Umbria & Toskana

Helgi staðurinn Assisi er yndislegur virkisbær frá miðöldum í miðju Umbria héraði og er bærinn á heimsminjaskrá UNESCO. Hér fæddist heilagur Frans sem var predikari og boðaði meinlætalíf og höfnun veraldlegra gæða. Hann stofnaði hér reglu heilags Frans og reglu heilagrar Klöru frá Assisi. Við heimsækjum saman kirkjurnar San Francesco og Santa Chiara en eftir það verður góður tími til að skoða sig um í þessum fallega, gamla miðaldabæ.

Þessi ljúfi dagur hefst í fallega bænum Orvieto í Umbria héraði sem byggðist upp á flötum móbergsstapa. Bærinn er frægur fyrir stórkostlega dómkirkju frá 13. öld, Pozzano di San Patrizio brunninn frá 16. öld og hvítvínið sem er af mörgum talið eitt besta hvítvín landsins. Farið verður í stutta skoðunarferð um gersemar bæjarins og síðan er upplagt að fá sér hressingu og kanna líf bæjarbúa. Háborg miðaldana í Toskana héraði, Montepulciano, er næst á dagskrá. Hún hvílir á kríthvítri hæð þar sem dalirnir Val d‘Orcia og Val die China mætast. Allt um kring, hvert sem litið er, blasa við vínakrar, þetta er fullkomið landslag fyrir póstkort. Borgin er einmitt fræg fyrir heimsþekkta vínið Vino Nobile og því er upplagt að líta inn á einn vínbónda héraðsins og fá sér snarl.

Perugia er ekki aðeins sú stærsta, heldur einnig ein fallegasta borg Umbria héraðsins. Borgin er staðsett í 450 m hæð en þaðan er frábært útsýni yfir á Apenninefjöllin og þorpin í kring um Lago Trasimeno vatnið. Farið er upp í borgina með rúllustiga en hún er ein af fornu virkisborgunum og ber þess enn merki. Perugia var ein öflugasta borg Etruskan heimsveldisins á 6. öld f.Kr. Hjarta borgarinnar er torgið Piazza Grande með brunninum Maggiore. Við förum í skoðunarferð um borgina en að henni lokinni verður tími til að fá sér hressingu og líta inn í verslanir borgarinnar á vinsælu göngugötunni Corso Vannucci. Komið snemma heim á hótel.

Kveðjum Perugia eftir yndislega daga og tökum stefnuna á Marken héraðið en á leiðinni þangað verður áð í bænum Gradara sem sumir segja að sé einn vinsælasti ferðamannastaður Ítalíu. Miðalda borgarmúrinn sem umlykur borgina og kastalinn eru þeir best varðveittu á Ítalíu. Virkisveggirnir voru oft leiksvið bardaga sem voru háðir á milli kirkjuríkisins og íbúa Marken héraðs. Gradara er einnig þekkt fyrir sorgarsögu elskenda, sem þjóðskáldið Dante skrifaði um í Hinum guðdómlega gleðileik.
Hér verður farið í skemmtilega skoðunarferð um kastalann og þennan yndislega bæ. Eftir það verður ekið til Pesaro þar sem gist verður í þrjár nætur á hóteli við ströndina.

Eftir ys og þys undanfarinna daga er kærkomið að slaka á við hótelið, kanna umhverfið og líta inn í gamla bæinn Pesaro. Hann er þekktastur fyrir að vera fæðingarstaður Gioachino Rossini og er vinsæll ferðamannastaður. Gullnar náttúrustrendur og fjölmargar sögulegar byggingar prýða borgina og gaman er að rölta um litrík torg og setjast niður á skemmtilegum kaffi- og veitingahúsum.

Í dag er spennandi ferð á dagskrá. Við ætlum að heimsækja elsta lýðveldi í heimi, San Marínó, smáríkið sem er í 643 m hæð yfir sjó við jaðar Apenninafjalla. Náttúrufegurðin umvefur borgina sem hringar sig upp fjallið Monte Titano en hæsti tindur þess er 749 m. Þar tróna þrír kastalar á toppi fjallsins og útsýnið yfir héraðið er ægifagurt. Hér er margt að upplifa, tilkomumiklar og virðulegar byggingar setja mikinn svip á borgina og á göngu um smáríkið verða m.a. á vegi okkar stjórnarhöllin, Basilica di San Marino og kastalinn La Rocca, að ógleymdum virkisveggjunum.

Nú er komið að heimferð eftir góða daga á Ítalíu. Lagt verður snemma af stað út á flugvöll í Mílanó. Brottför er þaðan kl. 15:45 og áætluð lending í Keflavík kl. 18:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.