Útivist í Chamonix

Hátt í Ölpunum er hið heimsþekkta skíða- og útivistarsvæði Chamonix við tindana Aiguilles Rouges og Aiguille du Midi. Svæðið er eitt elsta skíðasvæði Frakklands en þar voru fyrstu vetrarólympíuleikarnir haldnir árið 1924. Þó svæðið laði til sín fjölda skíðaiðkenda að vetri til er það líka paradís útivistarmannsins á sumrin en hér er hægt að finna fjölda gönguleiða við allra hæfi. Mont Blanc, hæsta fjall Evrópu er stöðugt í augsýn, ásamt fjölda tignarlegustu tinda Alpanna. Í ferðinni verður dvalið á góðu hóteli og gengnar verða dagleiðir skipulagðar af fararstjóra ferðarinnar í samráði við innlendan leiðsögumann. Hálfan dag munum við hjóla um þetta fallega svæði. Í ferðinni fer saman dásamleg útivist og afslöppun í skemmtilegum félagsskap.

Verð á mann í tvíbýli 244.600 kr.

Aukagjald fyrir einbýli 56.500 kr.


Innifalið

  • 8 daga ferð.
  • Flug með Icelandair og flugvallaskattar.
  • Ferðir milli flugvallarins í Genf og hótelsins í Chamonix.
  • Gisting í 7 nætur í tveggja manna herbergi með baði.
  • Glæsilegt morgunverðarhlaðborð.
  • Þriggja rétta kvöldverður öll kvöld.
  • Afnot af baðslopp og inniskóm á meðan á dvöl stendur.
  • Aðgangur að sundlaug og heilsulind hótelsins.
  • Leiga á hjóli og hjálmi í hálfan dag.
  • Göngudagskrá.
  • Innlend leiðsögn í göngu- og hjólaferðum.
  • Íslensk fararstjórn.

Ekki innifalið

  • Aðgangseyrir inn á söfn, í hallir og kirkjur.
  • Kláfar eða stólalyftur upp á fjöll.
  • Leigubílaakstur.
  • Hádegisverðir.
  • Þjórfé.

Valfrjálst

  • Kláfur upp á Aiguille du Midi ca € 63.
  • Flúðasigling ca € 41.
  • Jökulganga með búnaði ásamt lyftupassa ca € 175.

Undirbúningur

Mikilvægt er að þátttakendur séu í ágætis gönguformi en besti undirbúningurinn er að ganga reglulega á fjöll. Fyrir þá sem búa á höfuðborgarsvæðinu er gott að fara upp að Steini í Esjunni a.m.k. þrisvar til fjórum sinnum fyrir ferðina. Ágætis viðmið er að geta gengið upp að Steini Esjunnar á innan við 2 klst. og líða vel eftir gönguna. Þeir sem búa fjær velja sér sitt staðarfjall til að ganga á og sameina þar með undirbúning og útiveru. Einnig er mikilvægt að undirbúa sig og hjóla fyrir ferð til að aðlagast álagi og núningi, auk þess sem það eykur öryggi og gleði. Því fylgir mikil ánægja að æfa fyrir útivistarferð af þessu tagi og farþegar njóta sjálfrar ferðarinnar miklu betur ef þeir æfa og undirbúa sig vel fyrir ferðina.

Kort af ferðinni

FerðalýsingPrenta ferðalýsingu

Flogið til Genf

Flogið verður með Icelandair til Genf þann 7. september. Brottför frá Keflavík kl. 7:20 en mæting í Leifsstöð í síðasta lagi 2 klst. fyrir brottför. Lending í Genf kl. 13:00 að staðartíma. Frá flugvellinum í Genf er rúmlega klukkustundar akstur til Chamonix. Á heimleið 14. september leggjum við af stað eftir morgunmat út á flugvöll og flogið verður heim kl. 14:00 frá Genf. Lending í Keflavík kl. 15:50 að staðartíma. 

Tillögur að dagleiðum

Eftirfarandi eru mögulegar leiðir á svæðinu fyrir fjóra göngudaga en í raun verður ekki ákveðið fyrr en með skömmum fyrirvara nákvæmlega hvaða leiðir verða valdar og fer það eftir veðri og aðstæðum. Þá er einn hjóladagur og einn frídagur í ferðinni en auðvitað geta þátttakendur hvenær sem er valið að taka daginn rólega á hótelinu og njóta aðstöðunnar.

Dagleið 1 | Aiguille du Midi – Mer de Glace

Þessi dagur er blanda af skoðunarferð og gönguferð. Við byrjum á að fara í spennandi ferð með kláfi á topp Aiguille du Midi í 3842 m hæð. Nafnið merkir hádegisnálin því sólin er beint yfir tindinum á hádegi þegar horft er frá Chamonix. Það tekur 20 mín. að komast á toppinn með kláfnum. Á leiðinni áttar maður sig á hversu mikið afrek það hefur verið að ráðast í þessa mannvirkjagerð fyrir meira en öld, en það þurfti nokkra áfanga til og toppnum var loks náð árið 1955. Héðan er stórkostlegt útsýni til allra átta og við njótum þess. Þeir huguðustu geta stigið út á glersvalir og horft í hyldýpið niður fyrir fætur sér. Þegar við höfum skoðað nóg tökum við kláfinn niður í 1900 m hæð og förum út hjá Montenvers Mer de Glace. Gönguferð dagsins verður hér í dalnum sem kenndur er við skriðjökulinn. Gengnir verða ca 9 km og stoppað til að borða nesti á fögrum stað. Í jöklinum er mjög áhugaverður íshellir sem laðar ferðamenn víða að og ekki er lestin sem flytur okkur til baka síður áhugaverð en þetta er tannhjólalest sem klífur hlíðar fjallsins á 20 mínútum.

  • Kostnaður við lyftur/kláfa: ca € 63.
  • Göngutími: ca 4 klst.
  • Erfiðleikastig: létt
Opna allt

Dagleið 2 | Alpavötn – Lac Blanc & Cheserys

Farið verður með Flegere kláfinum og stólalyftu upp á topp Index í 2525 m hæð. Þaðan er gengið að fjallavötnunum Blanc og Chesery. Það er ótrúlegt að undurfögur stöðuvötn finnist í þessum fjallasölum í 2000-2500 m hæð. Þegar veður er stillt og sólin skín þá er dásamlegt að sjá fjallatinda speglast í vatnsfletinum. Við hvílum við Lac Blanc, snæðum nesti og njótum dýrðarinnar. Höldum svo göngunni áfram og komum að Cheserys vatni sem er ekki síðra og reyndar má segja að útsýnið héðan yfir á Mont Blanc fjallgarðinn sé enn magnaðra. Sýnin til jökla, niður í bæinn og yfir til Sviss alla gönguna er hreint ótrúleg. Við göngum um Les Aiguilles Rouges þjóðgarðinn með einstöku dýralífi og því er ekki útilokað að við sjáum alpagemsur, fjallageitur eða múrmeldýr. Við endum tæplega 15 km göngu við kláfinn.

  • Kostnaður við lyftur/kláfa: ca 28 €
  • Göngutími: ca 3 klst.
  • Erfiðleikastig: létt

Dagleið 3 | Selin í Loriaz

Hópurinn verður fluttur til þorpsins Vallorcine þar sem gangan hefst. Gengið verður á gróðursælu beitilandi í áttina til Loriaz. Allt frá 13. öld nýttu bændur beitiland þetta og ráku búpening hingað á sumrin. Selin voru öll á einum stað en þar höfðust bændur við og gerðu osta. Sjá má leifar af upprunalegu byggingunum en núverandi sel voru byggð snemma á 20. öld. Tímarnir breytast og mennirnir með, búskapur dróst saman og smám saman lagðist þessi aldagamli siður af. Við tók ferðamennska og nú gistir mannfólk selin. Þetta er indæll staður og útsýnið yfir á Mont Blanc fjallgarðinn er kyngimagnað. Við göngum aðra leið til baka, komum niður að Bérard ánni og fylgjum henni til baka til Vallorcine. Þaðan er hópnum ekið á hótel.

  • Göngutími: ca 4 klst.
  • Erfiðleikastig: miðlungserfitt

Dagleið 4 | L´Aiguillette des Houches

Hópurinn verður fluttur að rótum fjallsins og gangan hefst upp til Aiguillette des Houches í 2285 m hæð! Gengið verður á hlykkjóttum slóðum gegnum skóginn uns komið er upp yfir skógarlínuna. Við tekur grýttur slóði með tröppum á köflum. Af hlíðum og toppi fjallsins er útsýnið hreint ótrúlegt yfir Chamonix dalinn og maður fær það á tilfinninguna að nánast sé hægt að snerta Mont Blanc.

  • Göngutími: ca 5 klst.
  • Erfiðleikastig: miðlungserfitt

Dagleið 5 | Hjóladagur um nágrenni Chamonix

Á hjóladaginn verður farið um nágrenni Chamonix. Þátttakendur verða sóttir á hótel og fluttir að upphafsreit. Þar bíða hjólin, hjálmar og staðarleiðsögumaður. Boðið verður upp á styttri og lengri leiðir hálfan daginn á fjallahjólum um skemmtilega skógarstíga. Eftir þessa upplifun er gott tækifæri til að borða hádegisverð í bænum og skoða sig um.

Frídagur

Frídaginn er tilvalið að kynna sér fleiri útivistarmöguleika á svæðinu eins og t.d. flúðasiglingu niður ána Arve eða í jökulgöngu á Dent du Géant.

Myndir úr ferðinni

Fararstjórn

Steinunn H. Hannesdóttir

Steinunn H. Hannesdóttir er M.Sc. íþróttafræðingur að mennt. Hún kenndi íþróttir í skólum í nokkur ár en síðan var áherslan lögð á almenningsíþróttir, m.a. á líkamsræktarstöðvum og hjá öldruðum. Steinunn sá einnig um hlaupaþjálfun hjá Trimmklúbbi Seltjarnarness í 14 ár. Hún hefur starfað við heilsuþjálfun fólks í endurhæfingu á Reykjalundi síðan 2010. Steinunn hefur verið fararstjóri í gönguskíðaferðum Bændaferða síðan 2006 og í útivistarferðum síðan 2012.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir