Hjólaævintýri á Kúbu

Hér er boðið upp á magnaða hjólaferð til Kúbu, stærstu eyju Karabíska hafsins. Þessi paradís, fyrrum eftirlætisstaður Hemingway, býr yfir töfrum, einhverri dulúð sem heillar alla. Það er ekki að ástæðulausu sem eyjan dregur til sín þúsundir ferðamanna ár hvert. Hjólað verður um hina litríku og heillandi Havana borg og m.a. farið í Miramar hverfið þar sem glæsibyggingar 20. aldar geyma sendiráð erlendra ríkja. Við förum um hverfi miðstéttarinnar í Parque Metropolitano de la Habana áður en komið verður til Plaza de la Revolucion sem var bólstaður Kastró og stjórnar hans. Leiðin liggur í yngra hverfi Vedado, fram hjá hinu fræga Hotel Nacional, þar sem Churchill dvaldi forðum, og El Capitolio byggingunni sem svipar mjög til Hvíta hússins í Washington. Á dagskrá verða dagleiðir út fyrir borgina og við hjólum meðal annars um Pinar del Rio Province hérað sem er einstaklega falleg hitabeltisleið til Las Terrazas Biosphere Reserve. Hver dagur og sérhver leið mun birta okkur hinar ýmsu hliðar þessarar paradísar um leið og við kynnumst mannlífinu, mat, drykk, siðum og venjum heimamanna. 

Verð á mann 599.900 kr.

Aukagjald fyrir einbýli 82.800 kr.


Innifalið

  • 15 daga ferð.
  • Flug með Icelandair Keflavík - Toronto – Keflavík og flugvallarskattar.
  • Flug með Air Canada Toronto – Havana – Toronto og flugvallarskattar. 
  • Ferðir á milli flugvallarins og hótelsins í Toronto.
  • Gisting í tveggja manna herbergi í eina nótt í Toronto.
  • Ferðir til og frá flugvelli í Havana. 
  • Gisting í tveggja manna herbergi á hótelum og „casas“ á Kúbu.
  • Morgunmatur allan tímann á hóteli. 
  • 10 hádegisverðir (á veitingastöðum en nestispakki ef enginn veitingastaður er á leiðinni).
  • 3 kvöldverðir.
  • Flutningur á fólki og hjólum samkvæmt ferðalýsingu.
  • Leiga á trekking hjóli samkvæmt ferðalýsingu.
  • 3 lítrar af vatni á mann, hjóladagana.
  • Innlend staðarleiðsögn í hjólaferðum.
  • Íslensk fararstjórn.

Ekki innifalið

  • ETA heimild fyrir Kanada ca $ 7.
  • Vegabréfsáritun til Kúbu. 
  • Aðrar máltíðir en þær sem nefndar eru í ferðalýsingu. 
  • Þjórfé.
  • Forfalla- og ferðatryggingar. 

Kort af ferðinni

FerðalýsingPrenta ferðalýsingu

21. október | Flug til Toronto í Kanada

Flug með Icelandair frá Keflavík kl. 17:05. Mæting í Leifsstöð u.þ.b. 2,5 klst. fyrir brottför. Lending í Toronto kl. 18:55 að staðartíma en flugið tekur rúmar 6 klst. Gist verður í Toronto eina nótt áður en haldið er áfram til Kúbu daginn eftir. Kvöldverður á eigin vegum.

22. október | Niagara fossarnir – flug til Havana á Kúbu

Eftir morgunverð verður farið með rútu að skoða hina þekktu og einstöku Niagara fossa. Það er samheiti þriggja fossa sem falla í sama gljúfur nánast á sama stað. Áin heitir Niagara river og rennur úr Erie vatni í Ontario vatn. Vatnsfallið er 50 metrar og falla um 110 þúsund rúmmetrar í gljúfrið á hverri mínútu að meðaltali. Seinnipartinn verður farið út á flugvöll og flogið með Air Canada til Havana kl. 20:00. Flugið tekur um 3,5 klst. og lent verður kl. 23:30 að staðartíma. Ekið á hótel í Havana þar sem gist verður í 2 nætur.

23. október | Hjólað um Havana

Að loknum morgunverði og þegar hjólin hafa verið afhent og prófuð verður farið í skoðunarferð um ákveðin hverfi í borginni. Við byrjum á nánasta umhverfi hótelsins okkar í Miramar en þar eru nokkrar glæsibyggingar sem hýsa sendiráð ýmissa ríkja. Þaðan liggur leiðin í lítinn og dásamlegan gróinn garð sem kallast Gran Parque Metropolitano. Hingað leggja borgarbúar oft leið sína til afþreyingar og slökunar í heillandi náttúru við bakka Almendares árinnar. Frá garðinum liggur leið okkar í næsta hverfi, Nuevo Vedado, sem er hverfi miðstéttarinnar og þar finnast margir áhugaverðir staðir á borð við uppreisnartorgið og Colón kirkjugarðinn sem er einn sá fegursti í Karabíska hafinu. Þaðan hjólum við stuttan spöl niður að strönd við Hotel Nacional de Cuba og að gamla þinghúsinu, el Capitolio sem svipar mjög til Hvíta hússins í Washington. Leið okkar liggur svo áfram að lestarstöðinni og að borgarmúrnum en þaðan er stuttur gangur niður í gömlu Havana þar sem okkar bíður hádegisverður. Að honum loknum verður hjóluð önnur leið til baka á hótel, með fram Malecón strandlengjunni.

  • Vegalengd: ca 35 km
  • Hæðarmunur: +210 m /-209 m
  • Erfiðleikastig: miðlungserfið
Opna allt

24. október | Havana – Las Terrazas

Í dag verður hópurinn fluttur út fyrir borgina í vesturátt. Þegar við erum komin út fyrir borgina drögum við hjólin fram og stígum pedalana eftir fallegri leið í átt að Las Terrazas þar sem við gistum í eina nótt. Las Terrazas er einstaklega fallegur staður, sjálfbært samfélag þar sem menn og náttúra lifa í sátt og samlyndi. Hér eru elstu kaffiakrar Kúbu, skógi vaxið svæði, runnar og fögur blóm umhverfis lygnar tjarnir. Í þessari einstöku náttúruperlu eru einnig náttúrulaugar sem upplagt er að njóta eftir hjólaferð dagsins.

  • Vegalengd: ca 50 km
  • Hæðarmunur: ca + 445 m. / -280 m
  • Erfiðleikastig: miðlungserfið

25. október | Las Terrazas – Viñales

Við borðum morgunmat í þessar náttúruparadís en því næst erum við flutt frá Moka til Soroa og þaðan niður í dal nokkurn. Þar byrjum við dagsferðina á hjólunum og eyðum morgninum í að læðast eftir Pinar del Río veginum, milli fallegra þorpa frá nýlendutímunum uns við komum til San Diego de los Baños. Hér er að finna bestu heilsulindir Kúbu en á nýlendutímanum uppgötvuðu menn lækningarmátt vatnsins á svæðinu þegar veikur þræll gekk fram á hver, baðaði sig í honum og læknaðist. Hér snæðum við síðbúinn hádegismat en að honum loknum er hópurinn fluttur til Viñales þar sem gist verður næstu tvær nætur.

  • Vegalengd: ca 77 km.
  • Hæðarmunur: ca + 1334 m. / -1445 m.
  • Erfiðleikastig: miðlungserfið.

26. október | Viñales – Cayo Jutia – Viñales

Í dag gefst tækifæri til að hjóla hluta dags og njóta svo sólar og hita á baðströnd seinni partinn. Lagt verður af stað að loknum morgunverði og komið á ströndina Cayo Jutia um hádegisbil. Hjólaleiðin er hæðótt en skemmtileg. Hádegisverður bíður hópsins á ströndinni og síðan er hægt að slaka á. Á staðnum er sitthvað í boði, t.d. geta menn spreytt sig á köfun. Hópurinn verður fluttur til baka á náttstað í Viñales seinni partinn.

  • Vegalengd: ca 56 km
  • Hækkun: ca + 530 m. / -669 m
  • Erfiðleikastig: miðlungserfið
  • Morgunmatur
  • Hádegismatur

27. október | Keyrt til Santa Clara

Við leggjum af stað eftir morgunmat og stefnan tekin í austur. Það er spennandi að aka þessa leið því hér gefst kærkomið tækifæri til að upplifa landið, mannlífið til sveita og í þorpum. Innlendur fararstjóri fræðir okkur um markverða staði, sýnir myndbönd og leiðir okkur þessa spennandi leið. Nesti verður borðað í einhverju þorpinu. Við komum til hins sögufræga staðar, Santa Clara, sem iðar af menningarlífi, sköpunargleði og byltingaranda. Hér gistum við á góðu hóteli eina nótt. Kvöldverður á eigin vegum.

  • Morgunmatur
  • Hádegismatur

28. október | Santa Clara – Trinidad

Við snæðum morgunmat og síðan er stutt skoðunarferð um borgina þar sem margt er að sjá. Við byrjum á að skoða grafreit og minnisvarða um Che Guevara og 29 liðsmenn hans sem féllu árið 1967. Á leið okkar um borgina sjáum við merkar byggingar sem segja sögu liðins tíma, hér er iðandi mannlíf á strætum, kaupmenn á hverju horni og kaffihús og veitingastaðir víða. Héðan liggur leið okkar til Topes de Collantes sem er einstakur þjóðgarður, sannkallaður sælureitur. Það er mikil upplifun að ganga La Codina slóðina því hér kynnumst við náttúrunni í sinni fegurstu mynd. Við snæðum hádegismat í garðinum en síðan er ekið áfram á náttstað í bænum Trinidad. Hér gistum við á dæmigerðu kúbversku hóteli, kynnumst gestrisni heimamanna og smökkum kúbverskan heimilismat.

  • Morgunmatur
  • Hádegismatur
  • Kvöldmatur

29. október | Trinidad – Playa Ancon

Í dag tökum við fram hjólin. Fram undan er fremur stutt og þægileg leið til Playa Ancon, hvítrar baðstrandar við Karabíska hafið. Þessi undurfagra strönd er sú fallegasta á Kúbu og hér er tilvalið að taka sundsprett og njóta sólar um stund áður en við stígum reiðfákana á ný og hjólum aðra leið til baka. Síðdegið er frjálst og upplagt að rölta um og skoða þennan heillandi bæ. Hér eru litríkar götur og steinlögð stræti, söfn af ýmsum toga og iðandi markaðstorg. Trinidad er einstakur bær þar sem yfirbragð spænska nýlendutímans hefur varðveist og það er eins og við stígum inn í nýjan, framandi og spennandi heim. Kvöldverður á eigin vegum.

  • Vegalengd: ca 30 km
  • Hæðarmunur: ca + 130 m. / -130 m
  • Erfiðleikastig: létt
  • Morgunmatur

30. október | Trinidad – Cienfuegos

Hjólaleið dagsins er frá Trinidad í dásamlegan skrúðgarð nærri Cienfuegos. Við snæðum hádegismat í þessum unaðsreit þar sem hvers kyns hitabeltisgróður vex við náttúrulegar aðstæður. Héðan er hópurinn fluttur til Cienfuegos og eftir stutta skoðunarferð um bæinn skráum við okkur inn á hótel. Þetta er borg á stærð við Reykjavík sem varðveitir ýmsar merkar byggingar og veitir innsýn í liðna tíð því þegar farið er um sumar götur er eins og tíminn hafi staðið í stað einhverja áratugi. Sjón er sögu ríkari. Hér er um að gera að rölta um nánasta umhverfi hótels, finna sér svo veitingastað og snæða kvöldverð.

  • Vegalengd: ca 66 km
  • Hæðarmunur: ca + 445 m. / -438 m
  • Erfiðleikastig: miðlungserfið
  • Morgunmatur
  • Hádegismatur

31. október | Cienfuegos – Playa Larga

Í dag ferðumst við með vagni til þorpsins Navarra þar sem hjólaferð dagsins hefst. Leiðin í dag býður upp á breytilegt landslag. Við hjólum m.a. um stærsta votlendið á Kúbu, stöldrum við á Playa Giron ströndinni og fræðumst um „Bay of Pigs“ innrásina frægu árið 1961. Við hjólum stuttan spöl eftir ströndinni til Caleta Buena þar sem okkar bíður hádegismatur. Caleta Buena er dásmleg friðlýst vík sem iðar af ýmsum tegundum fiska sem aðeins finnast í volgum sjó. Hér er magnað að vera og skoða. Héðan flytur rútan okkur á náttstað á hóteli í Playa Larga.

  • Vegalengd: ca 71 km
  • Hæðarmunur: ca + 167 m. / -205 m
  • Erfiðleikastig: létt
  • Morgunmatur
  • Hádegismatur
  • Kvöldmatur

1. nóvember | Playa Larga – Matanzas

Rútan flytur hópinn stutta leið í bæinn Jaguey Grande þar sem hjólreið dagsins hefst. Við hjólum í gegnum landbúnaðarhérað með fram litríkum og ilmandi sítrusökrum þar til við komum til Finca Coincidencia og þar snæðum við hádegisverð að hætti heimamanna. Þetta er búgarður með lífræna ræktun í miðju Matanzas héraði. Hérað þetta er nokkuð þekkt fyrir stóriðju en hér eru meðal annars olíuhreinsunarstöðvar og sykurverksmiðjur. Héðan er hópurinn fluttur til borgarinnar Matanzas þar sem gist verður.

  • Vegalengd: ca 57 km
  • Hæðarmunur: ca + 184 m. / -122 m
  • Erfiðleikastig: létt
  • Morgunmatur
  • Hádegismatur

2. nóvember | Matanzas – Havana

Hjólin bíða okkar við hótelið og við leggjum af stað eftir morgunverð. Umferð kann að reynast erfið fyrst um sinn í borginni en þegar við tökum stefnu á Ceiba Mocha og hjólum upp Picadura dal förum við að njóta útsýnis yfir dalinn og stöku þorpa sem á leið okkar verða. Lokakaflann hjólum við á ströndinni og komum tímanlega í bæinn til að njóta hádegisverðar. Upplagt að gefa sér tíma í sundsprett áður en rútan flytur hópinn á upphafsreit á hótelið í Havana.

  • Vegalengd: ca 62 km
  • Hæðarmunur: ca + 537 m. / -533 m
  • Erfiðleikastig: miðlungserfið
  • Morgunmatur
  • Hádegismatur

3. nóvember | Frjáls dagur í Havana

Daginn í dag eigum við frjálsan í Havana. Þá er um að gera að ganga um gömlu borgina og njóta nýlendutöfranna sem yfir henni svífa, skoða mannlífið og njóta þess að vera á þessum framandi og fagra stað. Borgin er uppfull af sögulegum stöðum og byggingum, söfnum og görðum. Við mælum með göngu eftir El Malecón strandlengjunni við miðborgina en frá henni er fínasta útsýni yfir flóann og ekki síður til fjölmargra merkra bygginga. Malecón nær alla leið frá höfninni til elsta borgarhlutans í Vedado. Í Vedado má finna dásamlega garða á borð við Colón kirkjugarðinn, hinn smáa og fallega John Lennon garð og El Nacinal lystigarðinn. Þeir sem þurfa hvíldar við eftir tveggja vikna hjólreiðar geta slakað á við sundlaugarbakkann á hótelinu með Cuba libre drykk í hönd. Um kvöldið er um að gera að skella sér í dansskóna, snæða kvöldverð, finna stað sem spilar lifandi tónlist og taka einn snúning eða tvo.

  • Morgunmatur

4. nóvember | Heimferð – Toronto

Dagurinn hefst fyrir allar aldir og við höldum út á flugvöll fyrir brottför flugs kl. 7:00 til Toronto. Lent verður þar kl. 10:25 að staðartíma. Flogið áfram til Íslands kl. 19:30.

  • Morgunmatur

5. nóvember | Toronto – Keflavík

Lending í Keflavík kl. 6:10 að staðartíma, eftir tæplega 5,5 klst. flug. 

Myndir úr ferðinni

Fararstjórn

Bjarni Torfi Álfþórsson

Bjarni Torfi Álfþórsson er fæddur 1960, menntaður lögreglumaður, grunnskólakennari og kerfisfræðingur. Hann starfaði í átta ár í umferðardeild lögreglunnar í Reykjavík, þrjú ár sem grunnskólakennari og í 11 ár í hugbúnaðargeiranum. Frá árinu 2011 hefur Bjarni verið framkvæmdastjóri Specialisterne á Íslandi.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00