Ítalíudraumur

23. ágúst - 5. september 2020 (14 dagar)

Hér er í boði sannkallaður Ítalíudraumur. Glæsilegir áfangastaðir og mikil náttúrufegurð gæla við okkur í þessari ferð. Ferðin hefst í Mílanó en þaðan er ekið til pílagrímsbæjarins Loreto áður en farið er á náttstað í Ancona. Næst er farið um Puglia héraðið og perlan Martina Franca, háborg barokksins í dalnum Valle d’Itria, heimsótt. Bærinn Alberobello heillar en hann er einn áhugaverðasti staður svonefnds Trulli svæðis og varðveittur á heimsminjaskrá UNESCO. Hér gefur að líta hvítkölkuð steinhús með keiluþökum sem bera nafn svæðisins og eru kölluð Trulli hús. Það er mögnuð upplifun að koma til Matera borgar þar sem heilu húsin, íbúðirnar og hallirnar eru grafnar inn í klettana. Eftir dásemdartíma hér er ekið til Sorrento við Napólíflóa, þar sem við njótum ljúfra daga. Á leiðinni verður áð í Pompei, sem geymir frægustu fornminjar veraldar. Farið verður í ævintýralega siglingu til Caprí, sæbrattrar klettaeyju þar sem siglt verður í Bláa hellinn og farið með stólalyftu upp á hæsta fjall eyjunnar, Monte Solaro. Við bæði siglum og ökum með Amalfíströndinni sem er ein fallegasta strönd Ítalíu. Í bænum Marina di Massa í Toskana héraði njótum við lífsins áður en ekið verður til Chamonix í Frakklandi sem stendur við rætur hæsta fjalls Evrópu, Mont Blanc.

Verð á mann 377.700 kr.

Aukagjald fyrir einbýli 79.900 kr.


Innifalið

  • 8 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður á hótelum.
  • Allar skoðunarferðir með rútu samkvæmt ferðalýsingu.
  • Ferja til og frá Caprí og litlir strætisvagnar um Caprí.
  • Sigling og ferð með smárútum með fram Amalfíströndinni.
  • Íslensk fararstjórn.

Ekki innifalið

  • Aðgangseyrir inn í söfn, hallir, kláfa og kirkjur.
  • Siglingar.
  • Hádegisverðir.
  • Þjórfé.

Valfrjálst

  • Aðgangur inn í Pompei ca € 19.
  • Sigling og önnur sigling inn í Bláa hellir ca € 33.
  • Kláfur upp á Monte Solaro fjall ca € 12.

Kort af ferðinni

FerðalýsingPrenta ferðalýsingu

23. ágúst | Flug til Mílanó & Turate

Brottför frá Keflavík kl. 13:55 og mæting í Leifsstöð í síðasta lagi 2,5 klst. fyrir brottför. Lending í Mílanó kl. 19:40 að staðartíma. Gist verður í eina nótt í Turate, sem er í nágrenni Mílanó.

24. ágúst | Mílanó & Ancona

Eftir góðan morgunverð og rólegheit verður ekið til Ancona við Adríahaf, höfuðborgar héraðsins Marche. Sögu hennar má rekja aftur til 5. aldar f. Kr. þegar Grikkir flúðu frá Syrcuse, settust hér að og gáfu borginni nafnið Ancona. Hér verður gist í eina nótt. Áður en ekið verður á hótel verður farið inn í hinn þekkta pílagrímsbæ Loreto þar sem við lítum á kirkjuna Santuario della Santa Casa. Þjóðsagan segir frá því að 4 englar hafi flutt hús heilögu fjölskyldunnar eða Maríu meyjar frá Nazaret til Loreto og síðan hafi kirkjan verið byggð utan um það. Á þetta að hafa gerst rétt áður en krossfararnir töpuðu svæðinu til heiðingjanna. Mjög áhugavert er að skoða kirkjuna og alla umgjörð hennar sem er svo hrífandi.

25. ágúst | Héraðið Puglia & Martina Franca

Ferðin heldur áfram og eftir morgunverð verður ekið inn í Puglia héraðið. Hér munum við gista fjórar nætur á hrífandi Trulli hóteli í útjaðri Martina Franka í dalnum Valle d’Itria. Á hótelinu er útisundlaug, sólbekkir, fallegur garður og líkamsrækt.

Opna allt

26. ágúst | Martina Franca & Alberobello

Þennan ævintýradag byrjum við í Martina Franca, háborg barokksins og höfuðstað dalsins Valle d’Itria. Við njótum þess að rölta um lífleg stræti gamla bæjarins, þar sem glæstar byggingar prýða borgina. Upplagt að fá sér hressingu á Piazza Plebiscito í hjarta bæjarins við meistaraverk barokksins, basilíkuna San Martino. Bærinn Alberobello, miðstöð Trulli svæðisins í Puglia, er mikil upplifun en árið 1996 var bærinn settur á heimsminjaskrá UNESCO fyrir sérkennilegar byggingar. Þar eru um 1.000 lítil og hringlaga hvítkölkuð, hlaðin steinhús með keiluþökum. Húsin eru einkennandi fyrir svæðið og voru notuð sem hús hjarðmanna og bænda en í stærsta húsinu er að finna merkilegt safn. Einstaklega heillandi er að ganga um götur bæjarins þar sem finna má fjölda minjagripaverslana og víða býðst að smakka á fljótandi gulli heimamanna, ólífuolíunni sem á þessum slóðum drýpur af hverju strái.

27. ágúst | Hellaborgin Matera & Altamura

Það er mikil upplifun að koma til borgarinnar Matera sem er á dagskrá okkar í dag en hún hefur verið á heimsminjaskrá UNESCO frá árinu 1993. Ólýsanlegt er að koma þangað og sjá hús, kirkjur og hallir frá 4. öld f. Kr. sem hoggnar eru inn í bergið og minna á gömlu Jerúsalem eða katakompurnar. Árið 1950 bjuggu enn um 20.000 manns hér en þessir hellabústaðir eru kallaðar Sassi. Á leiðinni til baka verður stoppað í Altamura til að skoða stæðilega dómkirkju með frægri gluggarós.

28. ágúst | Ljúfur dagur & slökun

Í dag gefst tækifæri til að slaka á og njóta þessa heillandi svæðis og náttúrufegurðarinnar sem umvefur okkur í dalnum Valle d’Itria. Nú er upplagt að láta fara vel um sig á hótelinu, nýta sér góða aðstöðu þess, setja tærnar upp í loft í sólbaðsaðstöðunni og njóta þess að taka lífinu með ró.

29. ágúst | Pompei & Sorrento við Napólíflóans

Nú kveðjum við Martina Franca eftir yndislega dvöl og er stefnan tekin á Sorrento við Napólíflóa, eins fallegasta flóa landsins. Á leiðinni þangað heimsækjum við Pompei og lítum á einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleik sögunnar. Eftir að hafa staldrað við í Pompei drykklanga stund höldum við áfram til Sorrento. Bærinn er einstaklega heillandi, byggður í bröttum hlíðum
þar sem vaxa ólífu- appelsínu- og sítrónutré, en þess má geta að Limoncello líkjörinn frægi kemur frá þessu svæði. Gist verður í fjórar nætur í Sorrento á góðu hóteli en þaðan er stórkostlegt útsýni yfir Napólíflóann.

30. ágúst | Sigling yfir á eyjuna Caprí

Nú verður siglt yfir á eyjuna Caprí, perlu Napólíflóans. Við skoðum eyjuna, siglum að bláa hellinum, Grotta Azzurra, og förum upp til Anacapri þar sem við njótum stórfenglegs útsýnis. Áhugasömum gefst einnig tækifæri til að fara með stólalyftu upp á fjallið Monte Solaro en þar lætur fegurðin ekki á sér standa. Jafnframt verður komið í bæjarhlutann Caprí og hægt verður að líta á kniplinga og alls kyns handunnar vefnaðarvörur, dúka, klæði og fatnað.

31. ágúst | Sigling & rúta með Amalfíströndinni

Ævintýralegur dagur í töfrandi dagsferð um Amalfíströndina þar sem fegurðin er svo sannarlega einstök. Við hefjum ferðina á siglingu eftir ströndinni til bæjarins Amalfí þar sem við stígum á land og skoðum okkur um. Á rölti um bæinn sjáum við glæsilega dómkirkju frá 10. öld, hrífandi veitinga- og kaffihús og litlar verslanir sem gaman er að kíkja inn í. Nú verður ekið með smárútum til baka eftir Amalfíströndinni um stórbrotin gil, milli smábæja og hótela sem hanga á klettabrúninni. Hvarvetna gefur að líta dásamlegt landslag. Við mælum eindregið með því að gestir gæði sér á grilluðum fiski í hádeginu, sem er einn helsti sérréttur íbúa svæðisins.

1. september | Dagur í Sorrento við Napólíflóa

Dagurinn er tilvalinn til afslöppunar. Fararstjórinn býður upp á stutta skoðunarferð um bæinn og eftir það er upplagt að kanna dásamlegt umhverfið í Sorrento, eins eftirsóttasta ferðamannabæjarins á Sorrento skaganum. Í bænum er fjöldinn allur af einstaklega heillandi, þröngum, gömlum götum, fögrum kirkjum og glæstum byggingum.

2. september | Sorrento & Marina di Massa

Nú kveðjum við þennan yndislega stað eftir góða daga. Ekin verður heillandi leið í gegnum Toskana hérað til Marina di Massa þar sem gist verður í 2 nætur.

3. september | Frjáls dagur í Marina di Massa

Góður dagur til að slaka á í Marina di Massa sem er yndislegur strandbær við Versillia ströndina. Hér er hægt að fara í göngu á ströndinni og líta inn í fínar verslanir, kaffihús og veitingastaði. Einnig er hægt að taka það rólega og njóta aðstöðunnar við hótelið.

4. september | Marina di Massa & Chamonix

Nú er komið að því að kveðja Marina di Massa. Stefnan er tekin á Chamonix í Frakklandi sem stendur við rætur hæsta fjalls Vestur-Evrópu, Mont Blanc. Chamonix er bær fjalladýrkenda og þekktur skíðabær en fyrstu vetrarólympíuleikarnir voru haldnir hér árið 1924. Frá miðbænum gengur útsýniskláfur upp í 3.842 m hæð á Aiguille du Midi en þaðan er stórkostlegt útsýni yfir á Mont Blanc, Chamonix og dalinn fyrir neðan. Gist verður í eina nótt á hóteli í miðbænum.

5. september | Heimferð frá Genf

Þá er Ítalíudraumurinn á enda eftir yndislega daga og skemmtilega samveru. Ekið verður til Genf en brottför þaðan er kl. 14:00 og lending í Keflavík kl. 15:50 að staðartíma.
Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00