Gengið & siglt á Mósel

Móseldalurinn er einstaklega fallegt svæði og ekki er sagan síðri í Tríer, elstu borg Þýskalands. Í dag ætlum við að ganga um borgina og út fyrir hana. Við göngum að rómverska hliðinu, Porta Negra, skoðum rústir af fornum rómverskum baðhúsum, lítum við í dómkirkju borgarinnar, Þriggja konunga húsinu og á markaðstorginu. Við göngum svo yfir Mósel ána, eftir Rómversku brúnni, upp í hlíðina ofan við bæinn og að Maríu súlunni en þaðan er einstakt útsýni yfir borgina og Mósel. Þar er líka kaffihús og lítil kapella sem gaman er að skoða.

Nú er komið að því að kveðja þennan yndislega bæ, Tríer, og halda í siglingu um árnar Saar, Mósel og Rín. Ekið verður til Saarlouis þar sem skipið MS Leonardo da Vinci bíður okkar. Við munum gista fjórar nætur um borð í þessu glæsilega skipi í vel búnum káetum með tveimur rúmum og útsýnisglugga. Þjónað er til borðs í hádeginu og á kvöldin en á morgnana er hlaðborð. Á meðan á siglingu stendur eru flestir drykkir innifaldir bæði með mat og á barnum í gestasalnum. Uppi á sóldekki eru legustólar til reiðu. Þegar við höfum komið okkur fyrir hittum við ferðafélagana og áhöfn í móttökuathöfn og snæðum kvöldverð um borð. Á meðan á kvöldverði stendur leggur skipið frá höfn til Merzig en þangað verður komið seint um kvöldið. 

Um morguninn verður siglt frá Merzig til Saarburg en meðan á morgunverði stendur njótum við siglingarinnar um frægu Saar slaufuna sem myndar smáeyjar þar sem líf villtra fugla blómstrar. Seinnipart morguns komum við að landi í Saarburg. Þessi rómantíski bær, fyrrum aðsetur kjörfurstanna af Trier en nú miðstöð vínverslunar í Saarlandi, liggur í Dreiländereck eða einmitt þar sem löndin Þýskaland, Frakkland og Lúxemborg mætast. Hér hefjum við fyrstu gönguferðina okkar og höfum með okkur góðan nestispakka. Gangan er um 10 km löng og rúta ekur okkur upp að rómversku virki að nafni Klause Kastel sem stendur á himinháum kletti yfir Saardalnum. Þaðan er gengið á stíg með fram hamraveggjum, yfir tún og um skóglendi til baka til Saarburg en stoppað til að njóta útsýnisins yfir dalinn. Skipið leysir landfestar á meðan við siglum í fögru landslagi Móseldalsins sem umvefur okkur þennan dag. Slökun uppi á dekki eða í setustofu skipsins MS Leonardo da Vinci fram að kvöldverði. 

Njótið morgunverðar um borð í skipinu. Fyrir hádegi verður komið að landi í Cochem en þennan dag fáum við tækifæri til að skoða hið stórkostlega landslag miðju Móseldalsins í göngu um svæðið. Ganga dagsins er u.þ.b. 11 km. Við fylgjum voldugum klettaveggjum Brauselay, þröngum göngustígum umkringdum vínökrum og kemur fjölbreytileiki náttúrunnar okkur oft á óvart. Við njótum ægifagurs útsýnis yfir þennan fallega dal. Komum að pílagrímskirkju heilagrar Maríu og Magdalenu þar sem er að finna hæsta punktinn í þessari göngu. Göngum eftir fjallshrygg Valwiger Berg fjallsins sem myndaðist í einni Mósel slaufunni. Njótum stórfenglegs útsýnis til Reichsburg kastalans og yfir Móseldalinn. Áfram haldið niður svolítinn bratta til baka til skips. Hádegisverður á skipinu. Eftir matinn fáum við tækifæri til að slaka á og njóta útsýnisins á meðan við siglum niður Mósel. Seint um kvöldið verður lagt að landi í Koblenz þar sem árnar Rín og Mósel mætast.

Á meðan á morgunverði stendur verður siglt áfram um eitt af fallegustu landsvæðum Evrópu, um Rínardalinn til Rüdesheim. Siglt er hjá hinum sögufræga Loreley kletti, höllum og köstulum sem tróna uppi á klettasyllum og hæðum. Um hádegisbil skellum við okkur í gönguskóna. Við göngum stuttan kafla af Rínarstígnum, Rheinsteig, en heildaganga dagsins er u.þ.b. 9 km. Gengið á mjóum stígum og svifið yfir vínökrum Rüdesheim í stólalyftu, upp að minnismerkinu Niederwald. Þaðan er fagurt útsýni yfir ána Rín. Göngum áfram með fram skóginum og njótum útsýnisins. Gengið verður í gegnum skóginn Niederwald og niður til Rüdesheim. Seinni hluta dagsins njótum við siglingarinnar í rómantíska Rínardalnum og siglum fram hjá virkjum og kastölum. Nú leggur MS Leonardo da Vinci af stað í átt að Strassborg. Um kvöldið bíður okkar hátíðarkvöldverður, tónlist og dans. 

Eftir yndislega siglingu og gönguferðir kveðjum við áhöfnina í Strassborg. Strassborg er einstaklega áhugaverð borg með sjarmerandi gömlum húsum og vatnavegum en áin Ill rennur um borgina. Þessi höfuðstaður Alsace héraðsins stendur í Frakklandi rétt við landamæri Þýskalands. Hér kallast gljáandi ný háhýsi, eins og Evrópubyggingin, á við eldri hluta borgarinnar með sögulegu
bindingsverkshúsunum. Við göngum inn í gamla hluta borgarinnar og skoðum sögufrægu Münsterkirkjuna en inni í kirkjunni er mjög merkilegt stjörnu- og sólúr. Frjáls tími gefst síðan fyrir hvern og einn til að fá sér hressingu, líta inn til kaupmanna eða ganga um hverfið Litla Frakkland. Kvöldverður á eigin vegum.

Nú er komið að heimferð en brottför er frá Frankfurt kl. 14:00 og lending í Keflavík kl. 15:40.