Vordagar í Madríd & Valencia

Eftir áhugaverða og skemmtilega daga í Madríd höldum við áleiðis til Valencia. Á leiðinni stoppum við í hinni fornu borg Toledo sem stendur við bakka Tagus árinnar sem er sú lengsta á Íberíuskaganum. Borgin er í sjálfstjórnarhéraðinu Castilla-La Mancha en þetta landbúnaðarsvæði er fámennasta svæði Spánar með innan við tvær milljónir íbúa. Hálendi þessa svæðis var einmitt sögusvið skáldsögunnar um riddaraævintýri Don Kíkóta frá La-Mancha. Borgin Toledo, sem er á heimsminjaskrá UNESCO, liggur í 450 metra hæð og er m.a. þekkt fyrir arabíska og kristna minnisvarða frá miðöldum. Útsýnið frá efsta hluta borgarinnar yfir hlykkjótta Tagus ána er mikilfenglegt. Þetta svæði blómstraði á tímum Rómverja og á vegi okkar verður hin forna Alcántara brú en hún var byggð yfir Tagus ána á tímum Rómverja. Við komum til Valencia þar sem gist verður í fimm nætur. Kvöldverður á hóteli.

Dagurinn hefst á því að kynnast þessari yndislegu borg, Valencia, sem oft er kölluð borg paellunnar, en paella er einn af þekktustu réttum spænskrar matargerðar. Við byrjum á þægilegri rútuferð þar sem við fræðumst um sögu þessarar lista- og vísindaborgar. Hér sjáum við heillandi byggingar frá gotneska- og barrokktímabilinu í bland við módernískar. Við förum einnig í gönguferð um gamla bæinn þar sem við skoðum meðal annars Dómkirkju hins heilaga kaleiks. Eftir það gefst frjáls tími til að skoða sig betur um og þá er tilvalið að fara að gömlu silkikauphöllinni, La Lonja, sem er frá 15. öld og skráð á heimsminjaskrá UNESCO. Einnig er hægt að skoða enn betur fallega miðbæjarkjarnann sem á sér meira en 2000 ára sögu, áhugaverð söfnin eða útivistarsvæðið Río Turia með margverðlaunuðu sjávarlífssafninu. Fyrir áhugasama er upplagt að kanna úrval paellu á veitingastöðum borgarinnar. Kvöldverður á eigin vegum.

Eftir góðan morgunverð höldum við í náttúruþjóðgarðinn Albufera, sem er um 2.800 hektara ferskvatnssvæði, það stærsta á Spáni. Hér eiga yfir 300 fuglategundir athvarf allt árið um kring og þá sérstaklega vatnafuglar, þeirra á meðal flamingó fuglinn. Til að upplifa þessa miklu vatnaperlu og komast örlítið nær fuglalífinu förum við í bátsferð og njótum ógleymanlegrar náttúrufegurðar. Eftir bátsferðina höldum við í heimsókn til eins af þekktustu vínsvæðum héraðsins þar sem við fræðumst um tegundir vínberjanna og sögu vínræktunarinnar. Hápunkturinn verður að sjálfsögðu smökkun á afurðunum ásamt dæmigerðum tapasréttum. Kvöldverður á hóteli.

Í dag heimsækjum við Sagunto sveitarfélagið sem er staðsett norður af Valencia, nálægt Costa del Azahar við Miðjarðarhafið. Sagunto er m.a. þekkt fyrir rómverska leikhúsið frá 50 e. Kr. en gamli bærinn, með sínum litlu og þröngu hliðargötum, og gyðingahverfið, sem staðsett er í elsta hlutanum, eru einkar sjarmerandi. Hver gatan á fætur annarri er þrungin sögu. Hér hafa Íberíumenn og Rómverjar komið við og bærinn var á landamærum kristinna manna og múslima á tímum miðalda. Kastalinn sem gnæfir yfir bænum er vitni um hernaðarlegt mikilvægi svæðiðsins og þaðan er gott útsýni yfir Miðjarðarhafið. Við höldum síðan áfram að hellinum Coves de Sant Josep og förum þar í siglingu á neðanjarðará þar sem við dáumst að tilkomumiklum hellamálverkum og dropasteinshellum. Á leiðinni til baka heimsækjum við hinn fallega náttúrugarð Sierra Calderona þar sem gefur að líta stórkostlegt landslag, hrjóstrug fjöll, djúpa dali, þétta skóga og fjölskrúðugt dýralíf. Kvöldverður á hóteli.

Fjallaþorpið Guadalest er undurfagurt og stendur á fjalli með óborganlegu útsýni yfir fjöllin í kring, Guadalest dalinn fyrir neðan og fagurblátt uppistöðulónið sem þar stendur. Efst í þorpinu trónir kastali sem byggður var af Márum á 11. öld, en skipulag þorpsins er í dæmigerðum stíl Mára með sínum mjóu hlykkjóttu götum. Í gamla bænum eru göturnar steini lagðar, húsin kalkborin og lítil torg inn á milli. Í Guadalest eru lítil áhugaverð söfn og verslanir með handverki og matvöru. Hægt er að fara í stutta gönguferð í þjóðgarðinum eða einfaldlega njóta staðar og stundar í þessum fallega bæ. Kvöldverður á eigin vegum.

Nú er yndisleg ferð senn á enda. Við höldum til Alicante og fljúgum þaðan heim til Keflavíkur. Áætluð brottför frá Alicante er kl. 17:35 og áætluð lending í Keflavík er kl. 20:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.