Costa del Azahar & Valencia

Við upplifum ótrúlega skemmtilegt ævintýri í þessari ferð á Costa del Azahar eða Appelsínuströndina á Spáni. Eftir flug til Mílanó og akstur til strandbæjarins Arenzano á ítölsku rivíerunni verða spennandi staðir skoðaðir. Heillandi bærinn Rapallo er við Tugillio flóann og um hann siglum við með fram Portofino skaga til bæjarins Portofino. Siglt verður frá Genúa til Barcelona, höfuðborgar Katalóníu, sem er með fegurstu borgum álfunnar. Pálmum prýdd Costa del Azahar ströndin og Papa Luna höllin, sem rís tignarlega upp á háum kletti, gerir rómantíska miðaldabæinn Peñiscola að fallegasta og sögufrægasta strandbæ Spánar við Miðjarðarhaf. Engan undrar að stórbrotið landslagið, hvert sem litið er, hefur þjónað sem umgjörð í ótal kvikmyndum. Þýðingarmesta vistkerfi vestanverðs Miðjarðarhafs, Ebro Delta, er heillandi heimur, einstök fuglaparadís sem gaman er að nálgast á siglingu. Sögufræga borgin Valencia er dásamleg en tímalaus fegurð hennar heillar enn í dag. Við hverfum aftur til miðalda í Morella en hún tilheyrir takmörkuðum fjölda borga um allan heim sem hefur næstum fullkomlega varðveist sem sögulegt safn. Fegurð náttúrugarðsins Sierra de Espadán magnast í í ævintýralegri siglingu á ánni San José og um neðanjarðarhella hennar en hún er lengsta neðanjarðará í Evrópu. Við kynnumst appelsínurækt í heimsókn til stórbónda og endum svo þessa frábæru ferð í Madríd.

Verð á mann 264.600 kr.

Aukagjald fyrir einbýli 69.900 kr.


Innifalið

  • 13 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður á hótelum.
  • Sigling frá Genúa til Barcelona með gistingu um borð.
  • Morgunverður á skipinu.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Siglingar.
  • Hádegisverðir.
  • Kvöldverður á siglingu til Barcelona.
  • Þjórfé.

Valfrjálst

  • Aðgangur í Páfahöllina ca € 4.
  • Sigling um Ebro Delta ca € 20.
  • Hádegissnarl hjá vínbónda ca € 6.
  • Sigling á San José í bláa hellinum ca € 13.
  • Heimsókn til appelsínubónda ca € 5.

Kort af ferðinni

FerðalýsingPrenta ferðalýsingu

8. júní | Flug til Mílanó & Arenzano

Brottför frá Keflavík kl. 13:55 og mæting í Leifsstöð í síðasta lagi 2,5 klst. fyrir brottför. Lending í Mílanó kl. 19:40 að staðartíma. Þaðan verður ekið rakleiðis til bæjarins Arenzano við ítölsku rivíeruna, þar sem gist verður í þrjár nætur. Á hótelinu er útisundlaug, verönd, líkamsrækt, fallegur garður, sólbekkir, einkaströnd og sundlaugabar.

9. júní | Dagur í Arenzano við ítölsku rivíeruna

Í dag njótum við þess að vera á þessum undurfagra stað og upplagt er að kanna umhverfið, taka sér göngu með ströndinni, skoða sig um í borgargarðinum sem umvefur fallega ráðhúsið Villa Negrotto Cambiaso frá 19. öld. En einnig er hægt að nota þessa frábæru aðstöðu sem að hótelið býður upp á eða fá sér sundsprett í Miðjarðarhafinu. Hér í bæ er mikið af skemmtilegum kaffi- og veitingahúsum og einnig með fram ströndinni.

10. júní | Rapallo & sigling Portofino

Á þessum degi upplifum við fegurð ítölsku rivíerunnar á akstri til Rapallo sem er við Tigullio flóann en þar prýðir bæinn fallegasti hafnarkastali Liguria strandarinnar. En þar byrjum við á því að kanna líf bæjarins sem er litríkur og skemmtilegur. Eftir góðan tíma þar verður farið í töfrandi siglingu með Portofino skaganum sem dregur nafn sitt af bænum fræga Portofino. Við komum til með að njóta hans í allri sinni dýrð og gefst tími til að fá sér hádegishressingu og kanna líf bæjarbúa á þessum fagra stað.

Opna allt

11. júní | Sigling frá Genúa til Barcelona

Eftir morgunverð kveðjum við Arenzano eftir ljúfa daga og verður stefnan tekin á hafnarborgina Genúa þar sem við stígum um borð í skipið sem siglir með okkur til Barcelona. Siglum af stað kl. 12:00 á hádegi en siglingin frá Genúa tekur um 21 klst. Gist verður í tveggja manna klefum með baðherbergi. Hér er um einstaklega skemmtilega siglingu að ræða og góð aðstaða er um borð. Upplagt er að hafa með sér sundföt, prjóna eða góða bók.

12. júní | Heimsborgin Barcelona & Peñiscola við appelsínuströndina

Eftir morgunverð verður komið til heimsborgarinnar Barcelona, höfuðborgar Katalóníu, sem er með fegurstu borgum álfunnar. Hún er þekkt fyrir byggingar arkitektsins Gaudí og glæsilegar byggingar skreyta borgina hvert sem litið er. Af merkum byggingum má nefna kirkjuna La Sagrada Família eftir Gaudí og húsin Casa Batlló, Casa Milà og garðinn Güell en þessi verk eftir Gaudí eru á heimsminjaskrá UNESCO. Ekki verður hægt að skoða alla borgina en við tökum smá skoðunarferð með rútu inn í Barcelona og síðan verður áð við Katalóníu torgið. Hægt verður að rölta inn í gotneska hverfið og fá sér hádegishressingu eða líta inn á kaupmenn borgarinnar. Eftir góðan tíma þar verður stefnan tekin á Costa del Azahar eða Costa dels Tarongers, eins og Katalóníubúar kalla hana, Appelsínuströndina. Við gistum í einum sögulegasta og fallegasta spænska strandbæ Miðjarðarhafsins, Peñiscola. Þar verður gist í átta nætur á góðu hóteli. Öll herbergin eru með svölum og við hótelið er útisundlaug, heitur pottur og sólbekkir. Einnig er líkamsrækt og heilsulind með sánu og tyrkneskt bað á hótelinu.

13. júní | Skoðunarferð í Peñiscola - Páfahöllin & frjáls tími

Við ströndina er ólýsanlega fagurt, röð pálmatrjáa og rómantískur miðaldabæ svífur yfir. Við sjáum fyrrum páfahöllina, Castell Papa Luna, og vita sem stendur í 67 m hæð uppi á háum kletti. Þetta stórbrotna landslag hefur þjónað sem draumaumhverfi í kvikmyndum og má þar nefna m.a. El Cid með Sophiu Loren og Charlton Heston og Game of Thrones. Gamli bærinn er heillandi, ríkur sögu, með litlum kalkhvítum húsum sem lokuð eru af með borgarmúrum og kastala frá miðöldum. Við förum í töfrandi skoðunarferð um bæinn og kastalann og njótum náttúrufegurðar staðarins að fullu. Eftir það verður gefin tími til að njóta bæjarins og aðstöðunnar við hótelið eða taka sér sundsprett í Miðjarðarhafinu.

14. júní | Sigling um Ebro Delta & Amposta bærinn

Töfrandi leið okkar í dag verður með Costa del Azahar eða Appelsínuströndinni sem er ægifögur og að Ebro Delta sem er þýðingarmesta vistkerfi vestanverðs Miðjarðarhafsins. Við hellum okkur inn í heillandi heim svæðisins á siglingu um Ebro Delta að ósum hennar, þar sem eyjarnar Buda og Sant Antoni liggja en þarna eru víðáttumiklar sléttur. Hádegishressingu tökum við í bænum Amposta og svo gefst frjáls tími til að kíkja á mannlífið. Síðan verður ekið til baka um Ebro Delta svæðið þar sem við upplifum fuglaparadísina og sjáum e.t.v. hópa af flamingóum og breiður hrísgrjónaakra en óviðjafnalega fegurð ber við sjón á þessari leið og um bæinn Sant Carles de la Ràpita á leið til Peñiscola.

15. júní | Dagur í sögufrægu borginni Valencia

Þessum dásamlega degi ætlum við að eyða í sögufrægu borginni Valencia en tímalaus fegurð hennar heillar enn í dag. Á göngu okkar um elsta hluta borgarinnar komumst við í tæri við meira en 2000 ára sögu hennar, þ.á.m. gotnesku bygginguna La Lonja, fyrrum skiptimarkað með silki, sem er nú komin á heimsminjaskrá UNESCO. Rétt eins áhrifamikil er dómkirkjan sem byggð er á rústum mosku. Í meira en þúsund ár er hinn einstaki vatnadómstóll, sem ráðstafar vatnsréttindum sem er haldinn vikulega fyrir framan postulagáttina. Við reikum um þröngar götur borgarinnar og töfrar hennar hrífa alla með sér. Auðvitað verður gefinn frjáls tími til að fá sér hressingu og upplifa borgina á eigin vegum. Endum daginn í lista-, menningar- og vísindahverfinu, með nútíma byggingum og skúlptúrum, sem er orðin einn vinsælasti ferðamannastaður borgarinnar og einn af 12 fjársjóðum landsins.

16. júní | Borgin Morella & skemmtilegar heimsóknir hjá bændum

Þessi frábæra dagsferð leiðir okkur aftur til miðalda um Maestrazgo svæðið, með ólífu- og möndlutrjám en einnig sjáum við á akra með Jóhannesarbrauði, trjám sem tilheyra sögunni. Við heimsækjum Morella en þessi miðaldabær tilheyrir takmörkuðum fjölda borga um allan heim sem hefur nær fullkomlega varðveist sem sögulegt safn. Er hann eitt besta dæmi um uppbyggingu miðaldabæja, umkringdur miklum borgarmúr með turnum og hliðum en Morelli er einnig á heimsminjaskrá UNESCO. Eftir það verður ekið í skemmtilega heimsókn til bónda í bænum San Jordi og verður þar boðið upp á smakk á eigin framleiðslu, m.a. pylsur, ost, hunang, skinku og vín. En einnig framleiðir hann sjálfur eikarámur fyrir vínframleiðslu sína. Héðan fara allir sælir og saddir heim en á leiðinni verður stoppað hjá appelsínubónda.

17. júní | Þjóðhátíðardagur & sigling um bláa hellinn San José

Þjóðgarðurinn Sierra del Espadán tekur á móti okkur í dag og nú verður ekið til La Vall d´Uixó. Ævintýrin gerast enn og nú verður farið á bátum í gegnum neðanjarðarhella þar sem lengsta neðanjarðará í Evrópu, San José, rennur um, ótrúlegt náttúrufyrirbæri. Við líðum áfram á kristaltæru bláu ánni, um leðurblökusalinn og um sal djöflavatns eins og þeir kalla það en þar verðum við fyrir myndrænum áhrifum og nú verðum við að leyfa ímyndunaraflinu að ráða för en ólýsanleg fegurð blasir við á þessari siglingu.

18. júní | Rólegheit & slökun í Peñiscola

Nú er komið að því að slaka á eftir annasama daga á þessum fagra stað. Hægt er að nota aðstöðuna á hótelinu eða ganga með pálmaströndinni inn í Peñiscola og kanna þennan fallega bæ betur og líta inn á kaupmenn bæjarins. Og ekki gleyma því, að auðvitað er nauðsynlegt að fá sér sundsprett í Miðjarðarhafinu seinnipart dags.

19. júní | Frjáls dagur & „hop on hop off“ með smálest

Góður dagur í rólegheitum og við njótum samverunnar á þessum fagra stað. Flatmögum við sundlaugina og þeir sem vilja, geta tekið litla smálest, „hop on hop off“, um svæðið sem er alltaf skemmtilegt. Boðið er upp á fjórar leiðir, tvær um nágrennið, útsýnisferð og ferð um Peñiscola. Bátsferðir eru einnig í boði frá litlu bátahöfnini um Peñiscola.

20. júní | Madríd & heimflug

Nú er komið að því að kveðja þennan draumfagra stað eftir glæsilega ferð með Appelsínuströndinni og um Valencia héraðið. Undir hádegi verður lagt af stað til Madríd, höfuðborgar Spánar, sem situr á miðjum Íberíuskaganum í 667 m hæð yfir sjávarmáli. Seinnipart dags komum við inn í miðborg Madríd þar sem gefin verður tími til að upplifa borgina og njóta spænskra veitinga á spennandi kaffihúsum, börum eða veitingahúsum og upplagt er að fá sér kvöldhressingu áður en ekið verður út á flugvöll í Madríd. Brottför þaðan kl. 23:25 og lent í Keflavík kl. 01.40 að staðartíma aðfaranótt 21. júní.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00