríl | Sigling um Veneta lónið, Chioggia & Padua

Á meðan á morgunverði stendur leysir skipið landfestar og siglir yfir Veneta lónið. Í dag verður farið í land í gamla fiskiþorpinu Chioggia, en þaðan verður haldið í rútu til hinnar fornu háskólaborgar Padua. Í borginni skoðum við okkur um með innlendan leiðsögumann í broddi fylkingar og fræðumst um viðburðarríka sögu einnar elstu borgar Ítalíu. Rúta ferjar okkur svo aftur landleiðina til Feneyja, en í kvöld verður efnt til hátíðarkvöldverðar og skemmtikvölds í einum af sölum skipsins og mun kvöldið líða við tónlist og dans prúðbúinna gesta.

1. maí | Kveðjustund, Noarna vínbóndi & Salzburg

Þá er komið að því að kveðja áhöfnina á MS Michelangelo og yfirgefa skipið eftir dásamlega daga í Feneyjum. Ekið verður norður til Salzburg í Austurríki þar sem gist verður í 2 nætur. Á leiðinni verður stoppað í kastalanum Noarna sem staðsettur er fyrir ofan borgina Rovereto.Við fáum stutta leiðsögn um kastalann og snæðum síðan léttan hádegisverð að hætti íbúanna í dalnum og geta þeir sem vilja smakkað á afurðum vínbænda í leiðinni.

2. maí | Tónlistarborgin Salzburg & Mozart

Skemmtileg skoðunarferð um undurfögru borgina Salzburg sem þekktust er sem fæðingarborg Mozart, en jafnframt fyrir hrífandi byggingar í barokkstíl. Við hefjum daginn á stuttri skoðunarferð um borgina, skoðum Mirabellgarðinn og göngum eftir Getreidegasse, en hún er með elstu og þekktustu götum borgarinnar. Þar er að finna mjög áhugavert Mozartsafn. Á góðum degi er gaman að koma upp í kastalann Hohensalzburg, en þar var hluti kvikmyndarinnar Söngvaseiðs eða Sound of Music tekin upp. Falleg sýn er þaðan yfir borgina, Salzburgerland og stórfenglegt er umhverfi Alpanna í kring sem eru aðdráttarafl fjölda ferðamanna ár hvert. Fram að kvöldverði gefst tími til að njóta þess sem þessi fagra borg hefur upp á að bjóða.

3. maí | Heimferð frá München

Nú er komið að heimferð og eftir þessa skemmtilegu ferð. Ekið verður út á flugvöllinn í München, brottför er þaðan kl. 14:05 og áætluð lending í Keflavík kl. 16:00 að staðartíma.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Skip

MS Mischelangelo

MS Mischelangelo tilheyrir frönsku skipafyrirtæki Prestige Class Croisi Europe og var tekið í notkun árið 2000. Þar er að finna glæsilega innréttaða setustofa með bar og veitingastað, þar sem boðið verður upp á hlaðborð á morgnana, en þjónað til borðs í hádegis- og kvöldverði. Allir drykkir eru innifaldir meðan á siglingu stendur, vín, bjór, sterkir drykkir, vatn, gos, kokteilar, kaffi og kökur. Klefarnir eru allir með sér baðherbergi, útsýnisglugga, hárblásara, sjónvarpi og öryggishólfi. Loftræstikerfi er í öllum klefunum.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir