Alpafegurð Ítalíu

Í þessari ferð höldum við á vit ævintýranna í Suður-Tíról á Ítalíu og upplifum kyngimagnaða náttúrufegurð Dólómítafjalla sem er sennilega einn frægasti fjallgarður Alpanna þar sem kvikmyndin Everest var að hluta tekin upp. Áð verður í Riva del Garda við Gardavatnið á leið til Brixen sem er ein af perlum Suður-Tíról í Eisackdalnum, umvafin náttúrufegurð.

Í ferðinni mun skemmtilegt samspil töfrandi skoðunarferða og notalegra samverustunda leika stórt hlutverk. Stórkostleg fegurð blasir við uppi í Dólómítafjöllum þegar farið er með kláfi upp á Pordoi fjallið en þar er mikilfenglegt útsýni yfir ítölsku, austurrísku og svissnesku Alpana. Þaðan er svo ekið hjá Rosengarten fjallgarðinum. Glæsta borgin Merano verður sótt heim með sínum skemmtilegu, þröngu götum, yfirbyggðum súlnagöngum, fögrum byggingum og iðandi mannlífi. Þeir þekkja vel til vínræktar í héraðinu og í Neustift klaustri bíður okkar vínsmökkun. Ómótstæðileg náttúrufegurð er uppi á Plose fjallinu í Brixen en við toppum þessa ferð í bænum St. Ulrich í dalnum Val Gardena sem rómaður er fyrir fegurð og heimsþekkt tréútskurðarlistaverk. Við ferðumst með kláfi upp á Seiser alm sem er hæsta hálendisslétta Evrópu en þaðan er stórkostlegt útsýni yfir tinda Alpafjalla. Þessir sæludagar enda í heimsborginni Mílanó.

Verð á mann í tvíbýli 212.200 kr.

Aukagjald fyrir einbýli 14.400 kr.

Innifalið

  • 8 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun og kvöldverður á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Siglingar, vínsmökkun og kláfar.
  • Hádegisverðir.
  • Þjórfé.

Valfrjálst

  • Kláfur upp á Pordoi ca € 19.
  • Vínsmökkun í Neustift klaustrinu ca € 10.
  • Kláfur upp á Seiseralm ca € 17.

Kort af ferðinni

FerðalýsingPrenta ferðalýsingu

8. júní | Flug til Mílanó & næturgisting

Brottför frá Keflavík kl. 13:55. Mæting í Leifsstöð í síðasta lagi 2 klst. fyrir brottför. Lending í Mílanó kl. 19:40 að staðartíma og ekið sem leið liggur á hótel í nágrenni Mílanó þar sem gist er í eina nótt.

9. júní | Riva del Garda & Brixen

Nú verður stefnan tekin á Brixen sem verður okkar sælureitur í þessari ferð. Á leiðinni þangað verður komið til Riva del Garda sem er einn fallegasti bærinn við Gardavatn. Upplagt að skoða sig um í þessum snotra bæ, ganga litlar og þröngar götur hans, staldra við í verslunum, rölta undir pálmatrjám meðfram ströndinni eða skondra upp að virkinu Bastillione þaðan sem er einstakt útsýni yfir vatnið og góður veitingarstaður. Eftir það heldur ferð áfram til Brixen sem er umvafin Alpafjöllunum í Eisackdalnum. Þar verður gist í sex nætur á góðu hóteli í miðbænum. Þar er inni- og útisundlaug, heilsulind, líkamsrækt, tyrknest bað, sauna og nuddpottur. Eftir góðan kvöldverð förum við í göngu um bæinn sem er höfuðstaður Eisackdalsins og liggur við rætur fjallsins Plose.

10. júní | Stórbrotin náttúrufegurð Dólómítafjallanna

Dólómítarnir eru án efa einn frægasti fjallgarður Alpanna. Stórbrotin náttúrufegurð, sögulegt mikilvægi og sérstæð menning eru ástæður þess að fjallgarðurinn var tekin á heimsminjaskrá UNESCO. Héðan verður haldið til fjalla og ekið um stórkostlegt landslag Dólómítanna. Farið verður með kláf upp á Pordoi í ca 3.000 m hæð, þaðan er mikilfenglegt útsýni yfir ítölsku-, austurrísku- og svissnesku Alpana, sem enginn má láta framhjá sér fara. Einnig verður ekið hjá Rosengarten tindunum sem eru á milli Fassatal dalsins og Tierser dalsins.

Opna allt

11. júní | Merano, klaustrið Neunstift & vínsmökkun

Í þessari töfrandi og skemmtilegu borg, Merano, mætast ólíkir menningarheimar Ítalíu og Austurríkis og segja má að hér finnist það besta frá báðum löndum. Borgin var áður fyrr höfuðborg Tírólahéraðs í Austurríki en blómatími hennar var síðan á 19. öld. Þá varð bærinn þekktur sem heilsubær en heitar lindir eru á svæðinu. Hér er loftslagið sérlega milt og því eru frjósöm ávaxtahéruð allt í kringum borgina. Miðbærinn er yndislegur, með skemmtilegum, þröngum götum, yfirbyggðum súlnagöngum, glæstum byggingum og iðandi mannlífi og við ætlum að njóta þess. Eftir það verður ekið í átt að Brixen en þar í nágrenni er Neustift klaustrið, sem var stofnað á 12. öld, með fallegri barokkkirkju, gotneskum krossgangi, kraftaverkabrunni, heilmiklu bókasafni og listasafni. En þeir þekkja líka til vínræktar hér í klaustrinu og eiga eina mikilvægustu vínekru héraðsins. Þar verður farið í skemmtilega vínsmökkun með snarli í vínkjallara klaustursins.

12. júní | Plose heimafjallið & Brixen

Dýrðarinnar dagur verður á Plose fjalli í dag, heimafjalli þeirra í Brixen sem er 2542 m á hæð. Hótelið býður öllum með kláf upp á fjallið þar sem náttúrufegurðin umvefur okkur og ómótstæðilegt útsýni er þaðan yfir Eisackdalinn og Alpafjöllin. Fáum okkur létta göngu uppi og njótum friðsældar og fjallanna í allri sinni dýrð. Einnig er upplagt að fá sér hádegishressingu uppi áður en farið er til baka. Það sem eftir er dags gefst frjáls tími til að njóta sælunnar í Brixen. 

13. júní | Frjáls dagur til að njóta í Brixen

Í Brixen, þessum 20.000 manna yndislega bæ, finnast gamlar götur, brýr, kirkjur og söfn. Þar mætast árnar Eisack og Rienz sem ásamt umlykjandi vínekrum og aldingörðum gera Brixen að einstaklega heillandi og fallegum stað. Nú verður frjáls dagur til að njóta og næra sál og líkama. Upplagt er að skoða bæinn betur og líta inn á kaupmenn bæjarins sem geta verið ansi líflegir. Einnig er upplagt að nota þá glæsilegu aðstöðu sem hótelið býður upp á.

14. júní | St. Ulrich & Seiseralm

Glæsilegur dagur í bænum St. Ulrich í dalnum Val Gardena (Grödner dal) sem rómaður er fyrir fegurð og heimsþekktur fyrir tréútskurðarlistaverk. Einnig er hann fæðingarbær Sigurðar Dementz óperusöngvara og kennara, leikarans Luis Trenker og popp tónskáldsins Giorgio Moroder. Eftir ljúfan tíma þar verður farið með kláf upp á Seiser alm sem er hæsta hálendisslétta Evrópu og tilheyrir Dólómítum Ítalíu og ekki að undra að hluti Everest kvikmyndarinnar hafi verið tekin upp á þessum slóðum. Upplifum þar stórkostlegt útsýni yfir Alpafjöllin og eru þau í senn róandi og endurnærandi. Við gefum okkur góðan tíma til að rölta þar um og auðvitað fáum við okkur hressingu og njótum tilverunnar.

15. júní | Heimferð frá Mílanó

Það er komið að heimferð eftir þessa yndislegu og ljúfu daga í Brixen. Eftir góðan morgunverð munum við aka til heimsborgarinnar Mílanó. Byrjað verður á að fara í stutta skoðunarferð um þessa fögru borg áður en frjáls tími verður gefinn. Þá er hægt að skoða borgina á eigin vegum t.d. dómkirkjuna sem er eitt af meistaraverkum gotneskrar byggingarlistar. Hægt er að fara upp á þak kirkjunnar en þaðan er fagurt útsýni yfir borgina. Einnig mætti líta inn á kaupmenn borgainnar sem eru ófáir. Upplagt að fá sér létta hressingu áður en ekið er út á flugvöll í Mílanó. Brottför þaðan kl. 20:40 og lent í Keflavík kl. 22:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir