Alpafegurð Ítalíu

Í þessari töfrandi og skemmtilegu borg, Meran, mætast ólíkir menningarheimar Ítalíu og Austurríkis og segja má að hér finnist það besta frá báðum löndum. Borgin var áður fyrr höfuðborg Tírólahéraðs í Austurríki en blómatími hennar var á 19. öld. Þá varð bærinn þekktur sem heilsubær en heitar lindir eru á svæðinu. Hér er loftslagið sérlega milt og því eru frjósöm ávaxtahéruð allt í kringum borgina. Miðbærinn er yndislegur, með skemmtilegum, þröngum götum, yfirbyggðum súlnagöngum, glæstum byggingum og iðandi mannlífi.

Dýrðarinnar dagur verður á Plose fjalli í dag, heimafjalli þeirra í Brixen sem er 2542 m á hæð. Hótelið og bærinn bjóða öllum frítt með kláfi upp á fjallið þar sem náttúrufegurðin umvefur okkur og ómótstæðilegt útsýni er yfir Eisackdalinn og Alpafjöllin. Fáum okkur létta göngu og njótum friðsældar og fjallanna í allri sinni dýrð. Eftir það verður ekið að Neustift klaustrinu sem var stofnað á 12. öld, með fallegri barokkkirkju, gotneskum krossgangi, kraftaverkabrunni, heilmiklu bókasafni og listasafni. Farið verður í stutta skoðunarferð um klaustrið og einnig þekkja þeir líka til vínræktar hér í klaustrinu og eiga eina mikilvægustu vínekru héraðsins. Eftir stutta skoðunarferð verður farið í skemmtilega vínsmökkun með snarli í vínkjallara klaustursins.

Trento borg í Trentino héraði tekur á móti okkur í allri sinni dýrð. Borgin er hrífandi en hún er þekktust fyrir miðalda biskupahöllina Castello del Buonconsiglio með sínum töfrandi freskum. Dómkirkjan með fræga rósaglugganum og glæstar, myndskreyttar byggingar prýða borgina. Á göngu okkar ber margt fyrir augu en eftir stutta skoðunarferð, frjálsan tíma og hádegishressingu kveðjum við borgina. Á leið okkar um frægu vínleiðina í Suður-Tíról umvefur náttúrufegurð og vínakrar okkur á leið um Tramine. Ferðin heldur áfram að Kaltern og vatninu Kalterersee þar sem upplagt er að taka myndastopp. Endum svo á því að aka hjá bænum Eppan og aftur til Brixen.

Glæsilegur dagur í bænum St. Ulrich í dalnum Val Gardena (Grödner dal) sem rómaður er fyrir fegurð og heimsþekktur fyrir tréútskurðarlistaverk. Einnig er hann fæðingarbær Sigurðar Dementz óperusöngvara og kennara, leikarans Luis Trenker og popptónskáldsins Giorgio Moroder. Eftir ljúfan tíma þar verður farið með kláfi upp á Seiser alm sem er hæsta hálendisslétta Evrópu og tilheyrir Dólómítum Ítalíu. Það er ekki að undra að hluti Everest kvikmyndarinnar hafi verið tekin upp á þessum slóðum. Upplifum þar stórkostlegt útsýni yfir Alpafjöllin en þau eru í senn róandi og endurnærandi. Við gefum okkur góðan tíma til að rölta þar um og auðvitað fáum við okkur hressingu og njótum tilverunnar.

Nú verður frjáls dagur til að njóta og næra sál og líkama. Upplagt er að skoða Brixen betur og líta inn á kaupmenn bæjarins sem geta verið ansi líflegir. Einnig er upplagt að nota þá glæsilegu aðstöðu sem hótelið býður upp á.

Það er komið að heimferð eftir þessa yndislegu og ljúfu daga í Brixen. Eftir morgunverð munum við aka til heimsborgarinnar Mílanó. Byrjað verður á að fara í stutta skoðunarferð um þessa fögru borg áður en frjáls tími verður gefinn. Þá er hægt að skoða borgina á eigin vegum, t.d. dómkirkjuna sem er eitt af meistaraverkum gotneskrar byggingarlistar. Hægt er að fara upp á þak kirkjunnar en þaðan er fagurt útsýni yfir borgina. Einnig mætti líta inn á kaupmenn borgainnar sem eru ófáir. Upplagt að fá sér hressingu áður en ekið er út á flugvöll í Mílanó. Brottför þaðan kl. 22:35 og lent í Keflavík kl. 00:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.