Írland - eyjan græna

Í dag förum við svonefndan Kerry hring sem að ýmsu leyti má líkja við gullna hringinn hér heima því hann þykir ómissandi á ferðalagi um vesturhluta Írlands. Á leiðinni verða á vegi okkar hugguleg þorp eins og t.d. Milltown, Killorglin, Cahersiveen, Sneem og Waterville, uppáhalds sumardvalarstaður Charlie Chaplin. Farið verður yfir fjöllin, litið yfir landið frá útsýnisstaðnum Ladies view og haldið niður að Killarney vötnunum og samnefndum bæ en svæðið er einn fjölsóttasti ferðamannastaður Írlands.

Þennan dag er förinni heitið út á hrjóstrugan og vogskorinn Dingle skagann. Sumir fornleifafræðingar halda því fram að fáir staðir í Vestur-Evrópu geymi eins merkar og fjölbreyttar fornminjar og hér finnast. Á þessum slóðum er mannlíf talið hafa þrifist í nærri 6000 ár. Við njótum þess að aka hring um skagann, skoða okkur um og staldra við í Dingle bænum eða á útsýnisstöðum. Förum einnig á afar áhugaverða fálkasýningu þar sem við sjáum m.a. hauka, uglur, erni og fálka leika listir sínar. Á Fahan svæðinu á vestanverðum skaganum finnast sérkennileg kúluhús úr steini sem flest eru talin vera frá 12. öld en eiga sér mun eldri fyrirmyndir. Við Dunmore höfða á vesturströndinni liggja í fjörunni leifar flaksins af Rangá sem missti vélarafl í miklum stormi árið 1982. Skipið var leiguskip Hafskipa og var í jómfrúarferðinni til Íslands frá Spáni. Suðvestast á nesinu er magnað útsýni yfir á Blasket eyjarnar. Frá Dingle höldum við aftur til Tralee.

Í dag er stefnan tekin á hafnarbæinn Cobh en þaðan héldu margir Írar á vit betra lífs í Vesturheimi þegar þrengdi að heima. Þaðan fór Titanic í sína hinstu för. Við höldum svo til Midleton og skoðum þar viskíverksmiðjuna þar sem Jameson er búið til ásamt fleiri viskítegundum. Saga viskígerðar á Írlandi er löng og merkileg og henni fáum við að kynnast í gömlu viskígerðinni sem nú er safn. Þeir sem vilja geta fengið að smakka á þessari heimsþekktu framleiðslu. Gistum í tvær nætur í Midleton sem er í Cork sýslu.

Eftir morgunverð höldum við til Cork sem er næst stærsta borg Írlands. Við göngum saman um steinlagðar götur miðbæjarins en eftir það gefst frjáls tími til að skoða sig um á eigin vegum, líta á líflegt verslunarfólk og setjast á matsölustað eða krá. Gaman er að kíkja á Enska markaðinn sem hefur verið starfræktur frá árinu 1788 og staðið af sér eldsvoða, borgarastyrjöld og tilraunir til nafnabreytinga. Hér er tilvalið að smakka á hefðbundinni írskri matargerð. Seinnipart dags verður haldið til baka á hótel í Midleton.

Nú er stefnan tekin á Dublin þar sem gist verður í eina nótt. Við komuna til Dublin býður fararstjóri upp á gönguferð um borgina. Á vegi okkar verður fjöldi frægra bygginga, svo sem pósthúsið við O´Connell stræti þar sem páskauppreisnin hófst árið 1916, gamla þinghúsið, Trinity háskólinn og kirkja heilags Patreks. Um kvöldið verður boðið upp á írskt skemmtikvöld með kvöldverði, dansi og söng.

Það er komið að heimför. Brottför með Icelandair kl. 14:50 og lending í Keflavík kl. 16:35 að íslenskum tíma.

Fararstjóri getur fært dagskrárliði á milli daga eftir þörfum þegar komið er á staðinn.