Páskar á Mallorca

Glæsilegur dagur í heillandi höfuðborginni Palma með sínum gullnu ströndum og hrífandi márískum og gotneskum arkitektúr. Santa María dómkirkjan, sem oft er kölluð La Seu, er glæsilegt meistaraverk gotneskrar byggingalistar og rís hátt sem tákn borgarinnar við Palma flóann. Við hlið hennar er Almudanína höllin, fyrrum vígi Mára, sem þjónar nú konungshjónunum við opinber tækifæri. Á göngu okkar um líflegar götur borgarinnar sjáum við falleg stórhýsi og mikilfengleg torg en við förum einnig eftir þröngum götum fyrrum gyðingahverfisins El Call. Rétt utan við borgina rís miðaldakastalinn Castell de Bellver en þar er stórkostlegt útsýni yfir borgina.

Í dag verður haldið í Drach dropasteinshellana í bænum Porto Cristo sem eru einn vinsælasti ferðamannastaður Mallorca. Hellarnir byrjuðu að myndast fyrir um 11 milljónum ára, þeir eru um 1.200 m langir og þar sem þeir eru dýpstir eru þeir um 25 m neðanjarðar. Í hellunum er líka eitt stærsta neðansjávarvatn heims, Martel vatnið, og á siglingunni umleikur okkur ólýsanleg fegurð sem er heilt ævintýri að upplifa. Næst verður áð í miðbæ Porto Cristo sem er heillandi sjávarþorp sem hefur haldið vel upprunalegum sjarma sínum. Á gangi um bæinn má sjá gömul steinhús, glæsileg setur og bátaflotann í höfninni. Síðasti áfangastaður dagsins er Mondragó náttúrugarðurinn þar sem finna má afar fjölbreytt landslag og gróður. Hér eru m.a. villtir ólífu-, furu- og eikarskógar, orkídeur, s‘Amarador tjörnin og stórbrotin strandlengja. Í lok dags gefst tækifæri til að smakka á matvælum úr héraði á veitingastað.

Stórbrotin náttúrufegurð umvefur okkur á leið til Valldemossa sem er einn elsti bær Mallorca og stendur hæst í hlíð Tramuntana fjallanna en fjöllin eru á heimsminjaskrá UNESCO. Valldemossa er ein af perlum eyjunnar og einn vinsælasti ferðamannabærinn með sínum þröngu, hlykkjóttu götum og miðalda andrúmslofti. Sagan segir að pólska tónskáldið Fédéric Chopin og elskhugi hans, rithöfundurinn George Sand, hafi eytt einum vetri í Royal Carthusian klaustrinu og dvölin hafi verið innblástur fyrir bók Sand, Vetur á Mallorca. Hér er einnig að finna San Bartomeu kirkjuna og höll Sancho konungs. Við gefum okkur góðan tíma hér til að kanna litskrúðugt líf bæjarbúa. Leið okkar heldur áfram norður til heillandi þorpsins Deià sem hefur í gegnum tíðina laðað að sér fjölda listamanna og áhugaverðra einstaklinga sem er ekki að furða þar sem umhverfið er draumkennt. Náttúran í kring er gróskumikil og það er gaman að rölta um steinlagðar götur þessa fallega bæjar. Við endum daginn á heimsókn í ólífuolíu myllu og á bodega vínbar þar sem gaman er að bragða á framleiðslu svæðisins.

Nú eru rólegheit og slökun á dagskrá hjá okkur í dag. Vel má njóta sólar við sundlaugina og eins nýta sér alla aðstöðu hótelsins.

Við höldum áfram að slaka á í dag. Göngutúr eftir strandlengjunni svíkur engan og svo má ekki gleyma að fá sér sundsprett í Miðjarðarhafinu við fallegustu strendur eyjunnar.

Dagurinn hefst á heimsókn í fornleifauppgröft frá bronsöld þar sem við dáumst að híbýlum og menningarsvæðum um 3000 ára gamallar byggðar. Ses Païsses er einn mikilvægasti og best varðveitti fornleifastaðurinn á Baleareyjunum en hann er staðsettur á hæð og umkringdur fornum eikartrjám og glæsilegum steinvegg. Höldum áfram til smábæjarins Artá þar sem við göngum um gamla bæinn og dáumst að virkismúrum frá 17. öld sem byggðir voru til að vernda bæjarbúa fyrir árásum vígamanna. Hér er sannarlega þess virði að ganga 180 þrep upp á hæð þar sem finna má Santuari Sant Salvador helgidóminn sem byggður var á 15. öld en þaðan er frábært útsýni. Upplagt er að fá sér snarl á einum af mörgum veitingastöðum á Plaza del Conquistador og drekka í sig andrúmsloft bæjarins.

Í dag höldum við á nyrsta punkt Mallorca, Cape Formentor, þar sem við skoðum vita og njótum stórbrotins útsýnis yfir hafið og fjöllin í kring. Höldum því næst áfram til litla bæjarins Alcudia þar sem stór hluti miðalda borgarmúranna er enn varðveittur en hægt er að greina tvær raðir af veggjum, eina frá miðöldum og aðra frá endurreisnartímanum, sú fyrri hefur þó varðveist mun betur. Á bak við þessa stórkostlegu víggirðingu liggur sögufrægur miðbærinn með sínum heillandi steinsteyptu götum og fjölda halla með glæsilegum endurreisnargluggum. Nokkrir af áhugaverðustu stöðum bæjarins eru Sant Jaume og Santa Ana kirkjurnar og einu ósnortnu rústir rómversks leikhúss á Mallorca.

Bærinn Sollér er fyrsti áfangastaður dagsins en hann er fallegur bær í hjarta Valle de las Naranjas eða Appelsínudalnum en hér er mikil appelsínu- og sítrónurækt. Upphaf velmegunar bæjarins má rekja til byrjunar 19. aldar en þá hófst appelsínu- og sítrónuútflutningur yfir til Frakklands. Um svipað leyti fóru margir þangað í leit að vinnu og komu síðan með auð sinn til bæjarins og reistu fallegar byggingar í Art Nouveau stíl sem prýða Sóller. Í bænum má einnig finna fallegar byggingar sem hannaðar voru af Joan Rubió i Bellver sem var lærisveinn Gaudí, þar ber hæst framhlið kirkjunnar og Banco del Sóller byggingin. Annað heillandi þorp sem við lítum á er Fornalutx en þetta 700 íbúa þorp hefur unnið til nokkurra verðlauna sem fallegasta þorp Spánar. Hér má finna náttúrusteinshús sem eru svo dæmigerð fyrir Mallorca og ef þú gengur eftir þröngum, steinlögðum götum bæjarins er næsta víst að þú munt rekast á falleg torg. Við endum á daginn á heimsókn á appelsínu- og sítrónuplantekru þar sem við lærum allt um sögu appelsínutrjánna frá Sollér.

Í dag er upplagt að skoða sig betur um á eigin vegum og njóta þess að hafa nægan tíma til að rölta um, sýna sig og sjá aðra. Áhugasamir geta litið inn á kaupmenn og á eitthvert hinna fjölmörgu kaffi- og veitingahúsa. Einnig er hægt að nota aðstöðuna við hótelið.

Nú er komið að því að kveðja Mallorca eftir yndislega daga og ógleymanlega upplifun. Siglum frá höfninni í Palma yfir til Barcelona og eftir komu þangað verður ekið á flugvöllinn en brottför frá Barcelona er kl. 22:10 og lending í Keflavík kl. 00:45 að staðartíma.
Fararstjóri getur fært dagskrárliði á milli daga eftir þörfum þegar komið er á staðinn.