Kvennaferð - Sorrento & Caprí

13. - 20. september 2023 (8 dagar)

Glæsileg ferð til Sorrento, Amalfístrandarinnar og eyjunnar Caprí en þetta eru sannkallaðar draumaperlur Ítalíu. Ferðin byrjar með flugi til Rómar en þá bíður okkar hinn dásamlegi Napólíflói og Sorrento, eftirsóttasti ferðamannabær hans, þar sem við njótum ljúfra daga. Sorrento er hrífandi bær með þröngum, gömlum götum, fögrum kirkjum og glæstum byggingum og í bröttum hlíðunum vaxa ólífu-, appelsínu- og sítrónutré. Boðið verður upp á ævintýralega siglingu til sæbrattrar klettaeyjunnar Caprí þar sem siglt verður í Bláa hellinn og farið með stólalyftu upp á hæsta fjall eyjunnar, Monte Solaro. Það er hrífandi að koma til Pompei þar sem finna má eina af frægustu fornminjum veraldar og á leiðinni þaðan verður komið við hjá vínbónda við rætur eldfjallsins Vesúvíus, þar sem boðið verður upp á hádegishressingu. Við bæði siglum og ökum með Amalfíströndinni, sem er ein fallegasta strönd Ítalíu, og komum við í bæjunum Amalfí og Positano. Einnig ætlum við að eiga yndislegan tíma í slökun, vera saman í skemmtilegum félagsskap og njóta náttúrudýrðar Sorrento við Napólíflóa, eins fallegasta flóa landsins.

Verð á mann 338.800 kr.

Aukagjald fyrir einbýli 88.600 kr.


Innifalið

  • 8 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður allan tímann á hóteli.
  • Allar skoðunarferðir með rútu samkvæmt ferðalýsingu.
  • Sigling til og frá Caprí og litlir strætisvagnar um Caprí.
  • Sigling og ferð með smárútum meðfram Amalfíströndinni.
  • Hádegissnarl hjá vínbónda.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Hádegisverðir.
  • Þjórfé.
  • Ferða- og forfallatryggingar.

Valfrjálst

  • Aðgangur að fornminjum í Pompei u.þ.b. € 19.
  • Blái hellirinn u.þ.b. € 30. 
  • Stólalyfta upp á Monte Solaro fjallið á Caprí u.þ.b. € 13.

Kort af ferðinni

FerðalýsingPrenta ferðalýsingu

13. september | Flug til Rómar & Sorrento

Brottför frá Keflavík kl. 8:30 og mæting í Leifsstöð u.þ.b. 2,5 klst. fyrir brottför. Lending í Róm kl. 15:00 að staðartíma. Þaðan er ekin falleg leið til Sorrento við Napólíflóa, eins fallegasta flóa landsins. Sorrento er hrífandi bær í bröttum hlíðum en þar vaxa ólífu-, appelsínu- og sítrónutré og þess má geta að Limoncello líkjörinn frægi kemur frá þessu svæði. Á þessum dásamlega stað verður gist í sjö nætur á góðu hóteli en þaðan er glæsilegt útsýni yfir á Vesúvíus eldfjallið.

14. september | Skoðunarferð í Sorrento við Napólíflóa & frjáls tími

Við ætlum að eiga skemmtilegan dag í Sorrento, einum eftirsóttasta ferðamannabænum á Sorrento skaganum. Eftir góðan morgunverð býður fararstjórinn upp á rölt um bæinn og eftir það er upplagt að kanna dásamlegt umhverfið í Sorrento á eigin vegum. Í bænum er fjöldinn allur af einstaklega heillandi, þröngum, gömlum götum, fögrum kirkjum, glæstum byggingum og ekki síður iðandi mannlífi.

15. september | Fornminjar í Pompei & snarl hjá vínbónda

Í dag er stefnan tekin til Pompei þar sem skoðaðar verða einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleikann um söguna. Eftir það verður komið við hjá vínbónda við rætur eldfjallsins Vesúvíus, þar sem boðið verður upp á hádegishressingu

Opna allt

16. september | Sigling til Caprí

Glæsileg dagsferð yfir til Caprí, perlu Napólíflóans. Við skoðum fallegu eyjuna, siglum að Bláa hellinum, Grotta Azzurra, og förum upp til Caprí og Anacapri þar sem við njótum stórfenglegs útsýnis. Áhugasömum gefst tækifæri til að fara með stólalyftu upp á fjallið Monte Solaro. Jafnframt verður hægt að fá sér hressingu og skoða alls kyns handunnar vefnaðarvörur eins og kniplinga, dúka og fatnað.

17. september | Rólegheit & slökun í Sorrento

Þennan dag gefst heill dagur til þess að slaka á og njóta þess að vera á þessum yndislega stað. Sorrento er líflegur og skemmtilegur bær, þar er margt að skoða og tilvalið að kíkja í verslanir og á kaffi- og veitingahús. Einnig er hægt að slaka á við sundlaug hótelsins eða ganga með strandlengjunni.

18. september | Sigling & rúta með Amalfíströndinni

Haldið verður í töfrandi dagsferð um Amalfíströndina þar sem fegurðin er svo sannarlega einstök. Við hefjum daginn á ferð með smárútum með fram ströndinni og hvarvetna gefur að líta dásamlegt landslag á þessari fallegu leið til bæjarins Amalfí, þar sem við stoppum og skoðum okkur um. Á rölti um bæinn sjáum við fallega dómkirkju frá 10. öld, lífleg veitinga- og kaffihús og litlar verslanir sem gaman er að kíkja inn í. Því næst verður farið í hrífandi siglingu með Amalfíströndinni til Sorrento en þaðan gefur að líta ægifagurt útsýni yfir fallegustu strandlengju Ítalíu og sjáum við litskrúðug hús, hótel og smábæi sem hanga utan í klettabrúninni. Á þessari ljúfu siglingu verður áð í Positano, einum þekktasta og vinsælasta ferðamannabæ Amalfístrandarinnar, áður en siglt verður til Sorrento. Við mælum eindregið með því að gestir gæði sér á grilluðum sjávarréttum í hádeginu en þeir eru einn helsti sérréttur svæðisins.

19. september | Dagur í Sorrento

Dagurinn er tilvalinn til afslöppunar. Skemmtilegt er að upplifa bæinn og hinar gróðursælu ólífu-, appelsínu-, og sítrónuhæðir fyrir ofan hann með því að taka litlu lestina. Einnig er tilvalið að kíkja í verslanir og á kaffi- og veitingahús. Eftir hádegi er upplagt að nota aðstöðuna við hótelið eða fara niður að gömlu bátahöfninni en þar er úrval góðra veitingastaða. Svo er líka hægt að fara á fallegu baðströndina og taka sundsprett.

20. september | Heimflug frá Róm

Nú er komið að heimferð eftir yndislega daga og slökun. Eftir morgunverð verður ekið til Rómar. Á leiðinni verður stoppað til að fá sér hádegishressingu áður en ekið verður út á flugvöll. Brottför þaðan kl. 16:00. Áætluð lending í Keflavík kl. 18:45

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-14:00