Aðventufögnuður í Filzmoos

Þessi aðventuferð til Salzburgerlands í Austurríki er sérlega heillandi enda skarta borgir og bæir þar sínu fegursta á þessum árstíma. Ilmur frá jólaglöggi og piparkökum svífur um en ferðin hefst í fjallaþorpinu Filzmoos sem er yndislegur bær. Þaðan höldum við í skemmtilegar skoðunarferðir, m.a. til Salzburg sem er ein af perlum Austurríkis, í töfrandi ferð til St. Gilgen og í hrífandi siglingu til bæjarins St. Wolfgang við Wolfgangsee. Við upplifum rómantíska hestasleðaferð upp í Hofalmen fjallaselið í 1.300 metra hæð þar sem við gæðum okkur á jólakræsingum. Aðventublærinn er áþreifanlegur í Hallstatt við Hallstättersee sem er einn fallegasti staður Salzkammergut héraðsins en bærinn og umhverfi hans er varðveitt á heimsminjaskrá UNESCO. Jólaævintýrið endar í München, höfuðborg Bæjaralands, þar sem aðventudýrðin er einstök. 

Verð á mann 219.900 kr.

Aukagjald fyrir einbýli 24.900 kr.


Innifalið

  • 8 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Hestasleðaferð upp í Hofalmen fjallasel.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Siglingar.
  • Hádegisverðir.
  • Þjórfé.

Valfrjálst

  • Sigling á Wolfgangsee vatni ca. € 11.
  • Kláfur upp í kastalann Hohensalzburg ca. € 15.

Kort af ferðinni

FerðalýsingPrenta ferðalýsingu

29. nóvember | Flug til München & Filzmoos

Brottför frá Keflavík kl. 7:20. Mæting í Leifsstöð um 2 klst. fyrir brottför. Lending í München kl. 12:05 að staðartíma. Þaðan verður ekin falleg leið til Austurríkis, þar sem gist verður í 5 nætur í litla bænum Filzmoos í Salzburgerlandi. Dásamleg fjalladýrð umlykur hótelið. Á sumrin stundar fólk hér fjallgöngur og skíði á veturna. Á hótelinu er heilsulind og innisundlaug.

30. nóvember | Aðventudýrð í Salzburg & Mozart

Í dag ætlum við að heimsækja hina undurfögru borg Salzburg, sem er sérlega heillandi á aðventunni. Borgin, sem er þekktust sem fæðingarborg Mozarts, er líka fræg fyrir mikilfenglegar byggingar í barokkstíl. Við hefjum heimsóknina á stuttri göngu, förum í gegn um Mirabellgarðinn og göngum eftir Getreidegasse, en hún er  með elstu og þekktustu götum borgarinnar. Þar er að finna mjög áhugavert Mozartsafn. Gaman er að koma upp í kastalann Hohensalzburg, en hluti kvikmyndarinnar Söngvaseiður eða Sound of Music var hér tekinn upp. Hér er líka einn af fjölmörgum aðventumörkuðum borgarinnar. Falleg sýn er héðan yfir borgina, Salzburgerland og stórfenglegt umhverfi Alpanna í kring. Aðventudýrðin blasir hvarvetna við í borginni og auðvita gefst tími til að kanna mannlíf borgarinnar á eigin vegum og líta inn á kaupmenn.

1. desember | St. Wolfgang & sigling á Wolfgangsee til St Gilgen

Bærinn St. Wolfgang við samnefnt vatn er ævintýralega fallegur bær sem áður var mikilvægur áfangastaður pílagríma. Bærinn hefur frá alda öðli tekið á móti gestum og enn í dag eru fjölmargir sem koma hingað til að njóta dýrðarinnar sem á aðventunni er einstakt augnayndi. Bærinn er ótrúlega fallega skreyttur og sérstaka athygli vekur upplýst, stór jólabjalla út á vatninu. Eftir ljúfa stund í bænum verður farið í töfrandi siglingu til fallega smábæjarins St. Gilgen sem er ekki síður aðlaðandi. Þar er snotur aðventumarkaður inn á milli litríku litlu húsanna. Eftir góða stund þar verður ekið til baka á hótel.

Opna allt

2. desember | Filzmoos & hestasleðaferð upp í Hofalmen fjallasel

Morguninn notum við til að kanna umhverfið í þessum litla bæ á skemmtigöngu, og eftir gönguna er tilvalið að taka daginn rólega og njóta aðstöðunnar á heilsulind  hótelsins. Jólamarkaðurinn í bænum opnar kl. 14.00. En síðdegis er komið að miklu ævintýri. Hestasleðar flytja okkur upp í Hofalmen fjallasel í 1.300 m hæð en þessi töfrandi sleðaferð tekur um klukkutíma. Þegar upp er komið verður farið í ævintýragöngu að Almsee vatninu en gönguleiðin er upplýst með kyndlum og gangan tekur liðlega 30 mínútur. Eftir töfrandi göngu um upplýsta ísskúlptúruna er upplagt að fá sér jólaglögg og smákökur.

3. desember | Aðventutöfrar í Hallstatt & Hallstättersee

Að morgunverði loknum verður ekin falleg leið í rólegheitum til bæjarins Hallstatt. Bærinn og landsvæðið umhverfis hann var skráð á heimsminjaskrá UNESCO árið 1996. Þetta er yndislegur bær sem gaman er að rölta um og dýrðin mikil hvert sem litið er. Við lítum m.a. inn í kirkjuna, sem er með mjög merkilegu, útskornu altari frá árinu 1520 og skoðum hauskúpu grafhýsið sem tengt er kirkjunni. Að því loknu gefst drjúgur tími til að njóta þess að vera á þessum dásamlega stað áður en aftur verður ekið á hótelið.

4. desember | Skoðunarferð um München & Marienplatz

Eftir góðan morgunverð er komið að því að kveðja þennan yndislega bæ, Filzmoos. Nú verður stefnan tekin á München, höfuðborg Bæjaralands. Þegar komið verður til þangað verður farið í stutta skoðunarferð um borgina þar sem ekið verður um helstu staði borgarinnar m.a. að Ólympíusvæðinu sem var byggt fyrir Ólympíuleikana 1972 og BMW byggingunni og safninu. Einnig verður farið að Maximilianeum, sem er þinghús Bæjaralands, gamla og nýja Pinakothek listasafninu, Wittelsbacher brunninum og Viktualienmarkt, sem er aðalmarkaður borgarinnar. Endum við þessa skoðunarferð á Marienplatz þar sem aðalaðventumarkaðurinn er og fáum okkur saman jólaglögg og upplifum aðventustemninguna í borginni áður en ekið verður á hótel þar sem gist verður í 2 nætur.

5. desember | Frjáls dagur í München

Í dag er frjáls dagur til að skoða sig betur um og líta inn til kaupmanna borgarinnar.  München er heillandi á þessum tíma með aðventuskreytingum, jólamörkuðum, kirkjum, söfnum, mjög skemmtilegum verslunargötum og óteljandi notalegum veitinga- og kaffihúsum með töfrandi jólastemningu. 

6. desember | Kveðjustund & heimferð

Þá er þetta aðventuævintýri á enda. Ekið verður út á flugvöll í München en brottför þaðan er Kl. 13:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00