Hjólað við Gardavatn

Gardavatn eða Lago di Garda á móðurmálinu, hefur lengi verið vinsæll áfangastaður á meðal Íslendinga sem og ferðamanna um allan heim. Við bjóðum nú upp á hjólaferð á þessu fallega svæði, um og við hið sægræna Gardavatn, stærsta stöðuvatn Ítalíu. Það er umvafið ægifögrum fjallgörðum í norðri og Pósléttunni í suðri, loftslagið er milt miðjarðarhafsloftslag og því þrífst t.a.m. ræktun ólífa og sítróna við austur- og suðurbakkann og vín við norðurbakkann. Þetta er einstakur staður þar sem gestir geta notið stórkostlegrar náttúrufegurðar í bland við bæði hreyfingu og afslöppun. Á hjólunum kynnumst við þessu fallega svæði á þægilegum hraða en hjólað verður í gegnum rómantíska bæi og friðsæl þorp á borð við Malcesine, Isera og Rovereto. Á vegi okkar verða frjósamar vínekrur og falleg ólífutré hvert sem litið er. Hjólum einnig um Ledro dalinn, um græn engi og fáum nasaþefinn af lífinu í fjöllunum, með sínum gömlu hefðum eins og tréiðnaði og fjallalandbúnaði. Komum að náttúruverndarsvæði við vatnið Ampola sem er pínulítið og vel falið stöðuvatn. Gist verður á 4* hóteli í bænum Torbole.

Verð á mann 229.900 kr.

Aukagjald fyrir einbýli 22.200 kr.

Athugið að ef til þess kemur að Bændaferðir þurfi að fella niður ferðina er hún endurgreidd að fullu.


Innifalið

  • 8 daga ferð.
  • Flug með Icelandair og flugvallarskattar. 
  • Ferðir á milli flugvallar í Mílanó og hótelsins við Gardavatn.
  • Gisting í tveggja manna herbergi með baði.
  • Morgun- og kvöldverður allan tímann á hótelinu.
  • Hjóladagskrá í 5 daga.
  • Flutningur á fólki og hjólum samkvæmt dagskrá.
  • Innlend leiðsögn í hjólaferðum. 
  • Íslensk fararstjórn.

Ekki innifalið

  • Leiga á 24 gíra hjóli 24.400 kr. í 6 daga.
  • Leiga á rafhjóli 36.600 kr. í 6 daga.
  • Leiga á hjólatösku 3.000 kr. í 6 daga.
  • Aðgangseyrir inn í söfn, hallir og kirkjur.
  • Hádegisverðir.
  • Þjórfé.

Undirbúningur

Þetta er miðlungserfið hjólaferð sem ætti að henta flestu hjólafólki. Dagleiðirnar spanna um 35 - 50 km. Ferðahraðinn er ekki meiri en svo að auðvelt er að upplifa umhverfið og njóta þess sem fyrir augu ber. Við ráðleggjum gestum okkar að fara í nokkrar lengri dagsferðir og festa kaup á gelhnakk eða hjólabuxum. Því fylgir mikil ánægja að æfa fyrir hjólaferð af þessu tagi og farþegar njóta sjálfrar ferðarinnar betur ef þeir æfa og undirbúa sig vel fyrir ferðina.

Kort af ferðinni

FerðalýsingPrenta ferðalýsingu

Flug

Flogið verður með Icelandair til Mílanó þann 11. september. Brottför frá Keflavík kl. 14:00 en mæting í Leifsstöð u.þ.b. 2,5 klst. fyrir brottför. Lending í Mílanó kl. 20:15 að staðartíma. Gera má ráð fyrir að rútuferðin frá flugvellinum á gististað taki um 3 klst. Þann 18. september ferjar rúta okkur til flugvallarins í Mílanó en þaðan verður flogið kl. 21:15. Lending á Íslandi kl. 23:30 að staðartíma. 

Svæðið

Gardavatnið er stærsta stöðuvatn Ítalíu eða 370 km² og liggur í skjóli Alpanna fyrir norðan og Pósléttunnar fyrir sunnan. Norðurbakkinn er umlukinn 2000 metra háum fjöllum, líkt og Monte Baldo fjallgarðinum á meðan við suðurbakkann tekur við lágsléttan. Gardavatnið er vinsæll ferðamannastaður og er norðurhlutinn einkar vinsæll á meðal klifur-, hjólreiða- og göngufólks. Í nágrenni vatnsins er ræktun ýmiskonar, m.a. ólífa og sítróna við austur- og suðurbakkann og vín við norðurbakkann, en á meðal þekktra vínhéraða má nefna Bardolino og Valpolicella. Loftslagið við vatnið er miðjarðarhafsloftslag og er meðalhiti í september 14°C - 25°C. 

Tillaga að dagleiðum 12. - 17. september

Hjalti Kristjánsson fararstjóri er reyndur hjólamaður og mun hann skipuleggja hjólaferðirnar eftir aðstæðum hverju sinni í samráði við enskumælandi innlendan leiðsögumann sem fylgja mun hópnum alla hjóladagana. Eftirfarandi eru leiðarlýsingar til viðmiðunar fyrir fimm hjóladaga sem fararstjóri getur skipulagt eftir eigin höfði ásamt því að breyta eða bæta við stöðum. Gert er ráð fyrir einum frídegi. 

Opna allt

1. Arco & dalurinn Sarca

Hjólaferð dagsins hefst í Torbole, við mynni árinnar Sarca. Hjólað verður um vínekrur og ólífulundi, fram hjá miðaldakastalanum Arco og samnefndum klifurkletti og áfram í gegnum tungllandslagið Marocche. Við vínekruna Vino Santo væri hægt að fá sér hádegishressingu. Hjólum í rólegheitum með fram vatninu Cavedine og til baka á hótelið.

  • Vegalengd: ca 45 km (möguleiki á að lengja vegalengdina í 60/70 km í samráði við fararstjóra.)
  • Hækkun: 450 m
  • Erfiðleikastig: létt

2. Malcesine - við rætur Monte Baldo

Við hefjum daginn í dag á stuttri rútuferð með fram strandlengjunni til suðurs, til Malcesine. Stígum á rafhjólafákinn við fræga kastalann Castello Scaligero og hjólum í hlíðum fjallsins Monte Baldo, um ólífulundi, með dásamlegt útsýni yfir vatnið. Ferðin leiðir okkur inn í dalinn Val di Sogno eða dal draumsins, fallegs og einstaklega hrífandi dals, sunnan við Malcesine. Síðasta spölurinn leiðir okkur síðan með fram vatninu og til baka til gamla bæjar Malcesine. Fram að rútuferð til baka til Torbole gefst tími til að spássera í þessum fallega miðaldabæ, virða fyrir sér kastalann eða fá sér hressingu við sjávarsíðuna áður en rútan flytur okkur til baka heim á hótel.

  • Vegalengd: ca 35 km
  • Hækkun: 400 m
  • Erfiðleikastig: létt til miðlungserfið

3. Vínekur, kastalar, Loppio vatnið & bærinn Isera

Í dag höldum við í norðurátt. Hjólum yfir San Giovanni fjallgarðinn og komum að gróskumiklu vistkerfi þar sem var áður vatnið Loppio en það var þurrkað upp árið 1954 þegar Mori-Torbole göngin voru gerð. Núorðið fyllist það eingöngu sjaldan af vatni eða aðeins í miklum rigningum. Á leið okkar er líka að sjá kastalarústir frá fyrri heimsstyrjöldinni. Áfram höldum við til Isera en bærinn er þekktur fyrir vínþrúguna Marzemino og samnefnt rauðvín. Hjólað verður áfram fram hjá fallegu borginni Rovereto uns við komum til Volano og að áhrifamiklum kastalanum Castel Pietra frá 12. öld. Tækifæri gefst til að fara í skoðunarferð um kastalann. Hjólum síðan til baka á hótel.

  • Vegalengd: ca 50 km
  • Hækkun: 150 m
  • Erfiðleikastig: miðlungserfið

4. Ledro dalurinn & Ledro vatnið

Hjólaferð dagsins hefst í Prè di Ledro, við rætur Alpanna, fremst í Ledro dalnum. Hér opnast okkur nýr heimur: engi, þinskógar og pínulítið, vel falið stöðuvatn svo eitthvað sé nefnt. Við hjólum frá Biacesa, fram hjá Prè, til Molina di Ledro og með fram bökkum Ledro vatnsins til Pieve, ofar í dalnum. Hér ríkja enn gamlar hefðir en bæði tréiðnaður og svokallaður fjallalandbúnaður eru enn mjög lifandi á þessu svæði. Höldum upp smá bratta á nýjum hjólastíg, í gegnum græn engi og að pínulitlu náttúruverndarsvæði vatnsins Ampola. Þar er að finna einstakt vistkerfi í 730 m hæð yfir sjávarmáli, votlendi með einstökum plöntu- og dýrategundum. Snæðum hádegisverð hjá einum af fjallabændum svæðisins. Hjólum síðan niður á við til Prè þar sem rúta bíður okkar og flytur okkur heim á hótel.

  • Vegalengd: ca 45-50 km
  • Hækkun: 600 m
  • Erfiðleikastig: miðlungserfið

5. Tenno vatn & miðaldaþorpin

Einn hápunktur þessar ferðar er tvímælalaust smaragðsgræna vatnið Tenno. Hjólum niður til Riva og þaðan á hjólastígum og hliðargötum eitthvað upp í móti að vatninu Tenno. Stoppum hér til að fá okkur vatnssopa og taka nokkrar myndir af þessu fallega vatni. Höldum áfram með fram vatninu og í gegnum skóg að fallega miðaldaþorpinu Canale di Tenno. Hægt verður að snæða hádegisverð, dæmigerðan fyrir svæðið, áður en við hjólum til baka eftir þröngum stígum með dásamlegt útsýni út á Gardavatn. Hjólum fram hjá Tenno og Frapporta og áfram niður á við þar til við komum aftur niður í gamla miðbæ Riva, svokallaða perlu Gardavatnsins.

  • Vegalengd: ca 40 km
  • Hækkun: 600 m
  • Erfiðleikastig: miðlungserfið

6. Frídagur

Þennan dag er tilvalið að láta hugsanlegar harðsperrur líða úr sér og njóta þess sem hótelið hefur upp á að bjóða, slappa af við sundlaugina eða kynna sér nágrenni Torbole á eigin vegum. Hægt væri að skreppa til Riva þar sem ákveðinn Tírólablær liggur í loftinu en borgin varð hluti austurríska keisaradæmisins árið 1815. Áhrifa þess gætir í borginni og bjóða veitingastaðir t.a.m. upp á ljúffenga loftþurrkaða skinku, hið svokallaða Carne Salada, saltað nautakjöt, og eins er að finna Apfelstrudel og Vínarsnitsel á matseðlum veitingastaðanna. Tilvalið væri að skoða MAG safnið sem er í gömlum kastala eða barokkkirkjuna Santa Maria Inviolata. 

Myndir úr ferðinni

Fararstjórn

Hjalti Kristjánsson

Hjalti Kristjánsson er fæddur 1978. Er giftur og á tvö börn. Hann ólst upp í Kópavogi og hjá íþróttafélaginu Breiðabliki, þar sem stundaðar voru margar íþróttir í mörg ár. Hjalti lauk M.Sc í þjálfunar- og lífeðlisfræðum frá USA, en hann bjó og lærði í Sacramento Kaliforniu og La Crosse Wisconsin. Hjalti hefur unnið á Reykjalundi síðan 2002. Hann er einnig félagi í Hjálparsveit Skáta í Kópavogi. Hjalti hefur mikinn áhuga á allskyns hreyfingu, útiveru og ferðalögum innanlands sem utan.

Hótel

Hotel Villa Rosa

Gist verður í 7 nætur á fjölskyldurekna Hotel Villa Rosa sem er staðsett í bænum Torbole, við norðurhluta Gardavatns, í aðeins um 10 mínútna göngufjarlægð frá vatninu og eins frá miðbænum. Í boði eru morgunverðarhlaðborð og 3ja rétta kvöldverðir. Herbergin búa yfir loftkælingu, síma, sjónvarpi og öryggishólfi. Við hótelið er garður með sundlaug, móttöku, veitingastað, café/bar, lyftu, setustofu, sjónvarpsherbergi, líkamsræktaraðstöðu, frítt WiFi, hjóla- og brimrettakjallara. 

Vefsíða Hotel Villa Rosa.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00