Costa del Azahar & Valencia
24. maí - 5. júní 2024 (13 dagar)
Ævintýraleg ferð til Costa del Azahar á Spáni eða hinnar svokölluðu Appelsínustrandar. Ferðin hefst í hinni fögru Rómarborg og þar skoðum við Forum Romanum, Colosseum, Pantheon, Vatíkanið og Péturskirkjuna. Siglt verður síðan frá Civitaveccia til Barcelona, höfuðborgar Katalóníu, og stefnan tekin á Costa del Azahar ströndina sem er pálmum prýdd. Castell Papa Luna kastalinn stendur tignarlega uppi á háum kletti í hinum söguríka bæ Peñíscola sem verður okkar aðaldvalarstaður. Þessi rómantíski miðaldabær, sem er á lista yfir fallegustu bæi Spánar, er sögulegt verndarsvæði en stórbrotið landslagið hefur þjónað sem umgjörð í ótal kvikmyndum. Við hverfum aftur til miðalda í Morella en hún tilheyrir takmörkuðum fjölda borga um allan heim sem hafa varðveist nánast fullkomlega sem sögulegt útisafn. Við kynnumst einnig ólífurækt í heimsókn til stórbónda og skoðum áhugaverða safnið Valltorta þar sem við fræðumst um hellamálverk og förum í stutta hellaskoðun. Einnig sækjum við heim yndislega miðaldabæinn San Mateo. Sögufræga borgin Valencia er dásamleg og tímalaus fegurð hennar heillar. Þjóðgarðurinn Sierra de Espadán tekur á móti okkur og farið verður í ævintýralegri siglingu á ánni San José og um neðanjarðarhella hennar en hún er lengsta neðanjarðará í Evrópu. Einnig verður komið til Vilafamés sem talinn er með fallegustu smábæjum Spánar.