Ítalíudraumur

27. ágúst - 10. september 2018 (15 dagar)

Þessi ferð er sannkallaður Ítalíudraumur, glæsilegir áfangastaðir í góðum félagskap.

Farið verður um Puglia hérað og munum við sjá hin einstöku Trulli hús og ólýsanlega fegurð við Napólíflóa þegar við heimsækjum Sorrento og eyjuna Capri. Ferðin hefst í Loreto, hinum þekkta pílagrímsbæ sem er á leiðinni til Puglia héraðsins og perlunnar Ostuni, eða hvítu borgarinnar eins og hún er kölluð. Bærinn Alberobello er einn áhugaverðasti staður Trulli svæðisins, en hann er skráður á heimsminjaskrá UNESCO og þar gefur að líta hvítkölkuðu steinhúsin með keiluþökunum. Það er mögnuð upplifun að koma til Matera borgar þar sem heil hús, íbúðir og hallir eru grafnar inn í klettana g minnir staðurinn óneitanlega á gömlu Jerúsalem. Perlan Otranto sem skartar grískum blæ er einn fallegasti og eftirsóttasti staður í Puglia. Eftir dásemdir hér er ekið til Sorrento við Napólíflóa, þar sem við njótum ljúfra daga. Á leiðinni verða áð í Pompei, sem geymir frægustu fornminjar veraldar. Farið verður í ævintýralega siglingu til Caprí, sæbrattrar klettaeyju þar sem siglt verður í Bláa hellinn og farið með stólalyftu upp á hæsta fjall eyjunnar, Monte Solaro. Við bæði siglum og ökum eftir Amalfíströndinni, sem er ein fallegasta strönd Ítalíu. Í bænum Marina di Massa í Toskana héraði njótum við lífsins og slökum á, en að endingu heimsækjum við Innsbruck í Tíról.

Verð á mann í tvíbýli 349.900 kr.

Aukagjald fyrir einbýli 72.600 kr.

Innifalið

  • 15 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Ferja til og frá Caprí.
  • Sigling & ferð með smárútum meðfram Amalfíströndinni.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Hádegisverðir.
  • Þjórfé.

Valfrjálst

  • Hádegissnarl í Trúlli húsi ca. € 15.
  • Hellaborgin Matera ca. € 12.
  • Pompei ca. € 13.
  • Blái hellirinn ca. € 28.

Kort af ferðinni

Ferðalýsing

Prenta ferðalýsingu

27. ágúst | Flug til Mílanó & gist þar

Brottför frá Keflavík kl. 13:50 mæting í Leifsstöð í síðasta lagi 2 klst. fyrir brottför. Lending í Mílanó kl. 19:40 að staðartíma. Gist verður fyrstu nóttina á góðu hóteli í nágrenni flugvallarins.

28. ágúst | Mílanó & Loreto

Ekin fögur leið til Loreto sem byggð er á hæð nálægt ströndinni. Þessi borg er einn eftirsóttasti pílagrímastaður Ítalíu, en kirkjan Santuario della Santa Casa er önnur í röðinni á eftir Péturskirkjunni í Róm á lista yfir mest sóttu pílagrímsstaði í heiminum. Við gistum eina nótt í Loreto.

29. ágúst | Héraðið Puglia & hvíta borgin Ostuni

Við hefjum daginn í Loreto á að fara stutt inn í bæ til að líta í kirkjuna Santuario della Santa Casa. Þjóðsagan segir frá því að 4 englar hafi flutt hús heilögu fjölskyldunnar eða Maríu meyjar frá Nazaret til Loreto og síðan hafi kirkjan verið byggð utan um það. Á þetta að hafa gerst rétt áður en að krossfararnir töpuðu svæðinu til heiðingjanna. Að skoðunarferð lokinni, ökum við inn í Puglia héraðið og komum til litlu borgarinnar Ostuni sem betur er þekkt sem hvíta borgin. Þessi einstaklega töfrandi borg þar sem hvarvetna má sjá hvítkölkuð hús, líkist gjarnan stórri rjómatertu þegar bæinn ber fyrir augu. Hér munum við gista 5 nætur. Frá hótelinu er 5 mínútna gangur inn í gamla miðbæinn í Ostuni.

Opna allt

30. ágúst | Alberobello, Trulli hús & hádegissnarl

Þennan ævintýradag byrjum við í bænum Alberobello, miðstöð Trulli svæðisins í Puglia,  en árið 1996 var bærinn settur á heimsminjaskrá UNESCO fyrir sérkennilegar byggingar. Þar eru um 1.000 lítil og hringlaga hvítkölkuð steinhús, hlaðin með keiluþökum. Húsin eru einkennandi fyrir svæðið og voru notuð sem hús hjarðmanna og bænda, en í stærsta húsinu er að finna merkilegt safn . Við munum snæða huggulegan hádegisverð í einu húsinu. Einstaklega gaman er að ganga um götur bæjarins þar sem finna má fjölda minjagripa verslanna og víða býðst að smakka á fljótandi gulli heimamanna, ólífuolíunni, sem á þessum slóðum drýpur af hverju strái. 

31. ágúst | Rólegur dagur í Ostuni

Nú gefst tækifæri til að slaka á og njóta þessa dásamlega bæjar. Við förum saman í smá rölt um bæinn eftir morgunverð, en eftir það er upplagt að skoða sig betur um í bænum, líta inn í litlar forvitnilegar verslanir og kynna sér líf bæjarbúa. Þeir sem vilja láta fara vel um sig á hótelinu, geta nýtt góða aðstöðu þess, sett tærnar upp í loft í sólbaðsaðstöðunni eða heilsulindinni og hvílst.

1. september | Hellaborgin Matera & Altamura

Það er mikil upplifun að koma til borgarinnar Matera sem er á dagskrá okkar í dag, en hún hefur verið á heimsminjaskrá UNESCO frá árinu 1993. Ævintýralegt er að koma þangað og sjá hús, kirkjur og hallir frá 4. öld f. Kr. sem hoggnar eru inn í bergið og minna á gömlu Jerúsalem eða katakompurnar. Árið 1950 bjuggu enn um 20.000 manns hér, en þessir hellabústaðir eru kallaðar Sassi. Á leiðinni til baka verður áð í Altamura til að skoða stæðilega dómkirkju með frægri gluggarós.

2. september | Skemmtilegur dagur í Otranto

Ekið verður til virkisbæjarins Otranto sem skartar framandi grískum blæ, en þar er umhverfið dýrðlegt. Dómkirkjan er fræg vegna kirkjugólfsins sem er lagt mósaík en um 10 milljónir steina sýna 700 sögur mánaðanna og ýmissa hetja sögunnar. Þetta stórvirki listasögunnar er gott dæmi um svita og þrotlaust strit listamanna fyrri tíma. Bærinn er ein af perlum landsins og fegurðin við Adríahafið er einstök. Við gefum okkur góðan tíma til að njóta alls sem bærinn hefur upp á að bjóða. Á góðum degi sést þaðan alla leið yfir til Albaníu.

3. september | Ostuni, Pompei & Sorrento

Nú kveðjum við Ostuni eftir yndislega dvöl og er stefnan tekin á Sorrento við Napólíflóa,  eins fallegasta flóa landsins. Á leiðinni þangað heimsækjum við Pompei og lítum á einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleik um söguna. Eftir að hafa staldrað við í Pompei drykklanga stund höldum við áfram til Sorrento. Bærinn er einstakt augnayndi, byggður í bröttum hlíðum, þar sem vaxa ólífu- appelsínu- og sítrónutré, en þess má geta að Limoncello líkjörinn frægi kemur frá þessu svæði. Gist verður 4 nætur í Sorrento á góðu hóteli, en þaðan er stórkostlegt útsýni.

4. september | Sigling til Caprí

Farið verður í siglingu til Caprí, perlu Napólíflóans. Við skoðum eyjuna, siglum að bláa hellinum Grotta Azzurra og förum upp til Anacapri þar sem við njótum stórfenglegs útsýnis. Áhugasömum gefst einnig tækifæri til að fara með stólalyftu upp á fjallið Monte Solaro. Jafnframt verður hægt að líta á kniplinga og alls kyns handunnar vefnaðarvörur, dúka, klæði og fatnað.

5. september | Dagur í Sorrento við Napólíflóa

Dagurinn er tilvalinn til rólegheita. Upplagt er að fara í notalega göngu og kanna dásamlegt umhverfið í Sorrento. Í bænum er fjöldinn allur af dulúðlegum þröngum, gömlum götum og glæsilegum kirkjum. Þetta er einn vinsælasti ferðamannabærinn við Amalfíströndina.

6. september | Sigling & rúta með Amalfíströndinni

Töfrandi dagsferð um Amalfíströndina þar sem fegurðin er svo  sannarlega einstök. Við hefjum ferðina á siglingu meðfram ströndinni til bæjarins Amalfí þar sem við stígum á land og skoðum okkur um. Á rölti um bæinn sjáum við mikilfenglega dómkirkju frá 10. öld, snotur veitinga- og kaffihús og litlar verslanir sem gaman er að kíkja inn í. Því næst verður ekið til bæjarins Ravello sem stendur í um 350 m hæð, en þaðan gefur að líta ægifagurt útsýni yfir alla strandlengjuna, eins langt og augað eygir. Þar er einnig að finna glæstu höllina Rufoli, þar sem tónskáldið Richard Wagner var gestkomandi um tíma og fékk innblástur að óperu sinni Parsifal. Ekið verður með smárútum til baka eftir Amalfíströndinni um stórbrotin gil, milli smábæja og hótela sem hanga á klettabrúninni. Hvarvetna gefur að líta dásamlegt landslag. Við mælum eindregið með því að gestir gæði sér á grilluðum fiski í hádeginu, sem er einn helsti sérréttur íbúa svæðisins.

7. september | Sorrento & Marina di Massa

Nú kveðjum við þennan yndislega stað eftir góða daga. Ekin verður áhugaverð leið í gegnum Toskana hérað til Marina di Massa þar sem gist verður í 2 nætur.

8. september | Frjáls dagur í Marina di Massa

Frjáls dagur til að slaka á í Marina di Massa sem er yndislegur strandbær við Versillia ströndina. Hér er hægt að fara í göngu á ströndinni og líta inn í fínar verslanir, kaffihús og veitingastaði. Einnig er hægt að taka það rólega og njóta aðstöðunnar við hótelið. Í bænum kennir einnig margra grasa menningar- og mannlífs, sem gaman er að kynna sér í rólegheitunum.

9. september | Marina di Massa & Innsbruck

Nú kveðjum við Marina die Massa eftir ljúfa daga og leggjum snemma af stað til  Innsbruck. Miðaldahluti borgarinnar er mjög aðlaðandi, en Innsbruck var ein af borgum Habsborgaranna, einnar mikilvægustu konungsættar Evrópu. Þegar við höfum komið okkur fyrir á hótelinu gefst tími til að upplifa skemmtilegt og iðandi mannlíf hennar, kíkja á kaupmenn eða setjast á kaffi- eða veitingahús. Hér verður gist í eina nótt.  

10. september | Heimferð frá München

Komið er að heimferð eftir þessa glæsilegu ferð. Ekið verður til flugvallar í München, brottför er þaðan kl. 14:05 og er áætluð lending í Keflavík kl. 16:00 að staðartíma.  

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir