Svartfjallaland

Það er ævintýri líkast að ferðast um Svartfјallaland, þessa einstöku perlu við Adríahafið. Þar heillar alla stórbrotin og ólýsanleg náttúrufegurð, merkileg saga þjóðar og litskrúðugt menningarlíf. Ferðin byrjar í Mílanó en þaðan er ekið til hafnarborgarinnar Ancona á Ítalíu og þaðan siglt yfir til sögufrægu borgarinnar Split í Króatíu. Gist í miðaldabænum Budva í Svartfjallalandi og þaðan farnar töfrandi skoðunarferðir, m.a. siglum við yfir í eyjuna María á kletti á Kotor flóa og fræðumst um miðaldir borgarinnar Kotor. Konungsborgin Cetinje er einstaklega hrífandi og í Sipcanik sjáum við stærsta vínkjallara landsins sem var notaður af Nato sem flugvéla- og vopnageymsla. Frá Budva líðum við áfram í ljúfri siglingu með fram fallegustu strönd landsins, Becici Rivera, og siglum hjá Sveti Stefan eyjunni sem er engu lík. Á vatninu Skatar upplifum við eitt af mörgum náttúruundrum landsins og ótrúlega náttúrufegurð. Við förum til Bosníu-Hersegóvínu og gistum í Mostar þar sem finna má sögufrægu brúna Stari Most, sem er á heimsminjaskrá UNESCO. Áður en siglt er til baka frá Split njótum við Diokletian hallarinnar og endum þetta ævintýri með viðkomu í Bolognia og heimferð frá Mílanó á Ítalíu.

Verð á mann 358.800 kr.

Aukagjald fyrir einbýli 94.900 kr.


Innifalið

  • 14 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Sigling frá Ancona til Split með gistingu um borð.
  • Kvöld- og morgunverður á skipinu til Split.
  • Sigling á Skadar vatni og hádegisverður á einkaströnd. 
  • Sigling frá Budva og hádegisverður á einkaströnd.
  • Vínsmökkun í Sipcanik.
  • Sigling frá Split til Ancona með gistingu um borð.
  • Kvöld- og morgunverður á skipi frá Split til Ancona.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Vínsmökkun.
  • Hádegisverðir sem ekki eru taldir upp undir innifalið.
  • Þjórfé.

Valfrjálst

  • Sigling frá Perast að St Maríu kirkjunni á kletti ca € 8.
  • Aðgangur í konungshöllina í Cetinje ca € 10.

Kort af ferðinni

FerðalýsingPrenta ferðalýsingu

9. ágúst | Mílanó & Turate

Brottför frá Keflavík kl. 13:55. Mæting í Leifsstöð í síðasta lagi 2,5 klst. fyrir brottför. Lending í Mílanó kl. 19:40 að staðartíma þar sem gist verður í nágrenni borgarinnar eina nótt.

10. ágúst| Ancona & sigling á Adríahafi

Dagurinn byrjar á góðum morgunverði en síðan verður stefnan tekin á Ancona við Adríahaf, höfuðborgar héraðsins Marche. Sögu hennar má rekja aftur til 5. aldar f. Kr. þegar Grikkir flúðu frá Sýrakúsa og settust hér að. Þeir gáfu borginni nafnið Ancona sem þýðir olnbogi. Um kvöldið verður siglt frá Ancona til Split í Króatíu og bíður kvöldverður okkar um borð. Gist er í skipinu í tveggja manna klefum með sturtu og klósetti. Siglingin frá Ancona tekur um 10 stundir og er einstaklega skemmtileg við bestu kringumstæður.

11. ágúst | Split í Króatíu & Budva í Svartfjallalandi

Við komum fljótlega eftir morgunverð að landi í sögufrægu borginni Split í Króatíu. Hún telst með fallegustu borgum landsins og við skoðum hana betur eftir yndislega daga í Svartfjallalandi. Frá Split verður ekið um Neretva dalinn sem stundum er kölluð Kalifornía Króatíu en í dalnum er mesta appelsínurækt landsins. Það verður örugglega gert myndastopp á þessari fallegu leið. Ferðin heldur áfram til Svartfjallalands, til gamla virkisbæjarins Budva þar sem gist verður í 7 nætur. Hótelið er rétt við ströndina og býður upp á sundlaugargarð með sólbaðsaðstöðu. Herbergin eru með loftkælingu og á hótelinu er líkamsræktaraðstaða og heilsulind. Hótelið er miðsvæðis í bænum, við ströndina og í næsta nágrenni eru verslanir, veitingahús og skemmtistaðir.

Opna allt

12. ágúst | Stutt gönguferð í Budva & slökun

Nú er komið að því að kanna nánar þessa yndislegu bæjarperlu Budva. Við förum í áhugaverða gönguferð um þennan 11.000 manna bæ með sínum litlu, þröngu götum og virkisveggjum. Vísindamenn eru á því að bærinn hafi áður verið eyja sem er nú orðin hluti meginlandsins. Samkvæmt fornum fræðum er Budva einn elsti bærinn við Adríahafið og umhverfið er einstakt. Bærinn fór mjög illa í jarðskjálfta árið 1979 en endurreisn hefur tekist með ágætum. Eftir gönguna verður frjáls tími það sem eftir er dags til að njóta náttúrufegurðar staðarins og þess sem bærinn og hótelið hafa upp á að bjóða.

13. ágúst | Sigling, klettaeyjan & borgin Kotor

Á döfinni er spennandi dagur. Að loknum morgunverði er stefnan tekin á Kotorflóann og ekið til þorpsins Perast þaðan sem farið verður í siglingu yfir á heillandi litla eyju sem kallast María á kletti. Síðan siglum við aftur til Perast og dáumst að landslaginu á leiðinni til Kotor borgar. Elsti hluti Kotor er á heimsminjaskrá UNESCO en borgin er dulúðleg og töfrandi með gömlum virkisveggjum sem við upplifum á rölti um borgina. Eftir það er upplagt að fá sér hádegishressingu og njóta þess að vera á þessum fagra stað.

14. ágúst | Virpazar & sigling á Skadar vatni

Skadar vatn er eitt af náttúruundrum landsins. Þetta stöðuvatn hefur alla tíð verið utan alfaraleiðar en það er á landamærum Svartfjallalands og Albaníu. Hér er hrífandi landslag sem við njótum á siglingu um vatnið frá litla fiskiþorpinu Virpazar. Vatnið er sérstakt m.a. vegna þess að á botni þess eru um 30 uppsprettulindir, sem heimamenn kalla auga. Dýpsta lindin er á 60 m dýpi og úr henni streymir hreint og kristaltært vatn af kalksteinsbotninum. Vatnið er heimasvæði óteljandi dýrategunda, m.a. á þriðja hundrað fuglategunda, og á vatnsyfirborðinu vaxa vatnaliljur. Við einkaströndina Pjesacac er beðið eftir okkur með grillaðan fisk á skemmtilegum veitingastað við vatnið. Að hádegisverði loknum gefst tækifæri til að fá sér gönguferð eða taka sundsprett í vatninu en síðan er siglt til baka til Virpazar þar sem rútan bíður okkar.

15. ágúst | Cetinje & Sipcanik vínsmökkun

Sérhver Svartfellingur myndi segja: „Ef þú hefur ekki komið til Cetinje þá hefur þú ekki komið til Svartfjallalands“ og því verður þessi borg, ein mikilvægasta borg landsins, vandlega skoðuð. Glæsilegar byggingar skreyta hana, þar á meðal klaustrið þar sem biskupar Svartfjallalands réðu ríkjum öldum saman. Vlaška heitir dómkirkjan, ein elsta bygging borgarinnar, og við skoðum að sjálfsögðu hrífandi konungshöllina Nicola. Cetinje var höfuðborg landsins í tæp 400 ár. Eftir góða stund þar verður ekið til höfuðborgarinnar Podgorica, sem eitt sinn var kölluð Titograd, en þar fer öll stjórnsýsla landsins fram. Við skoðum þar stærsta vínkjallara landsins, Sipcanik, sem nær yfir rúma tvo hektara. Þarna var áður aðal herflugvöllur landsins sem meðal annars var notaður af NATO og þá voru vínkjallararnir flugvéla- og vopnageymslur. Það er mikil upplifun að koma hingað en um 11 milljónir plöntur sjá framleiðslunni fyrir vínþrúgum. Okkur verður boðið í mjög glæsilega vínsmökkun.

16. ágúst | Sigling um Becici Rivera & St. Nicola eyjan

Við hefjum daginn á því að ganga stuttan spöl frá hótelinu að höfninni í Budva. Siglum þaðan með þessari einstöku strönd og njótum dásamlegs umhverfis. Förum hjá St. Nicola eyjunni, litla sjávarþorpinu Przno, sjáum drottninga- og kóngaströndina og heillandi hóteleyjuna Sveti Stefan. Við snæðum hádegisverð á afar fallegum stað í landi sem er með einkaströnd og gefst tækifæri þar til að taka sundsprett eða njóta þessar náttúrufegurðar sem leikur um okkur. Eftir það líðum við áfram í draumalandslagi og góðum félagsskap til Budva.

17. ágúst | Frjáls dagur í Budva & slökun

Í dag er frjáls dagur til að njóta náttúrufegurðarinnar sem umleikur okkur. Nú er tími til að slaka á, líta inn til kaupmanna bæjarins, fara á ströndina eða nota þessa frábæru aðstöðu við hótelið.

18. ágúst | Mostar í Bosníu og Hersegóvínu

Við kveðjum Svartfjallaland eftir yndislega daga, ökum inn í Bosníu og Hersegóvínu, til borgarinnar Mostar sem er ein af perlunum í suðurhluta landsins. Þar verður gist í 2 nætur á hóteli í miðbænum. Á hótelinu er innisundlaug, heilsulind og líkamsrækt.

19. ágúst | Dagur í Mostar

Við förum saman í ljúfa göngu um miðbæ Mostar og auðvitað verður komið að frægu, gömlu brúnni Stari Most, sem var byggð af Ottómönum á 17. öld. Hún er yfir Neretva ána sem rennur um borgina. Í Bosníustríðinu árið 1993 var brúnni eytt með gríðalegum spengjuárásum en árið 2005 var hún endurbyggð og er nú á heimsminjaskrá UNESCO sem tákn um friðsamlega sambúð mismunandi þjóðflokka í Mostar. Gamli bærinn er yndislegur og töfrandi blæbrigði matar og mannlífs er að finna frá þessum mismunandi menningarheimum bæjarbúanna.

20. ágúst | Split & Ancona

Í dag förum við loks til sögufrægu borgarinnar Split sem telst með merkustu borgum landsins. Þar má finna Diokletian höllina og enn fremur glæsilegar byggingar og minjar frá tímum Rómverja en elsti hluti borgarinnar hefur verið á heimsminjaskrá UNESCO síðan árið 1979. Borgin er því eins og lifandi safn, sem iðar af mannlífi. Upplagt er að rölta um bæinn áður en haldið verður á ferjustað þar sem skipið bíður okkar um kvöldið. Frá Split verður siglt yfir til Ancona. Gisting með morgun- og kvöldverði um borð í skipinu.

21. ágúst | Ancona & Bolognia

Eftir morgunverð á skipinu komum við til Ancona kl. 7:00. Nú verður stefnan tekin á hina líflegu og sögufrægu borg Bolognia í Norður-Ítalíu, þar sem gist verður í eina nótt. Langa yfirbyggða göngugatan er skemmtileg, fallegar byggingar frá miðöldum og endurreisnartímanum prýða borgina sem og skökku turnarnir sem eru tákn borgarinnar.
Hér verður gefinn tími til að kanna líf bæjarbúa, líta í verslanir borgarinnar og fá sér hressingu áður en ekið verður á hótel.

22. ágúst | Heimferð frá Mílanó

Eftir glæsilega ferð er komið að lokadeginum. Að morgunverði loknum er ekið til heimsborgarinnar Mílanó en þar er margt að sjá og upplifa. Farið verður í stutta göngu með fararstjóra og síðan gefst tími til að fá sér létta hressingu, líta í búðir og skoða sig betur um. Upplagt er að fá sér kvöldverð áður en ekið verður út á flugvöll. Brottför þaðan kl. 20:40 og lent í Keflavík kl. 22:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00