Mósel & Rín

Töfrandi ferð um Móseldalinn þar sem rómantík og náttúrufegurð lætur engan ósnortinn. Við heimsækjum elstu borg Þýskalands, Tríer, hina öldnu borg Rómverja sem er rík af sögu og fornminjum. Bestu dæmin um stórveldistímann er hliðið Porta Nigra og Kaiserthermen, baðhús Rómverja. Heillandi ferðir verða frá Tríer, m.a. til bæjarins Bernkastel-Kues sem er andlit Móseldalsins og er rómaður fyrir falleg bindingsverkshús og töfrandi blæ miðaldanna. Eftir það verður áð í Zeltingen þar sem stendur yfir skemmtileg vínhátíð sem er gaman að upplifa. Einnig verður komið til bæjarins Rüdesheim sem er alger perla við ána Rín í Rínardalnum. Þaðan er hægt að fara með kláfi yfir vínhæðir og upp að minnisvarða landsins. Einnig verður komið til Cochem sem er með fallegri bæjunum við ána en hann státar af fögrum kastala sem gnæfir sem kóróna yfir bænum. Glæsilega borgin Koblenz verður heimsótt, yndisleg borg sem stendur við ármót Mósel og Rín sem mætast við hið svokallaða Deutsches Eck. Þá verður farið í skemmtilega siglingu á Mósel. Við trompum þessa glæsilegu ferð í stórhertogadæminu Lúxemborg sem flestir Íslendingar þekkja. Þar upplifum við töfra borgarinnar með sína 1000 ára sögu og menningu. Við förum einnig til Clervaux þar sem Halldór Laxness dvaldi í 18 mánuði í klaustrinu St. Maurice.

Verð á mann í tvíbýli 212.600 kr.

Aukagjald fyrir einbýli 41.400 kr.


Innifalið

  • 8 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun og kvöldverður á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Siglingar, vínsmökkun, kláfar
  • Hádegisverðir
  • Þjórfé.

Valfrjálst

  • Sigling á Mosel ca € 20.

Kort af ferðinni

FerðalýsingPrenta ferðalýsingu

5. september | Flug til Frankfurt & Tríer

Brottför frá Keflavík kl. 07:25 og lending í Frankfurt kl. 12:55 að staðartíma, þaðan verður ekin fögur leið til Tríer, elstu borgar Þýskalands. Þar verður gist í sjö nætur á góðu hóteli í miðbænum. Hótelið býður upp á heilsurækt í rómverskum stíl m.a. er sauna og rómverskt gufubað til að endurnærast og slaka á eftir eril dagsins.

6. september | Skoðunarferð um Tríer & frjáls tími

Dagurinn byrjar í rólegheitum og eftir góðan morgunverð verður farið í töfrandi skoðunarferð um Tríer. Í þessari elstu borg Þýskalands er að finna mjög merkilegar minjar frá tímum Rómverja en þeir stofnuðu borg árið 16 f.Kr. sem þeir nefndu Augusta Trevrorum. Fyrri hluti nafnsins var til heiðurs Ágústus keisara en seinni hlutinn er dreginn af keltneskum þjóðflokki, treveri, sem bjó þar nærri. Það er margt að sjá í þessari fallegu borg, töfrandi kirkjur, glæstar barokkbyggingar og ekki má gleyma borgarhliðinu, Porta Nigra frá 2. öld e.Kr.sem er tákn borgarinnar. Að lokinni skoðunarferð verður frjáls tími til að skoða sig betur um í borginni á eigin vegum. 

7. september | Bernkastel-Kues & vínhátíð í Zeltingen

Rómantíkin og náttúrufegurðin lætur engan ósnortinn í Móseldalnum. Nú verður ekin fögur leið um dalinn og stefnum við á bæinn Bernkastel-Kues sem er rómaður fyrir falleg bindingsverkshús og töfrandi blæ miðaldanna. Hér gefum við okkur góðan tíma og njótum sælunnar. Eftir það verður farið til Zeltingen en þar stendur yfir vínhátíð og upplagt er að fá sér hér hressingu. Út um allt eru sérstakir standar þar sem vínframleiðendur bjóða upp á Móselvín. Lifandi tónlist ómar um svæðið og mikil gleði ríkir. Eftir góðan tíma þar verður ekið til Tríer.

Opna allt

8. september | Dagur í Rüdesheim í Rínardalnum

Í dag verður ekið til Bingen við Rín þar sem við tökum ferjuna yfir ána til Rüdesheim. Hann er einn vinsælasti ferðamannastaðurinn við Rín og þar er alltaf líf og fjör. Mjög gaman er að fara þaðan með kláfi yfir vínhæðirnar að minnisvarða sem byggður var seint á 19. öld til minningar um fyrri sameiningu Þýsklands. Við gefum okkur góðan tíma í þessum skemmtilega bæ því margt er að skoða og upplifa þar inni á milli fallegu bindingsverkshúsanna.

9. september | Cochem, Koblenz & sigling á Mósel ánni

Við hefjum spennandi dagsferð með akstri til Cochem sem er með fallegri bæjum við ána. Allmikil hæð rís í miðjum bæ og á toppi hennar stendur glæsilegur kastali sem setur mikinn svip á staðinn. Við gefum okkur góðan tíma í bænum til að skoða en kveðjum svo og höldum ferð áfram á næsta stað. Borgin Koblenz stendur við ármót Mósel og Rín sem mætast við hið svokallaða Deutsches Eck og er oft nefnt eitt fallegasta horn Þýskalands. Hér förum við í töfrandi skoðunarferð um þessa sögufrægu borg sem er rúmlega 2000 ára gömul. Það er gaman að skoða gamla miðaldabæinn en hann prýða glæstar byggingar, fallegar kirkjur, þröngar litlar götur og gömul bindingsverkshús. Eftir það verður gefinn frjáls tími til að kanna borgina á eigin vegum en seinni partinn verður farið í ljúfa siglingu á Mósel ánni.

10. september | Lúxemborg & klaustrið St Maurice í Clervaux

Glæsileg ferð í dag til stórhertogadæmisins Lúxemborgar sem margir Íslendingar þekkja. Halldór Laxness dvaldi hér í 18 mánuði í klaustrinu Clervaux, Benediktínaklaustri sem var byggt árið 1910. Og auðvitað tilheyrir að skoða klaustrið og kirkjuna sem er undurfögur. Lúxemborg var lítið peð á tímum stórveldanna í Evrópu og varð oft bitbein þeirra og hefur lenti í mörgum hörmungum í gegnum aldirnar. En undir lok 18. aldar var virkið í Lúxemborg orðið mjög öflugt og gekk undir nafninu Gíbraltar norðursins. Áhrifamikið er að skoða neðanjarðarbyrgin sem voru á þeim tíma 25 km löng. Lúxemborg er yndisleg borg með 1000 ára sögu og má segja að á meðan við skoðum borgina förum við á milli nútíma glerbygginga, miðaldahúsa og neðanjarðarbyrgja sem gátu hýst 1000 hermenn og hesta. Við verjum drjúgum tíma í að skoða borgina en fáum okkur svo seinna hressingu og njótum mannlífsins á eigin vegum.

11. september | Rólegur dagur í Tríer

Rólegur dagur er á dagskrá og því gefst tækifæri til að njóta þess að vera í Tríer og skoða borgina betur á eigin vegum. Sjálfsagt að kíkja í verslanir eða fara í skemmtilega vínsmökkun sem er víða í boði. Þá er upplagt að nota glæsilega heilsulind hótelsins. 

12. september | Kveðjustund & heimferð

Skemmtileg ferð tekur enda. Nú er komið að heimferð, þar sem ekið verður til Frankfurt en brottför þaðan er kl. 17:35. Lent í Keflavík kl. 19:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Kristín Jóhannsdóttir

Kristín Jóhannsdóttir er fædd árið 1960 og uppalin í Vestmannaeyjum.  Eftir stúdentspróf frá MH lá leiðin til Noregs, en Kristín bjó í Osló og vann á skrifstofu Flugleiða í tvö ár. Eftir það fluttist hún til Þýskalands, en hún hefur búið bæði í austur og vesturhlutanum þ.e. Freiburg, Berlín, Leipzig og Frankfurt í 20 ár. Kristín stundaði nám í Freiburg, Berlín og Leipzig og lauk Magisterprófi í bókmenntum og sagnfræði árið 1991 frá Frei Universität í Berlín.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir