Hjólað um hlíðar Prosecco á Ítalíu
1. - 8. september 2024 (8 dagar)
Prosecco hæðirnar og nágrenni bjóða upp á dásamlega hjólaupplifun í fallegu landslagi vínekra og heillandi bæja. Farið verður í spennandi dagsferðir um sögufræga staði og mögnuð landbúnaðarhéruð. Við dveljum í töfrandi bænum Bassano del Grappa þar sem fornar byggingar endurreisnartímabilsins gefa bænum heillandi yfirbragð. Eitt merkilegasta héraðið á þessum slóðum er Prosecco, eitt stærsta vínekruhéraðið í þessum hluta Ítalíu, og þar munum við að sjálfsögðu bragða á afurðum svæðisins. Við heimsækjum þorpið Asolo sem er hjartað í magnaðri náttúruumgjörð og hjólum fram hjá lundum kirsuberjatrjáa á leiðinni til Breganze sem er þekkt fyrir frábær vín. Hjólum einnig Ezzelini hjólastíginn með fram Muson ánni og að bænum Castelfranco Veneto þar sem gaman er að skoða meistaraverk fræga endurreisnarmálarans Giorgione í dómkirkju bæjarins. Í ferðinni er einn skipulagður frídagur og þá er til dæmis hægt að fara til Feneyja en þangað er aðeins einnar klukkustundar lestarferð. Þessi Ítalíuferð er einstök hjólaupplifun sem mun skilja eftir sig góðar minningar.