San Sebastián & Loire dalurinn

San Sebastian og baðströnd hennar hefur verið einn þekktasti ferðamannastaður Baskalands allt síðan á 19. öld. Skeljalagað form La Concha strandarinnar gerir bæjarstæðið undurfagurt. Förum í skoðunarferð um borgina og um elsta hluta borgarinnar þar sem við fetum m.a. í fótspor kvikmyndastjarna en ár hvert er haldin kvikmyndahátíð í borginni. Eftir hádegi verður frjáls tími til að njóta lífsins við töfrandi Biscay flóann og nota glæsilegu aðstöðuna við hótelið okkar. Kvöldverður á eigin vegum.

Bilbao er ein helsta hafnarborg Spánar. Eitt frægasta kennileiti borgarinnar er hið fræga Guggenheim listasafn sem hannað var af Frank Gehry. Farið verður í fróðlega skoðunarferð en söguleg arfleifð og menning sést vel á arkitektúrnum og glæsilegum byggingum sem skreyta elsta hluta borgarinnar. Við endum skoðunarferðina á að upplifa Guggenheimsafnið sem er alveg magnað. En auðvitað verður líka tími til að endurnærast á einum af vínbörunum eða tapasveitingastöðunum sem borgin er þekkt fyrir. Kvöldverður innifalinn

Nú ætlum við að njóta þess að vera á þessum yndislega stað við La Concha stöndina. Upplagt er að taka tannhjólakláfinn niður að ströndinni og fara í gönguferð inn í bæinn sem er mjög líflegur og skemmtilegur. Einnig er hægt að fara í stutta siglingu frá litlu bátahöfninni um Concha flóann, fram hjá Santa Klöru eyjunni og um tangann þar sem elsti hluti borgarinnar stendur. Magnað er að ganga upp á Urgell fjallið þar sem Jesú styttan vakir yfir en þaðan er glæsilegt útsýni yfir bæinn og flóann og finna má leifar frá Castillo de la Mota kastala og virki. Á norðurhlið fjallsins er kirkjugarður fallinna breskra hermanna sem féllu í Napóleonsstríðinu árið 1813. Eftir hádegi er upplagt að nota þessa frábæru aðstöðuna okkar við hótelið, fá sér sundsprett og slaka á við fallegu ströndina. Kvöldverður á eigin vegum

Dásemdardagur í bænum Biarritz sem er einn af strandperlum Frakklands með eina frægustu baðströnd í heimi. Þetta fallega borgarstæði er á milli klettóttrar Atlantshafsstrandarinnar og Pýreneafjallanna í Baskalandi Frakklands. Skoðum okkur um í þessum sjávarbæ sem hefur í gegnum tíðina dregið til sín stjörnur og fyrirfólk. Aðdráttarafl svæðisins er meðal annars vitinn við ströndina og litla klettaeyjan Rocher de la Vierge sem á sér mikla sögu. Eftir skoðunarferðina er frjáls tími og upplagt að fá sér hressingu og kanna líf bæjarbúa á eigin vegum. Tilvalið að taka með sér sundföt og njóta strandanna. Kvöldverður innifalinn

Stuttur dagur í miðaldavirkisbænum Hondarribia og förum í skemmtilega skoðunarferð um þennan fallega bæ en hann státar sig m.a. af glæstum torgum og höllum fyrrum aðalsætta. Sjávarhverfið La Marina stendur fyrir utan borgarmúrana og er líklega elsti hluti Hondarribia með dæmigerðum, litríkum húsum og fallegri strandlengju. Eftir góðan tíma þar væri upplagt að snæða hádegissnarl á tapasbar. Kvöldverður á eigin vegum.

Yndislegur dagur í San Sebastian. Upplagt að skoða borgina betur á eigin vegum og njóta þess að hafa nægan tíma til að rölta um götur hennar, sýna sig og sjá aðra. Áhugasamir geta litið inn á kaupmenn og á eitthvert hinna fjölmörgu kaffi- og veitingahúsa. Einnig er hægt að nota aðstöðuna við hótelið sem er frábær, sóla sig og njóta útsýnis yfir La Concha ströndina. Kvöldverður innifalinn

Nú er komið að því að kveðja San Sebastian eftir ljúfa daga. Ekið verður til Blois í Loire dalnum sem er rómaður fyrir fegurð og er blómlegt landbúnaðarhérað en lengsta á Frakklands, Loire, rennur um dalinn. Gist verður í þrjár nætur í Blois. Kvöldverður innifalinn

Í dag verður farið í skoðunarferð um skemmtilegu og litríku borgina Blois. Við förum í gönguferð um elsta hluta bæjarins en á 15. og 16. öld var borgin hallarborg og einn mikilvægasti verslunarstaður héraðsins. Eftir hádegi verður frjáls tími til að skoða sig um á eigin vegum og líta inn til kaupmanna borgarinnar. Einnig er hægt að fara í skoðunarferð um stórglæsilega kastalann sem prýðir borgina og var uppáhaldsbústaður Lúðvíks VII en kastalagarðurinn er einnig mjög fallegur. Kvöldverður á eigin vegum

Í dag ökum við fram hjá ótal glæsihöllum á undurfagri leið um Loire dalinn sem stundum er nefndur blómagarður Frakklands. Þó dalurinn sé þekktastur fyrir hinar stórkostlegu hallir og kastala sem voru leiksvið konunganna í margar aldir hefur hann líka upp á ýmislegt annað að bjóða eins og vínekrur og ljúffenga matargerðarlist. Við ætlum að aka að hinni stórkostlegu Chambord höll sem er næststærsta höll Frakklands á eftir Versalahöll og gerum þar myndastopp. Síðan heldur ferð áfram suður að franska bænum Chenonceaux sem hefur að geyma glæsilega hvíta endurreisnarvatnahöll, Château de Chenonceau, en aðalbygging hennar er umvafin Cher ánni sem er hliðará Loire. Arkitektúr hallarinnar og bogaturnarnir eru hrífandi en hér ætlum við í skoðunarferð um höllina og garðinn sem er undurfagur. Eftir góðan tíma hér verður vínbóndi sóttur heim þar sem við fáum okkur snarl og auðvitað smökkum við afurðir bóndans. Þar er einn elsti vínkjallari dalsins sem er 145 ára gamall og var handgrafinn. Við ætlum einnig að kynnast vínframleiðslu bóndans á göngu um einn af vínökrum hans. Kvöldverður innifalinn

Eftir töfrandi og skemmtilega ferð verður ekið á flugvöll í París og er brottför kl. 22:25 og lending í Keflavík kl. 23:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.