Klettafjöllin í Kanada

24. ágúst – 3. september 2019 (10 dagar)

Alberta varð fylki í Kanada snemma á 20. öld en þar endar kanadíska sléttan við rætur hinna stórbrotnu Klettafjalla. Á sléttunni höfðust við firnastórar hjarðir vísunda í sátt og samlyndi við ættbálka frumbyggja og í Klettafjöllum finnast enn vísbendingar um mannlíf fyrri tíma.

Í þessari ferð kynnumst við stórkostlegu landslagi fjallanna, mannlífinu fyrr á öldum og í nútímanum. Flogið verður til Edmonton, höfuðborgar fylkisins, þar sem byrjað verður á skoðunarferð um borgina. Heimsækjum meðal annars sögufrægan stað, Fort Edmonton Park. Einnig heimsækjum við vísundabónda á leiðinni frá Edmonton til Klettafjallanna. Skoðum ferðamannabæinn Jasper í samnefndum þjóðgarði og ökum þaðan suður um fjöllin. Á þessum árstíma skarta þau sínu fegursta hvert sem litið er, samspil vatns, gróðurs og fjalla er engu líkt. Skoðum m.a. Athabasca Falls, Peyto Lake og Lake Louise á dagleiðinni til ferðamannabæjarins Banff. Líkt og aðrir landnemar í Kanada á 19. öld fluttu Íslendingar þangað vestur og þar varð til íslensk byggð. Við skoðum hana og hús skáldsins Stephans G. Stephanssonar á leið úr fjöllunum.

Verð á mann í tvíbýli 273.300 kr.

Aukagjald fyrir einbýli 107.700 kr.


Innifalið

  • 10 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgunverður alla morgna á hótelum.
  • Heimsókn á vísundabúgarð.
  • Aðgangur í þjóðgarða.
  • Allar skoðunarferðir með rútu samkvæmt ferðalýsingu.
  • Akstur á flugvöll á heimferðardegi.
  • Íslensk fararstjórn.

Ekki innifalið

  • ETA heimild til Kanada ca $ 7.
  • Aðgangseyrir inn í söfn og kirkjur.
  • Hádegis- og kvöldverðir.
  • Þjórfé.
  • Forfalla- og ferðatryggingar.

Valfrjálst

  • Aðgangseyrir í Markerville safnið ca. $4.
  • Hús Stephans G. Stephanssonar ca. $5.
  • Hádegismatur í Fensölum ca. $18.

Fararstjóri safnar saman greiðslum í rútu á leiðinni og greiðir allan pakkann.

Athugið

Máltíðir eru almennt ekki innifaldar í ferðinni, nema morgunverður alla morgna. Gott er að hafa með sér nasl í bílnum, ávexti og annað slíkt. Í bílnum er til sölu vatn gegn vægu gjaldi svo enginn þarf að vera þyrstur. Stundum mun fararstjórinn panta sameiginlega máltíð eða taka frá borð á veitingastað þannig að hópurinn snæðir saman. Það er mjög mismunandi hvað kvöldverður kostar, allt miðað við hvort farþegar vilja fá sér einfalda máltíð eða fara fínt út að borða. Sem viðmiðun má gera ráð fyrir að kvöldverður kosti ekki undir 20 dollurum á mann (nema skyndibitamáltíð sem er ódýrari). 

Kort af ferðinni

FerðalýsingPrenta ferðalýsingu

24. ágúst | Keflavík – Edmonton

Flug frá Keflavík til Edmonton í Alberta. Brottför frá Leifsstöð kl. 16:45. Mæting á flugvöll a.m.k. 2 klst. fyrir brottför. Lent í Edmonton kl. 17:20 að staðartíma. Að loknu útlendingaeftirliti og tollskoðun flytja skutlur hópinn á hótel í Leduc, úthverfi nærri flugvellinum þar sem gist verður tvær nætur.

25. ágúst | Edmonton – Skoðunarferð

Í dag verður farin skoðunarferð um Edmonton og byrjað á þinghúsi fylkisins þar sem við röltum um lóðina, njótum gróðurs, byggingalistar og útsýnis. Þaðan er farið í Fort Edmonton Park þar sem við skoðum m.a. gamlan verslunarstað frá árinu 1846 en sá snerist að mestu um skinnaverslun. Hér er margt að sjá og því gefst góður tími til að rölta um. Héðan liggur leiðin um sunnanverða borgina í merkileg gróðurhús, Muttart Conservatory þar sem finna má jurtir frá öllum heimshornum og víða að úr Kanada. Þaðan verður ekið til baka á hótel.

26. ágúst | Vísundar – Jasper

Við ökum út á sléttuna í vesturátt þar sem þúsundir vísunda undu hag sínum fyrr á öldum en gegndarlausar veiðar um miðbik 19. aldar gengu mjög nærri stofninum. Í samvinnu við bændur sneru stjórnvöld við blaðinu og efldu stofninn. Förinni er heitið á vísundabúgarð þar sem bóndinn fræðir gesti um þessa merkilegu skepnu í skemmtilegri heimsókn. Förum þaðan til Rochfort Bridge Trading Post þar sem tækifæri gefst til að smakka vísundakjöt. Hingað komu íbúar sléttunnar með varning og seldu. Komum síðdegis í smábæinn Hinton við Jasper þjóðgarðinn þar sem við gistum næstu tvær nætur. 

Opna allt

27. ágúst | Jasper – Skoðunarferð

Að loknum morgunverði er ekið í þjóðgarðinn og ef veður leyfir byrjað á að fara með Jasper Skytram á hæstu tindana. Frjáls tími síðdegis. Hér er margt að skoða, söfn, gallerí, minjagripaverslanir og auðvitað finnast frábær veitingahús. Ekið til baka á náttstað í Hinton seinni partinn.

28. ágúst | Banff

Í dag verður ekin einstök leið um Klettafjöllin  og við rætur þeirra. Það er merkilegt að á hæstu tindum þeirra skulu finnast skeljar sem vitna um hreint ótrúlega myndun þessa magnaða fjallgarðs fyrir þúsundum ára. Fjöllin tala til okkar, skógi vaxin víða en efst blasa við hrikalegir tindar og jöklar. Víða komum við að ótrúlegum stöðuvötnum t.d. Peyto Lake þar sem sérkennilegt, blágrænt vatnið glitrar eins og gimsteinn í sólinni. Lake Louise er annað vatn í miklum fjallasal, mörgum finnst sá staður vera nánast himneskur. Ljúkum þessari mögnuðu dagleið við Moraine Lake í dal hinna tíu tinda en mörgum heimamönnum í fylkinu finnst sá staður fallegastur. Þaðan er svo ekið á náttstað í Banff þar sem gist verður næstu þrjár nætur.

29. ágúst | Frjáls dagur í Banff

Nafn þessa bæjar er skoskt og á bærinn nafna í norðanverðu Skotlandi út við Norðursjó. Í dag gefst tækifæri til að skoða þennan fjallabæ í Klettafjöllunum. Ef veður leyfir væri upplagt að taka kláfinn upp á fjallið Sulphur Mountain og njóta stórkostlegs útsýnisins þaðan yfir fjöllin. Taka svo strætisvagn frá ferjustað niður í bæ og skoða. Þar eru einkar áhugaverð söfn, eitt varðar sérstaklega sögu frumbyggja á þessu svæði annað er helgað landnemum 19. aldar. Þar er að finna frábært úrval hvers kyns veitingastaða svo og úrval smáverslana. 

30. ágúst | Skoðunarferð í fjöllin

Í dag skoðum við okkur um í fjöllunum, hverfum um stund yfir til Bresku Kólumbíu til að skoða. Byrjum á því að aka stutta leið að tígulegu fjalli, Castle Mountain, sem er um 2800 m á hæð. Fjallið fékk nafnið árið 1858 því það minnti landkönnuð á kastala. Hér njótum við útsýnis um hríð en ökum því næst inn í Kootenay þjóðgarðinn og komum fyrst til Marble Canyon. Þegar litið er upp hlíðarnar blasa við ummerki mikils skógarelds sem þarna logaði fyrir allmörgum árum. Makalaust að sjá hvernig náttúran sjálf vinnur sig úr slíkum hildarleik. Hér verður áð og skoðað. Áfram er haldið inn í dali, tíguleg Klettafjöllin allt um kring tala sínu máli. Komum til Vermillion Crossing þar sem við fáum okkur hressingu áður en aftur er snúið til Banff. 

31. ágúst | Banff – Markerville -Edmonton

Frá Banff er ekið í íslensku nýlenduna í Markerville. Þangað fluttu margir Íslendingar frá Norður-Dakóta og var skáldið Stephan G. Stephansson einn þeirra. Hann reyndist löndum sínum drjúgur og tók virkan þátt í mótun íslenska samfélagsins. Nöfn eins og Hólar, Tindastóll og Fensalir voru hans hugmyndir og hér flutti hann fyrst Þó þú langförull legðir á þjóðminningarsamkomu. Við byrjum á hádegisverði í félagsheimilinu Fensölum, skoðum mjólkurbúið og endum skoðunarferðina á að skoða hús skáldsins. Ekið til baka á hótel í útjaðri Edmonton.

1. september | Frjáls dagur í Leduc

Eftir annasama daga í Klettfjöllum er kærkomið að taka það rólega á góðu hóteli sem er vel staðsett við eina aðalgötu þessa smábæjar eða úthverfis. Upplagt að rölta eftir aðalgötunni, kíkja í ólíkar smáverslanir uns til enda er komið en þar tekur við stöðuvatn sem gaman er að skoða. Snúa til baka, tylla sér á kaffi- eða veitingahús og fá sér hressingu. Þá er stutt í verslunarhverfi sem einhver kann að vilja nýta sér.

2. september | Heimferðardagur

Það er komið að heimför. Skila þarf herbergjum kl. 11:00 að morgni og munu töskur verða settar í læstan sal þannig að ýmislegt má gera fram að brottfarartíma. Skutlur hótelsins flytja svo hópinn á flugvöll síðdegis. Brottför frá Edmonton kl. 18:20.

3. september | Lending í Keflavík

Lending í Keflavík er áætluð kl. 06:40.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Jónas Þór

Jónas Þór er fæddur í Reykjavík. Hann lauk prófi frá Háskóla Íslands árið 1977 og flutti það ár til Winnipeg í Manitoba. Að loknu framhaldsnámi í sagnfræði frá Manitobaháskóla var Jónas ráðinn ritstjóri Lögbergs-Heimskringlu og kenndi um leið við íslenskudeild Manitobaháskóla. Hann bjó Í Kanada í tíu ár. Jónas hefur um árabil skipulagt ferðir sem á einn eða annan hátt tengjast sögu íslensku vesturfaranna í Vesturheimi. Hann hefur farið með hópa á nánast alla staði í Norður-Ameríku þar sem Íslendingar settust að á vesturfaratímabilinu. Þá hefur hann skipulagt ferðir til Íslands fyrir afkomendur vesturfaranna.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir