Róm & Amalfíströndin

Róm, Sorrento, Amalfíströndin og eyjan Caprí eru sannkallaðar draumaperlur Ítalíu en kynngimögnuð fegurð þessara staða umvefur okkur í ferðinni. Hún hefst á flugi til Mílanó en þaðan heimsækjum við hina fögru Rómaborg sem var fyrsta borg heimsins til að ná einni milljón íbúa. Í borginni skoðum við Forum Romanum, Colosseum, Pantheon, Vatíkanið og Péturskirkjuna. Næst heimsækjum við hinn dásamlega Napólíflóa sem er einn fallegasti flói landsins og Sorrento, eftirsóttasta ferðamannabæ hans, þar sem við njótum ljúfra daga í slökun og notalegheitum. Á leið okkar þangað verður komið til Pompei sem geymir frægustu fornminjar veraldar. Boðið verður upp á ævintýralega siglingu til sæbrattrar klettaeyjunnar Caprí þar sem siglt verður í Bláa hellinn og farið með stólalyftu upp á hæsta fjall eyjunnar, Monte Solaro. Við siglum bæði og ökum með Amalfíströndinni, sem er ein fallegasta strönd Ítalíu, með viðkomu í bæjunum Amalfí og Positano. Einnig verður farið í stórbrotna og töfrandi ferð upp á eldfjallið Vesúvíus sem gnæfir í allri sinni dýrð yfir Napólíflóa í 1.280 m hæð. Ferðin endar í heilsubænum Montecatini Terme í Toskana þaðan sem við sækjum heim gamla virkisbæinn Lucca. Áður en haldið verður heim á leið gefst tækifæri til að kynnast heimsborginni Mílanó.

Verð á mann 414.400 kr.

Aukagjald fyrir einbýli 82.900 kr.


Innifalið

  • 13 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgunverður á hótelum.
  • Níu kvöldverðir.
  • Ferja til og frá Caprí.
  • Sigling & ferð með smárútum meðfram Amalfíströndinni. 
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Þrír kvöldverðir í Róm.
  • Vínsmökkun.
  • Hádegisverðir.
  • Þjórfé.

Valfrjálst

  • Aðgangur að fornminjum í Pompei ca € 18. 
  • Blái hellirinn ca € 30. 
  • Stólalyfta upp á Monte Solaro fjallið á Caprí ca € 12.
  • Aðgangur að Vesúvíus fjalli ca € 15.
  • Hádegishressing hjá vínbónda ca € 22.

Kort af ferðinni

FerðalýsingPrenta ferðalýsingu

6. júní | Flug til Mílanó

Brottför frá Keflavík kl. 16:45, mæting í Leifsstöð í síðasta lagi 2,5 klst. fyrir brottför. Lending í Mílanó kl. 23:00 að staðartíma. Gist verður í nágrenni flugvallarins fyrstu nóttina.

7. júní | Heimsborgin Róm

Leið okkar liggur til hinnar einstöku Rómaborgar. Hún var byggð á sjö hæðum og var á blómaskeiði sínu fyrsta borg heims til að ná einni milljón íbúa. Gist verður í þrjár nætur í þessari sögufrægu borg.

8. júní | Skoðunarferð um Rómaborg

Á dagskránni í dag er fróðleg skoðunarferð um hina fornu Róm og munum við staldra við á helstu stöðum borgarinnar. Meðal þess sem skoðað verður er Piazza Venezia, Kapítólhæð, Forum Romanum, Palatínhæð og munum við koma að Colosseum, Treví brunninum og Spænsku tröppunum. Einnig verður frjáls tími til að kynnast borginni og mannlífinu eins og hverjum og einum lystir.

Opna allt

9. júní | Péturskirkjan og frjáls dagur í Róm

Eftir morgunverð verður haldið að Vatíkaninu og Péturskirkjunni, meistaraverkum síns tíma. Þeir sem vilja geta farið upp í kúpul kirkjunnar. Frjáls tími verður eftir hádegi og verður þá hægt að skoða Sixtínsku kapelluna og safn Vatíkansins á eigin vegum. Í boði verður að aka inn í miðbæinn fyrir þá sem vilja skoða sig betur um í borginni og þar er upplagt að líta í verslanir, fá sér ítalskan hádegisverð á einhverjum veitingastaðnum og njóta þess sem borgin hefur upp á að bjóða.

10. júní | Fornminjar í Pompei & Sorrento

Nú kveðjum við Róm og ökum til Sorrento við Napólíflóa, eins fallegasta flóa landsins. Sorrento er hrífandi bær í bröttum hlíðum. Í hlíðum hans vaxa ólífu-, appelsínu- og sítrónutré en þess má geta að Limoncello líkjörinn frægi kemur frá þessu svæði. Á leiðinni þangað verður stoppað í Pompei þar sem skoðaðar verða einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleikann um söguna. Áður en farið verður í skoðunarferð um svæðið verður hægt að fá sér smá hressing á staðnum. Eftir góðan tíma hér heldur ferð okkar áfram til Sorrento þar sem gist verður í sex nætur á góðu hóteli en á leið okkar þangað upplifum við töfrandi fegurð Napólíflóans.

11. júní | Dagur í Sorrento við Napólíflóa

Dagurinn er tilvalinn í afslöppun. Fararstjórinn býður upp á stutta skoðunarferð um bæinn og eftir það er upplagt að kanna dásamlegt umhverfið í Sorrento. Í bænum er fjöldinn allur af einstaklega heillandi þröngum, gömlum götum og afskaplega fögrum kirkjum og glæstum byggingum, sem gaman er að kynna sér í rólegheitunum.

12. júní | Sigling til Caprí

Í dag höldum við í siglingu til Caprí, perlu Napólíflóans. Við skoðum eyjuna, siglum að bláa hellinum Grotta Azzurra og förum upp til Anacapri þar sem við njótum stórfenglegs útsýnis. Áhugasömum gefst einnig tækifæri til að fara með stólalyftu upp á fjallið Monte Solaro. Jafnframt verður hægt að fá sér hressingu og líta á kniplinga og alls kyns handunnar vefnaðarvörur, dúka, klæði og fatnað.

13. júní | Sigling & rúta með Amalfíströndinni

Haldið verður í töfrandi dagsferð um Amalfíströndina þar sem fegurðin er svo sannarlega einstök. Við hefjum daginn á ferð með smárútum meðfram ströndinni og hvarvetna gefur að líta dásamlegt landslag á þessari fallegu leið til bæjarins Amalfí, þar sem við stoppum og skoðum okkur um. Á rölti um bæinn sjáum við glæsilega dómkirkju frá 10. öld, heillandi veitinga- og kaffihús og litlar verslanir sem gaman er að kíkja inn í. Því næst verður farið í dásamlega siglingu með Amalfíströndinni til Sorrento en þaðan gefur að líta ægifagurt útsýni á fallegustu strandlengju Ítalíu og sjáum við þar hús, hótel og smábæi sem hanga utan í klettabrúninni. Á þessari ljúfu siglingu verður áð í Positano, einum þekktasta og vinsælasta ferðamannabæ Amalfístrandarinnar, áður en siglt verður til Sorrento. Við mælum eindregið með því að gestir gæði sér á grilluðum sjávarréttum í hádeginu en þeir eru einn helsti sérréttur svæðisins.

14. júní | Eldfjallið Vesúvíus í allri sinni dýrð

Stórbrotin og glæsileg ferð upp á eldfjallið Vesúvíus en það gnæfir í allri sinni dýrð yfir Napólíflóa í 1.280 m hæð og er mjög trúlega 200.000 ára gamalt. Eitt af þekktustu gosum fjallsins var árið 79 e. Krist en þá eyðilögðust borgirnar Pompei, Stabiae og Herculanum.

15. júní | Rólegheit & slökun

Þennan dag gefst heill dagur til þess að slaka á og njóta þess að vera á þessum yndislega stað. Sorrento er líflegur og skemmtilegur bær, þar er margt að skoða og tilvalið að kíkja í verslanir eða á kaffi- eða veitingahús. Einnig er hægt að slaka á við sundlaug hótelsins eða ganga niður að strandlengjunni.

16. júní | Heilsubærinn Montecatini Terme

Þá kveðjum við þennan góða stað eftir notalega daga. Ekin verður heillandi leið í gegnum Toskana hérað til Montecatini Terme þar sem gist verður í tvær nætur. Á hótelinu er heilsulind og hótelgarður með útisundlaug.

17. júní | Virkisbærinn Lucca & hádegissnarl hjá vínbónda

Í dag ætlum við að heimsækja borgina Lucca. Borgin er helst þekkt sem gömul virkisborg en á 13. og 14. öld var hún ein af valdamestu borgum Evrópu. Mikilfenglegir virkisveggir hennar frá miðri 17. öld eru enn uppistandandi. Tónskáldið Puccini er fæddur í borginni og er húsið sem hann fæddist í safn í dag. Við höldum í stutta skoðunarferð um helstu staði borgarinnar og að henni lokinni gefst tími til að kanna borgina á eigin vegum. Eftir það verður vínbóndi sóttur heim þar sem boðið verður upp á smá snarl og auðvitað vín bóndans.

18. júní | Heimsborgin Mílanó & heimferð

Eftir glæsilega ferð er kominn tími til að kveðja. Við hefjum daginn á morgunverði en svo verður ekið til heimsborgarinnar Mílanó. Þar verður farið í stutta göngu með fararstjóranum og síðan gefst tími til að fá sér létta hressingu, líta inn til kaupmanna og skoða sig betur um á eigin vegum. Upplagt er að fá sér kvöldverð áður en ekið verður út á flugvöll. Brottför þaðan kl. 22:50 og lent í Keflavík kl. 01:05 að staðartíma aðfaranótt 19. júní.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00