Aðventuljómi í Leipzig & Berlín

Við hefjum þessa aðventuferð í menningarborginni Leipzig sem var og er miðpunktur tónsmíða, tónlistar og verslunar. Borgin hefur einstakt aðdráttarafl og margir segja borgina vera hinu nýju Berlín.

Við förum í dagsferð til Dresden, höfuðborgar Saxlands sem tekur á móti okkur með einum elsta aðventumarkaði landsins. Angan af jólaglöggi og ristuðum möndlum svífur yfir og er í hugum margra hinn eini sanni fyrirboði hátíðarinnar sem nálgast. Borgin varð á 15. öld aðsetur Wettiner-furstanna en meðal afkomanda þeirra var Ágúst sterki sem átti stóran þátt í að gera Dresden að þeirri fallegu borg sem kölluð var Flórens við ána Saxelfi. Seinni hluta ferðarinnar dveljum við í höfuðborginni Berlín en á leiðinni þangað verður komið við í Dessau, hjarta Bauhaus byggingarlistarinnar sem einmitt fagnar 100 ára afmæli 2019. Berlín hefur upp á ótal margt að bjóða en þangað sækja margir menningarþyrstir og er borgin aðdráttarafl listamanna hvaðanæva úr heiminum. Við höldum í skemmtilega skoðunarferð um þessa stórbrotnu borg þar sem það markverðasta verður skoðað. Hér ríkir sannur jólaandi og má finna jólamarkaði víðsvegar um borgina þar sem upplagt er að ylja sér með heitan drykk og njóta lífsins í sannri jólastemningu. 

Verð á mann í tvíbýli 159.900 kr.

Aukagjald fyrir einbýli 18.800 kr.


Innifalið

  • 6 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hóteli.
  • Allar skoðunarferðir með rútu samkvæmt ferðalýsingu.
  • Íslensk fararstjórn.


 

Ekki innifalið

  • Aðgangseyrir inn í söfn, hallir og kirkjur.
  • Siglingar og vínsmökkun.
  • Hádegisverðir.
  • Þjórfé.

Valfrjálst

  • Meissen postulínssafnið ca. € 7.
  • Vínsmökkun ca. € 12.

Kort af ferðinni

FerðalýsingPrenta ferðalýsingu

3. desember | Flug til Berlínar & Leipzig

Brottför frá Keflavík kl. 7:40. Mæting í Leifsstöð í síðasta lagi 2 klst. fyrir brottför. Lent í Berlín kl. 12:05 að staðartíma. Frá Berlín verður ekið til Leipzig og má gera ráð fyrir að sú ferð taki um 2 klst. Gistum næstu 3 nætur á vel staðsettu 4* hóteli. 

4. desember | Skoðunarferð um Leipzig

Stórskáld Þjóðverja, Johann Wolfgang von Goethe, kallaði Leipzig sína litlu París í hinum þekkta harmleik Faust. Þar átti hann við hversu framsækin Leipzig var og hversu hratt hún stefndi í átt til stórborgar strax á 19. öld. Miðborg Leipzig er einstaklega falleg og í skoðunarferð verður farið um alla helstu sögustaði borgarinnar. M.a. í Tómasarkirkjuna þar sem Johann Sebastian Bach var lengst af organisti og tónlistarstjóri. Einnig skoðum við hinn stórkostlega minnisvarða Völkerschlachtdenkmal um bardagann mikla milli hers Napóleons og herja Rússa og Prússlands árið 1813. Hin þekkta Nikolai kirkja sem var miðstöð andófshreyfingarinnar verður heimsótt en þar er hægt að skoða ýmsa muni sem minna á dagana fyrir fall múrsins. Leipzig er einnig kölluð borg hetjanna, fyrir að gegna leiðandi hlutverki í friðarbyltingunni árið 1989 sem leiddi til sameiningu Þýskalands. 

5. desember | Dagsferð til Dresden

Dresden stendur við ána Saxelfi, en norðurbakki hennar er einstakur á að líta. Stórkostlegar byggingar og upp úr standa turnar halla, kirkna og opinberra bygginga. Ótrúlegt er að ímynda sér að borgin hafi nánast verið þurrkuð út í loftárásum bandamanna árið 1945. Miklum menningarverðmætum hafði verið komið í skjól áður og hefur verið komið fyrir á ný í glæsilegum söfnum borgarinnar. Dresden er þekkt fyrir stórkostleg listasöfn, hallir og hið fræga óperuhús Semper. Gegnt þessum klassíska hluta borgarinnar er hin nýja Dresden þar sem er að finna fjöldann allan af fjölbreyttum veitinga- og kaffihúsum, verslunum og eitt líflegasta næturlíf í austurhluta Þýskalands. Í Dresden er auðvitað fallegur og vinsæll jólamarkaður og er borgin þekkt fyrir Dresdner Christstollen, ávaxtajólabrauðið. Við skoðum markverðustu byggingarnar og listaverk í skoðunarferð um borgina en síðan gefst frjáls tími til að kanna umhverfið og njóta lífsins. 

Opna allt

6. desember | Dessau & Berlín

Nú höldum við til Berlínar þar sem gist verður næstu 2 nætur. Á leið okkar þangað stoppum við í Dessau en hún er t.a.m. hjarta Bauhaus byggingarlistarinnar sem fagnar einmitt 100 ára afmæli á þessu ári. Þar skoðum við mjög áhugaverðan kafla í sögu hönnunar og byggingarlistar. Þeir sem vilja geta skoðað nýtt og alveg magnað Bauhaus safn. Eftir að komið er til Berlínar síðdegis mun fararstjórinn kynna nánasta umhverfi Alexanderplatz torgsins, þar sem er upplagt að ylja sér á Glühwein jólaglöggi á fallegum jólamarkaði þessa sögufræga torgs. 

7. desember | Berlín

Við hefjum daginn á 3 klst. skoðunarferð um Berlín og verður litið á öll þekktustu kennileiti borgarinnar. Þar má nefna Brandenborgarhliðið, breiðgötuna Unter  den Linden, þinghúsið Reichstag, rústir af Berlínarmúrnum, Potsdamer Platz og sögufrægu kirkjuna, Kaiser-Wilhelm-Gedächtniskirche í vesturhluta borgarinnar. Eftir skoðunarferðina er upplagt að fá sér léttan hádegisverð á einum af hinum fjölmörgu veitingastöðum borgarinnar. Einnig gefst  tími til að kanna nánar á eigin vegum eitthvað af því sem fyrir augu bar í skoðunarferðinni, rölta um borgina, fara á söfn, setjast inn á kaffihús og skoða mannlífið. Borgin er kraumandi suðupottur fjölmargra menningarheima, enda menning og listir í hávegum hafðar. Þetta endurspeglast í listalífi borgarinnar og safnaflóru. Glæsilegar verslanir og ljósum prýddar verslunargötur laða að. Það er einstakur andi í Berlínarborg og hún er alveg sérstaklega aðlaðandi á aðventunni með hinum fjölmörgu undurfögru jólamörkuðum. 

8. desember | Heimferðardagur

Flogið heim kl. 13:05. Lent í Keflavík kl. 15:40 að íslenskum tíma.

Fararstjóri getur fært dagskrárliði á milli daga eftir þörfum.

Myndir úr ferðinni

Fararstjórn

Kristín Jóhannsdóttir

Kristín Jóhannsdóttir er fædd árið 1960 og uppalin í Vestmannaeyjum.  Eftir stúdentspróf frá MH lá leiðin til Noregs, en Kristín bjó í Osló og vann á skrifstofu Flugleiða í tvö ár. Eftir það fluttist hún til Þýskalands, en hún hefur búið bæði í austur og vesturhlutanum þ.e. Freiburg, Berlín, Leipzig og Frankfurt í 20 ár. Kristín stundaði nám í Freiburg, Berlín og Leipzig og lauk Magisterprófi í bókmenntum og sagnfræði árið 1991 frá Frei Universität í Berlín.

Í bændaferðunum okkar svokölluðu er farið í einstaklega áhugaverðar rútuferðir um Evrópu og Kanada með fyrsta flokks íslenskum fararstjóra. Okkar markmið er að farþegar okkar öðlist einstaka ferðaupplifun á spennandi áfangastöðum í frábærum félagsskap. Rútuferð með Bændaferðum er afar góður kostur fyrir þá sem vilja fara í áhyggjulaust ferðalag. Í þeim er farið á milli staða þægilegri rútu, ljúffengur matur er í boði - borðaður í skemmtilegum félagsskap, svo ekki sé minnst á fararstjórann sem veitir mikið öryggi. Bændaferðirnar hafa einnig þá sérstöðu að óvenju mikið er innifalið í þeim; flug, flugvallagjöld og skattar, gisting í tveggja manna herbergi með baði, allar skoðunarferðir með rútu og hálft fæði. Oft skapast mikill vinskapur á milli ferðafélaganna í þessum ferðum og minningarnar sem skapast eru óteljandi. 

 
Finndu draumaferðina þína hjá Bændaferðum!

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir