Vordagar í Dublin

1. – 5. maí 2019 (5 dagar)

Hér er boðið upp á spennandi ferð til Dublin á Írlandi. Flogið árla dags til höfuðborgar eyjunnar grænu og þar gist í fjórar nætur á nýlegu hóteli í hjarta borgarinnar. Boðið er upp á dagsferð um næsta nágrenni borgarinnar og auðvitað verður borginni sjálfri gerð góð skil. Við förum í dagsferð suður af borginni, skoðum Wicklow fjöllin, smábæinn Avoca og kastalaþorpið Glendalough. Þorp þetta á uppruna sinn á 6. öld þegar kristnir völdu stað fyrir klaustur. Þarna er ótrúlega margt að skoða. Við heimsækjum einn fegursta garð Írlands, Powerscourt, og ökum um einstaklega falleg héruð. Í Dublin verður skoðunarferð og m.a. gengið að pósthúsinu við O´Connell stræti, þar sem páskauppreisnin hófst árið 1916. St. Patrick´s Cathedral verður skoðuð og við sjáum Trinity háskólann. Við göngum að Dublinarkastala, köstum kveðju á Molly Malone og köstum mæðinni í hinu víðfræga Temple bar hverfi. Það er svo indælt að heimsækja St. Stephen´s Green garðinn og hverfa út í guðsgræna náttúruna inn í miðri borg. Að því loknu verður hægt að rölta um götur miðbæjarins, kíkja á kaffi- eða veitingahús og heimsækja kaupmenn.

Verð á mann í tvíbýli 149.900 kr. 

Aukagjald fyrir einbýli 53.600 kr.

Innifalið

  • 5 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgunverður á hótelinu.
  • Kvöldverður fyrsta kvöldið á hótelinu.
  • Allar skoðunarferðir samkvæmt ferðalýsingu.
  • Aðgangseyrir að Powerscourt Estate.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Hádegisverðir og aðrir kvöldverðir fyrir utan fyrsta kvöldið sem er innifalið.
  • Þjórfé.

Valfrjálst

  • Kvöldverður með írskri skemmtidagskrá 2. maí, 7.300 kr. (Taka verður fram þátttöku við bókun í ferðina).
  • St. Patrick ca. € 6.
  • Trinity háskólinn ca. € 10.

Kort af ferðinni

Ferðalýsing

Prenta ferðalýsingu

1. maí | Keflavík - Dublin

Brottför frá Keflavík kl. 7:30 með Icelandair. Mæting í Leifsstöð a.m.k. 2 klst. fyrir brottför. Lent á Dublin flugvelli kl. 10:50 að staðartíma. Við byrjum ferðina á heimsókn í einn elsta og sögufrægasta kastala Írlands, Malahide Castle. Saga hans nær aftur á 12. öld þegar Richard Talbot kom til Írlands og fékk umráð yfir svæði þessu og höfninni sem því tilheyrði. Við skoðum kastalann, fræðumst frekar um sögu hans og ættarinnar sem hér bjó öldum saman. Umhverfis kastalann er fallegur garður sem gaman er að skoða. Hér er hægt að fá sér hressingu áður en áfram verður haldið inn í borg á hótel. Komum okkur fyrir á herbergjum og síðan er frjáls tími það sem eftir er dagsins. Sameiginlegur kvöldverður á hótelinu.

2. maí | Skoðunarferð í Dublin

Farið verður í skemmtilega skoðunarferð um Dublin fyrri hluta dags, m.a. fram hjá frægum byggingum svo sem pósthúsinu við O´Connell stræti, gamla þinghúsinu, Trinity háskólanum, Kirkju heilags Patreks og skoðum stærsta garð innan borgarmarka í Evrópu. Ferðinni lýkur í miðbænum þar sem þeir sem vilja geta skoðað sig um, sest á bekk og notið vorsins í St. Stephen´s Green garðinum eða rölt um miðbæinn og fylgst með götulistamönnunum. Og auðvitað eru verslanir á hverju strái. Þeir sem kjósa geta farið í Trinity háskólann og skoðað hið fræga guðspjallahandrit og þjóðargersemi Íra „Book of Kells“ ásamt mikilfenglegu bókasafni skólans, The Long Room. Áhugasamir geta upplifað ekta írskt kvöld með kvöldverði, dansi og söng.

3. maí | Dagsferð í Powerscourt garðinn & Glendalough

Í þessari dagsferð heimsækjum við Powerscourt garðinn, sem er ein af fallegustu landareignum Írlands og var m.a. nýlega valinn þriðji fallegasti garður í heimi af National Geographic. Landareignin er í eigu Slazenger-fjölskyldunnar sem framleiðir tennis- og golfvörur. Hér njótum við glæsilegra skrúðgarða, skemmtilegra safna og fallegra kaffihúsa. Því næst liggur leiðin til Avoca, lítils þorps sem frægast er fyrir forna myllu sem verið hefur í notkun frá 18. öld. Sú er elsta mylla Bretlandseyja sem enn er í notkun. Við skoðum mylluna og afurðir áður en við snæðum hádegismat. Næst er förinni heitið til Glendalough sem er sögufrægur staður og vagga kristinnar trúar á Írlandi frá 6. öld. Þar reis klaustur og unnu munkar störf sín í sátt og samlyndi við íbúa dalsins. Ótal áhugaverðar byggingar frá fyrri tímum er hér að finna m.a. sérstakan turn, Round Tower, sem við skoðum. Glendalough er einstaklega friðsæll staður sem enn í dag nýtur mikilla vinsælda jafnt heimamanna sem erlendra gesta. Eftir góðan tíma þar verður ekið til baka á hótel í Dublin.

Opna allt

4. maí | Frjáls dagur

Þennan dag gefst tækifæri til að njóta alls þess sem þessi dásamlega borg hefur upp á að bjóða á eigin vegum. Í skoðunarferð gærdagsins bar margt fyrir augu sem jafnvel er vert að gefa meiri gaum í dag. Dublin kastali er til dæmis staður sem gaman er að skoða nánar. Áhugasamir um söfn gætu byrjað daginn á heimsókn á írska þjóðminjasafnið þar sem svo ótal margt er að sjá og skoða, rölta þaðan á listasafnið eða fornleifasafnið. Kaupmenn hafa hreiðrað um sig á Grafton stræti, þar er mikið úrval hvers kyns verslana, veitinga- og kaffihúsa. Í dag er laugardagur og því ljóst að mannlífið í miðbænum er fjörugt langt fram á kvöld. 

5. maí | Heimferðardagur

Það er komið að heimför. Brottför flugs Icelandair er kl. 11:45 og lending í Keflavík kl. 13:05 að íslenskum tíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Gísli Einarsson

Gísli Einarsson hefur unnið ýmiskonar störf, lengst af þó við fjölmiðla. Hann er í dag dagskrárgerðarmaður hjá Ríkisútvarpinu en kemur einnig reglulega fram sem skemmtikraftur á árshátíðum, þorrablótum og hvers kyns skemmtunum. Þá hefur Gísli tekið að sér að staðarleiðsöng fyrir hópa um Vesturland.
 
Gísli er eins og fleiri sveitamenn alinn upp við að menn fari ekki á fjöll nema eiga þangað erindi, annað hvort til að leita sauða eða skjóta rjúpur. Í seinni tíð hefur hann þurft að kúvenda i þeirri afstöðu því hans aðaláhugamál í dag eru fjallgöngur, innanlands sem utan.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir