Tallinn & Pétursborg

23. – 29. ágúst 2018 (7 dagar)

Spennandi ferð til höfuðborgar Eistlands, Tallinn, en borgin er ein best varðveitta miðaldaborg í Norður-Evrópu.

Flogið verður til Helsinki og þaðan siglt yfir til Tallinn og farið í skoðunarferð um hina rómantísku, 800 ára gömlu borg, þar sem gengið verður eftir þröngum steinlögðum götum á milli vel varðveittra bygginga frá 11. - 15. öld. Því næst heimsækjum við hina stórfenglegu Pétursborg, sem var höfuðborg Rússlands á árunum 1712 - 1918. Borgin hét um tíma Leníngrad, til minningar um Lenín og bar hún það nafn til ársins 1991, eftir fall Sovétríkjanna. Pétursborg er án efa miðstöð menningar og lista og hafa bókmenntir, tónlist og leiklist hennar mikla þýðingu um heim allan. Margir telja borgina eina þá fallegustu í heimi, en miðbær hennar er á heimsminjaskrá UNESCO. Farið verður í áhugaverðar skoðunarferðir um borgina þar sem við kynnumst sögu og menningu landsins. Skoðum m.a. virki heilags Péturs og Páls, dómkirkju heilags Ísaks og Vetrarhöllina. Hér er því margt sem gleður augað og margir hápunktar í þessari einu og sömu ferð! 

Verð á mann í tvíbýli 214.500 kr.

Aukagjald fyrir einbýli 34.900 kr.


Innifalið

  • 7 daga ferð.
  • Flug með Icelandair og flugvallaskattar.
  • Gisting í 6 nætur í 2ja manna herbergi með baði.
  • Ferja frá frá Helsinki til Tallinn.
  • Hraðlest frá Pétursborg til Helsinki.
  • Allar skoðunarferðir samkvæmt ferðalýsingu.
  • 6 morgunverðir.
  • 1 hádegisverður.
  • 2 kvöldverðir – stórveislur með skemmtiatriðum og drykkjum.
  • Aðgangseyrir samkvæmt ferðalýsingu.
  • Íslensk fararstjórn.
  • Vegabréfsáritun til Rússlands.

Ekki innifalið

  • Aðrar máltíðir en þær sem nefndar eru undir innifalið.
  • Þjórfé.

Kort af ferðinni

Ferðalýsing

Prenta ferðalýsingu

23. ágúst | Flug til Helsinki

Brottför frá Keflavík kl. 7:30. Mæting í Leifsstöð um 2 klst. fyrir brottför. Lending í Helsinki kl. 13:50 að staðartíma. Eftir stutta skoðunarferð um miðborg Helsinki tekur við tveggja tíma sigling yfir til Tallinn, áætlaður komutími þar um kl. 21:30 en þar verður gist næstu tvær nætur. 

24. ágúst | Skoðunarferð um Tallinn

Í dag verður farið í skoðunarferð um Tallinn, höfuðborg Eistlands. Þessi fallega og rómantíska borg er um 800 ára gömul. Tallinn er ein best varðveitta miðaldaborg í Norður-Evrópu og er á heimsminjaskrá UNESCO og göngum við um þröngar steinlagðar götur milli sögulegra miðaldabygginga. Þrátt fyrir ríkan miðaldablæ hennar er hún einnig með alþjóðlegt yfirbragð, enda hefur borgin tekið miklum breytingum á síðustu árum. Að lokinni skoðunarferð gefst frjáls tími til að kanna borgina á eigin vegum.

25. ágúst | Ekið til Pétursborgar

Eftir morgunverð ökum við til Pétursborgar í Rússlandi, sem er í um 380 km fjarlægð frá  Tallinn. Á leiðinni munum við snæða saman hádegisverð. Við komuna til Pétursborgar tekur við stutt skoðunarferð, þar sem við munum m.a. skoða dómkirkju St.Isaacs, sem tók 40 ár að byggja og 18 ár að skreyta. Byggingu hennar lauk árið 1858. Þetta kvöld snæðum við glæsilegan kvöldverð þar sem rússneskir listamenn munu skemmta. Gist verður fjórar nætur í Pétursborg.

Opna allt

26. ágúst | Skoðunarferð um Pétursborg

Að loknum morgunverði förum við í skoðunarferð um miðbæinn. Því næst verður haldið að virki heilags Péturs og Páls þar sem allir meðlimir Rómanov fjölskyldunnar eru grafnir. Í raun og veru má rekja upphaf borgarinnar til virkisins sem Pétur mikli lét reisa. Eftir hádegisverð heimsækjum við einnig Vetrarhöllina, sem byggð var á árunum 1754–1762 og var heimili rússnesku keisaranna. Í dag hýsir höllin Hermitage safnið, sem er eitt mesta listaverkasafn í heimi. Safnið geymir um 3 milljónir verka og státar m.a. af verkum eftir Rembrandt, Picasso og fleiri þekkta listamenn.

27. ágúst | Leníngrad minnismerkið & Peterhof

Við munum hefja leiðangur dagsins á því að skoða minnismerkið um 900 daga umsátrið  um Leningrad, en þar er magnþrungið andrúmsloft sem snertir marga mjög djúpt. Næsti áfangastaður er Peterhof, en þar er víðfrægur og einstaklega fallegur gosbrunnagarður sem löngum hefur verið borinn saman við garðana í Versölum. Höllin í Peterhof var ein af uppáhalds sumardvalarstöðum keisaranna og garðarnir eru hreint ólýsanlegir. Við endum daginn í stórveislu á veitingastaðnum Podvorija þar sem boðið verður upp á 5 rétta rússneskan málsverð með skemmtidagskrá.

28. ágúst | Frjáls tími

Í dag gefst hverjum og einum frjáls tími til að skoða Pétursborg á eigin vegum. Upplagt er að sigla um síkin, fara í Rússneska safnið, skoða Blóðkirkjuna eða einfaldlega njóta iðandi mannlífsins í miðborginni.

29. ágúst | Heimferð

Við hefjum heimförina snemma og höldum í Allegro hraðlestina, sem brunar með okkur á 220 km hraða frá Pétursborg alla leið til Helsinki. Ferðin tekur um 3,5 klst. Brottför er kl. 6:40 og er áætluð koma til Helsinki kl. 10:16. Í Helsinki fáum við smá tíma til þess að skoða miðbæinn og er upplagt að fá sér hressingu áður en haldið er út á flugvöll. Flug frá Helsinki kl. 15:35 og lending í Keflavík kl. 16:00 að íslenskum tíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Pétur Óli Pétursson

Pétur Óli Pétursson er sérfróður um Pétursborg og Rússland. Hann hefur búið í mörg ár í borginni og er einn fárra Íslendinga á þessum slóðum, en þar á hann og rekur fyrirtæki. Hann hóf fyrir mörgum árum, eiginlega fyrir tilviljun, að taka á móti íslenskum hópum og vinna sem fararstjóri. Í dag er Pétur Óli án efa þekktasti íslenski fararstjórinn í Pétursborg. 

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir