Aðventuævintýri í Filzmoos

Aðventustemning og ljósadýrð lætur ekki á sér standa í landi Berchtesgaden sem er eitt eftirsóttasta ferðamannasvæði Þýskalands. Það er rómað fyrir fegurð og státar af einstakri náttúrufegurð og fræga fjallinu Watzmann við Königssee. En nú bíður Berchtesgaden eftir okkur með glæstri konungshöll. Dýrðin er mikil á aðventunni og hér gefum við okkur góðan tíma til að kanna líf bæjarbúa. Við njótum samverunnar á þessum fagra stað en bærinn er sérlega fallegur, með myndskreyttum húsum, verslunum og fjöldanum öllum af skemmtilegum kaffi- og veitingahúsum. Ekki má gleyma jólamarkaðnum sem býður upp á þjóðlegt handverk og ýmislegt sem hrífur augað.

Að morgunverði loknum verður ekin falleg leið í rólegheitum til bæjarins Hallstatt. Bærinn og landsvæðið umhverfis hann var skráð á heimsminjaskrá UNESCO árið 1996. Þetta er yndislegur bær sem gaman er að rölta um og dýrðin mikil hvert sem litið er. Við lítum m.a. inn í kirkjuna, sem er með mjög merkilegu, útskornu altari frá árinu 1520 og skoðum heimsþekkt grafhýsi hauskúpa sem tengt er kirkjunni. Að því loknu gefst drjúgur tími til að njóta þess að vera á þessum dásamlega stað áður en aftur verður ekið á hótelið.

Í hjarta Salzkammergut svæðisins, umvafin ánum Traun og Ischl, liggur bær heilsulindanna, Bad Ischl. Strax á 19. öld heilluðust hjónin Franz Joseph keisari Habsborgara og Elisabeth „Sisi“ af bænum, dásamlegri staðsetningu og náttúrufegurðinni allt um kring. Á rólegri göngu um bæinn, sem þekktur er undir nafninu „Keisaraborgin“, upplifum við konunglega fortíð hennar en margar aðrar þekktar persónur sóttu borgina heim og gerðu hana að hjarta heimsborgara í Austurríki. Dýrðin er mikil í borginni á aðventunni og við ætlum að njóta til fulls alls þess sem hún býður upp á, á töfrandi jólamarkaði en einnig gefst góður tími til að líta inn á kaupmenn borgarinnar og auðvitað er mikið af keisaralegum kaffi- og veitingahúsum sem gaman er að kíkja á.

Morguninn notum við í að kanna umhverfið í þessum litla bæ á skemmtigöngu en annars er tilvalið að taka daginn rólega og njóta aðstöðunnar á heilsulind hótelsins. Síðdegis er komið að miklu ævintýri. Hestasleðar flytja okkur upp í fjallaselið Unterhofalm í 1.300 m hæð yfir sjávarmáli en þessi töfrandi sleðaferð tekur um klukkutíma. Þegar upp er komið verður farið í ævintýragöngu að Almsee vatninu en gönguleiðin er upplýst með kyndlum og gangan tekur liðlega 30 mínútur. Eftir töfrandi göngu um upplýsta ísskúlptúra er upplagt að fá sér jólaglögg og smákökur.

Þá er þetta aðventuævintýri á enda. Ekið verður út á flugvöll í München en brottför þaðan er kl. 13:05 og lending í Keflavík kl. 16:00 að staðartíma. 

Fararstjóri getur fært dagskrárliði á milli daga eftir þörfum.