Sigling frá Moskvu til Pétursborgar

Í þessari sérlega spennandi ferð til Rússlands gefst einstakt tækifæri til að skoða það helsta sem þetta stórbrotna land hefur upp á að bjóða.

Gist verður allar næturnar um borð í huggulega fljótaskipinu MS N. Chernichevsky og skoðunarferðir farnar frá því. Flogið verður til Helsinki og þaðan áfram til Moskvu. Eftir áhugaverða daga þar siglum við með fljótaskipi áleiðis til St. Pétursborgar. Á leið okkar þangað skoðum við ýmsa áhugaverða og sögufræga staði, s.s. Kizhi eyjuna, Yaroslavl, Goritsy, Uglich og Mandrogi. Við dveljum í Pétursborg í tvo daga og skoðum það merkilegasta sem borgin hefur upp á að bjóða. Saga Rússlands er heill heimur ævintýra og um leið og við skoðum landið fáum við að skyggnast inn í þá forvitnilegu veröld.

Verð á mann 459.900 kr. í tveggja manna káetu með aðskildum rúmum á miðju þilfari.

39.900 kr. aukagjald fyrir einbýli.

Verð á mann 488.800 kr. í tveggja manna delux L laga káetu með aðskildum rúmum á aðal þilfari.

Ekki er hægt að fá delux einbýli.

Verð á mann 519.900 kr. í tveggja manna delux káetu með hjónarúmi á miðju eða efra þilfari.

Ekki er hægt að fá delux einbýli.


Innifalið

  • 12 daga ferð.
  • Allt flug og flugvallarskattar samkvæmt ferðalýsingu.
  • Lestarferð frá Pétursborg til Helsinki.
  • Skoðunarferðir og aðgangseyrir samkvæmt ferðalýsingu.
  • Sigling með fljótaskipinu MS N.CHERNICHEVSKY frá Moskvu til Pétursborgar.
  • Gisting í tveggja manna káetum með baði.
  • Morgunverður.
  • 10 kvöldverðir.
  • 10 hádegiverðir.
  • 1 glas af rauðvíni eða hvítvíni eða safa með kvöldverði.
  • 1 vatnsflaska daglega, (0.33l).
  • Kynning á vodka drykkjuvenjum í Rússlandi. 
  • Staðarleiðsögn.
  • Íslensk fararstjórn.
  • Vegabréfsáritun til Rússlands.

Ekki innifalið

  • Þjórfé fyrir áhöfn skipsins ca € 10 á mann á dag. 
  • Þjórfé fyrir staðarleiðsögumenn og bílstjóra ca € 2 á mann á dag.
  • Aðrar máltíðir en þær sem nefndar eru undir innifalið.
  • Aukaskoðunarferðir á vegum skipafélagsins í Pétursborg og Moskvu. 
  • Forfalla- og ferðatryggingar. 

Kort af ferðinni

FerðalýsingPrenta ferðalýsingu

18. ágúst │ Flug til Helsinki og flug til Moskvu

Flug með Icelandair frá Keflavík kl. 7:30. Mæting í Leifsstöð um 2,5 klst. fyrir brottför. Lending í Helsinki kl. 13:55 að staðartíma. Áfram er flogið til Moskvu með Finnair.

19. ágúst │ Moskva

Að loknum morgunverði höldum við í skoðunarferð um Moskvu. Við skoðum St. Basil dómkirkjuna, Rauða torgið og Kreml. Til gamans förum við einnig í verslunarmiðstöð enda má glögglega fá innsýn í líf borgarbúa með því að kíkja þar við. Komið verður aftur til skips um kvöldið. Áhugasamir geta farið í skoðunarferðir og leikhúsferðir á vegum skipafyrirtækisins, s.s. Moskva að nóttu, skoðunarferð í hina frægu neðanjarðarlest Moskvuborgar, þjóðdansasýning o.fl.

20. ágúst │ Moskva

Í dag höldum áfram að kanna Moskvuborg. Íbúar borgarinnar telja um 11 milljónir en á stór-Moskvusvæðinu búa tæpar 15 milljónir sem gerir borgina að þeirri stærstu í Evrópu. Moskva er miðstöð samgangna í lofti, á landi og á vatnaleiðum. Borgin er einnig miðstöð stjórnmála og menningar allra landsmanna. Seinnipart dagsins er siglt af stað til St. Pétursborgar.

Opna allt

21. ágúst │ Uglich

Í dag komum við til bæjarins Uglich en þar búa um 40 þúsund manns. Við skoðum virki bæjarins og hlýðum á fallegan kirkjusöng. Hér kynnumst við sögunni af yngsta syni Ívans
grimma en hann hét Dimitry prins og var myrtur af útsendurum Boris Gudinov í þessum bæ. Saga Rússlands er mjög áhugaverð og vekur mann til umhugsunar á þessum áhugaverða stað. Þennan dag sem og fleiri í ferðinni munum við fá innsýn í þessa stórbrotnu sögu.

22. ágúst │ Yaroslavl

Þennan dag siglum við áfram á mesta stórfljóti Rússlands, Volgu, til borgarinnar Yaroslavl. Borgin er ein af perlum Rússlands og hér munum við gefa okkur góðan tíma til að skoða það helsta. Borgin var stofnuð árið 1010 og býr yfir afar fallegum kirkjum frá 17. öld. Marga háskóla er að finna í borginni.

23. ágúst │ Goritsy

Þegar við leggjum að landi í þorpinu Goritsy munum við stíga upp í rútu og keyra til bæjarins Kirillov en þar búa um 8.000 manns. Bærinn var stofnaður á 14. öld og hefur því að geyma mikla sögu. Hér er margt forvitnilegt að sjá, m.a. klaustrið St. Cyril sem liggur við Siverkoye vatnið ásamt áhugaverðu íkonasafni.

24. ágúst │ Kizhi eyjan

Nú verður komið til sögufrægrar eyju í Onegavatni sem heitir Kizhi og er ákaflega spennandi áfangastaður. Eyjan er 7 km löng, hálfur kílómetri á breidd og er umkringd 5.000 eyjum sem eru af öllum stærðum og gerðum. Við skoðum skemmtilegt byggðasafn þar og kynnumst betur rússneskri byggingarlist, sjáum kirkju heilags Lazarus og annað áhugavert. Við dveljum í nokkrar klukkustundir á eyjunni og siglum því næst áleiðis til Mandrogi.

25. ágúst │ Mandrogi & frjáls tími

Komið verður til bæjarins Mandrogi sem er mjög vinsæll ferðamannastaður á vatnaleiðinni milli Pétursborgar og Moskvu. Í Mandrogi gefst frjáls tími fram eftir degi og hægt að skoða Vodka safnið, forna rússneska byggingarlist, lítinn dýragarð og fleira áhugavert.

26. ágúst │ Pétursborg

Nú erum við komin til hinnar stórfenglegu St. Pétursborgar. Eftir morgunverð verður haldið í skoðunarferð um borgina og skoðað m.a. virki Péturs og Páls en þar voru allir meðlimir Rómanov fjölskyldunnar grafnir. Eiginlega má rekja upphaf borgarinnar til virkisins sem Pétur mikli lét reisa. Eftir hádegisverð skoðum við okkur um í miðbænum en síðan verður haldið til baka í skipið.

27. ágúst │ Pétursborg - Vetrarhöllin og Hermitage safnið

Vetrarhöllin var byggð á árunum 1754–1762 og var heimili rússnesku keisaranna. Höllin hýsir Hermitage safnið, sem er eitt mesta listaverkasafn í heimi en safnið geymir um 3 milljónir listmuna. Við förum að sjálfsögðu í safnið, sem státar m.a. af verkum eftir Rembrant, Picasso og marga fleiri þekkta listamenn. Hér er því af nógu að taka.

28. ágúst │ Pétursborg – Peterhof

Á lokadegi okkar í Rússlandi förum við í skoðunarferð til Peterhof. Þar er hinn frægi og einstaklega fallegi gosbrunnagarður sem oft hefur verið borinn saman við garðana við Versali. Höllin Peterhof var ein af uppáhaldssumardvalastöðum keisaranna og garðarnir hreint ólýsanlegir. Á annað hundrað gosbrunnastyttur eru í görðunum. Hér er því margt að sjá og upplagt að rölta um og njóta þess að vera til.

29. ágúst │ Heimferð um Helsinki

Nú er góðri ferð að ljúka en við hefjum heimförina eldsnemma og höldum í Allegro hraðlestina sem brunar með okkur á 220 km hraða frá Pétursborg alla leið til Helsinki. Ferðin tekur um 3,5 klst. Brottför er kl. 6:40 og er áætluð koma til Helsinki um miðjan morgun. Þegar þangað er komið förum við í skoðunarferð um borgina, t.d. í Klettakirkjuna og að minnismerkinu um Sibelius. Þá er haldið út á flugvöll og flogið frá Helsinki kl. 16:10 og lending í Keflavík kl. 17:00 að íslenskum tíma.

Myndir úr ferðinni

Fararstjórn

Pétur Óli Pétursson

Pétur Óli Pétursson er sérfróður um Pétursborg og Rússland. Hann hefur búið í mörg ár í borginni og er einn fárra Íslendinga á þessum slóðum, en þar á hann og rekur fyrirtæki. Hann hóf fyrir mörgum árum, eiginlega fyrir tilviljun, að taka á móti íslenskum hópum og vinna sem fararstjóri. Í dag er Pétur Óli án efa þekktasti íslenski fararstjórinn í Pétursborg. 

Skip

MS Chernyshevsky

Skipið MS Chernyshevsky var smíðað árið 1987 og gert upp árið 2017. Skipið er 129 m á lengd, í því eru 154 káettur sem eru allar með glugga, sérbaðherbergi, ísskáp og loftkælingu. Um borð er einnig að finna veitingastað, danssal, 2 bari, minjagripaverslun, sauna, sólbaðsstofu, þvottaþjónustu og sóldekk.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00