Franska & ítalska rivíeran

Það er alltaf svo yndislegt að koma til borgarinnar Pisa sem er þekktust fyrir skakka turninn á torginu, Piazza dei Miracoli. Bygging turnsins hófst árið 1173 og var þessum frístandandi klukkuturni, sem tilheyrir dómkirkjunni í Pisa, ætlað að standa lóðrétt en eftir byggingu annarrar hæðar hans tóku undirstöður turnsins að síga. Turninn er eitt af þremur mannvirkjum á Campo dei Miracoli eða Kraftaverkatorginu í Pisa. Við höldum í góða skoðunarferð um svæðið en eftir það er tími til að kanna staðinn á eigin vegum og fá sér hressingu. Eftir góðan tíma hér verður ekið til baka á hótelið.

Rólegheit og slökun eru á dagskrá hjá okkur í dag í bænum Lerici. Upplagt að kanna umhverfið á göngu með fararstjóra en glæstar byggingar og kastalavirki frá veldi Pisa- og Genúabúa prýða borgina. Eftir það verður frjáls tími til að skoða sig um á eigin vegum og jafnvel skreppa á ströndina.

Kveðjum Lerici eftir ljúfa daga og nú heldur sælan áfram því ekið verður til fræga bæjarins San Remo. Hann er einn vinsælasti ferðamannastaður Ligurastrandarinnar við svonefnda blómaströnd en hún dregur nafn sitt af einstakri blómaræktun þar um slóðir. Þar verður gist í fjórar nætur á góðu hóteli í miðbænum, stutt frá baðströnd bæjarins. Á hótelinu er útsýnispallur á þakinu með borðum, stólum og nuddpotti. Einnig er líkamsrækt og heilsulind með sauna og tyrknesku baði.

Í dag heimsækjum við dásamlegu borgina Nice við Cote d´Azur í Frakklandi. Það er ekki annað hægt en að hrífast af bæjarstæði hennar við Englaflóann og eins að borginni sjálfri. Nice er í hópi gömlu, grísku borganna en víðsvegar um hana standa glæsilegar byggingar, einskonar minnisvarðar liðins tíma. Hér er alltaf mikið um að vera og borgin bókstaflega iðar af mannlífi allt árið um kring. Eftir góðan tíma og áhugaverða skoðunarferð um Nice verður ekið til glæsiborgarinnar Cannes, sem er hvað þekktust fyrir hina alþjóðlegu kvikmyndahátíð sem haldin er þar ár hvert. Að sjálfsögðu munum við feta í fótspor kvikmyndastjarnanna og ganga á rauða dreglinum að kvikmyndahöllinni. Síðdegis gefst frjáls tími til þess að kanna borgina á eigin vegum, sýna sig og sjá aðra.

Nú er rólegheitadagur hjá okkur í San Remo sem er líflegur og skemmtilegur bær. Við byrjum á því að kanna líf bæjarins og skoða glæstar byggingar sem prýða bæinn, m.a. Sanremo Casino spilavítið, San Siro dómkirkjuna og rússnesku rétttrúnaðarkirkjuna svo eitthvað sé nefnt. Eftir það er upplagt að fá sér hressingu, líta inn á kaupmenn bæjarins sem eru fjölmargir eða fá sér göngutúr eftir ströndinni en þar eru margir skemmtilegir veitingastaðir. Einnig er hægt að fá sér sundsprett í Miðjarðarhafinu sem er aðeins nokkrum skrefum frá hótelinu okkar. Kvöldverður á eigin vegum.

Þennan skemmtilega dag heimsækjum við furstadæmið Mónakó, stundum kallað dvergríkið Mónakó. Við höldum í skoðunarferð um klettaborgina en þar er að finna höll furstafjölskyldunnar og dómkirkjuna þar sem Grace Kelly var borin til grafar. Einnig verður komið við í Monte Carlo hverfinu þar sem glæsileg bygging Grand Casino spilavítisins stendur.

Nú er komið að heimferð eftir ljúfa daga. Ekið verður til Mílanó en brottför þaðan er kl. 15:30 og lending í Keflavík kl. 17:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.