Fjöll & funi í Tíról

Ævintýralegur dagur er á dagskrá í dag. Ferðinni er heitið um Groβglockner Hochalpenstraβe sem liggur uppi í 2.571 m hæð, með hlíðum fjallsins fræga Großglockner, hæsta fjalli landsins. Þessi leið er sögð ein glæsilegasta alpaleið í Evrópu en á þessari leið er einstök náttúrufegurð og útsýnið stórbrotið. Á Franz Josefs hæðinni verður dvalið góða stund þar sem við njótum töfrandi útsýnis yfir á Pasterze, lengsta jökuls landsins. Þarna svífa yfir sjaldgæfir ránfuglar og einnig gætu orðið á vegi okkar alpageitur, búfénaður og múrmeldýr. Hér verður tími til að fá sér hressingu og ganga aðeins um svæðið. Um kvöldið fer fram sumarsólstöðuhátíð og verður lengsta degi ársins fagnað í sæluhúsi uppi í fjöllum. Á þessu svæði kallast þetta „Berge in Flammen“ eða „Sonnwendfeuer“ en hátt uppi í fjöllum er kveikt á kyndlum og sér maður hvarvetna fjöll í logum. Á miðöldum var þessum degi ársins ávallt fagnað með slíkum eldum, lifandi tónlist, góðum mat og hefur sú hefð haldist alla tíð síðan. Við fáum upplifað slíka hátíð í kvöld.

Í dag tökum við það rólega, njótum þess að vera á þessum fallega stað og upplagt að kanna líf bæjarbúa og fá sér góðan göngutúr. Matrei er yndislegur bær og eins konar miðpunktur héraðsins, en þar búa um 5000 íbúar. Stolt og perla bæjarins, Weißenstein höllin, trónar í 1029 m hæð yfir bænum og fallegar freskur skreyta hús og kirkjur. Frá Matrei er hægt að taka kláf upp á Goldried fjall sem er í 2.163 m hæð. Þar uppi opnast dásamlegur heimur og útsýni magnað. Einnig er hægt að ganga fjölskylduhringinn svonefnda sem er ca 5 km en þaðan er stórkostleg útsýni á Großglockner, hæsta fjall Austurríkis.

Við kveðjum Matrei eftir yndislega daga í Austur-Tíról. Nú er ekið til gömlu rómversku borgarinnar Regensburg í Þýskalandi þar sem gist verður í þrjár nætur á hóteli í miðbæ borgarinnar. Á leiðinni þangað verður stoppað í Kufstein við ána Inn með miðaldakastala sínum. Hann gnæfir yfir borginni með hetjuorgelið svokallaða, stærsta útiorgel í heimi.

Þessi ljúfi dagur byrjar við Marmarahöllina Walhalla við Dóná, sem er byggð í dórískum stíl en fyrirmynd hennar er Parthenon hofið í Aþenu. Bæverski konungurinn Ludwig I 1825-1848 lét reisa höllina sem telst eitt af meistaraverkum listsköpunar hans en mikil uppbygging var í borgum Bæjaralands á hans tíma. Þar er m.a. hægt að skoða brjóststyttur úr marmara af fyrirmönnum landsins. Útsýnið frá höllinni lætur engan ósnortinn. Þessu næst verður farið í siglingu á Dóná, næstlengsta fljóti Evrópu sem er 2.840 km. Með fram ánni eru ævafornar samgönguleiðir þar sem m.a. Niflungar ferðuðust um til hirðar Etzels konungs. Siglt verður að Weltenburg klaustrinu frá Kelheim. Þar er eitt elsta bjórbrugghús landsins, veitingastaður og mjög falleg klausturkirkja. Klaustrið stendur við ána og hér er upplagt að fá sér hressingu og njóta fegurðar svæðisins við ána.

Byrjum daginn rólega, en eftir morgunverð förum við saman um elsta hluta Regensburg á skemmtilegri göngu, en sá hluti borgarinnar er skráður á heimsminjaskrá UNESCO. Margar glæstar byggingar prýða borgina, þ.á.m. dómkirkjan, ráðhúsið og gamla brúin. Þá er borgin einnig fræg fyrir gömlu íbúðaturna sína. Eftir skoðunarferð verður frjáls tími til að kanna borgina á eigin vegum og upplagt að fá sér steikta pylsu, „Bratwurst“, á veitingastað frá 12. öld sem er þekktur fyrir að vera einn elsti og besti pylsustaður Þýskalands.

Nú er komið að kveðjustund eftir skemmtilega og ævintýralega ferð, við ökum út á flugvöll í München. Brottför þaðan kl. 17:25 og lending í Keflavík kl. 19:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.