Vordagar við Gardavatn

Dagurinn verður rólegur en að loknum morgunverði förum við fótgangandi í stutta skoðunarferð um bæinn Riva del Garda. Að henni lokinni er frjáls tími til að skoða sig um í þessum snotra bæ, ganga litlar og þröngar götur hans, staldra við í verslunum, rölta undir pálmatrjám með fram ströndinni eða upp að virkinu Bastillione, þaðan sem er einstakt útsýni yfir vatnið. Einnig er kjörið að njóta aðstöðunnar á hótelinu, annaðhvort í garðinum við sundlaugina eða í heilsulindinni. Upplagt væri að fá sér létta hádegishressingu saman á Hótel Central sem er á aðaltorgi bæjarins. Kvöldverður á eigin vegum.

Fyrir höndum er yndislegur og stórskemmtilegur dagur. Við leggjum snemma af stað og ökum til Feneyja. Við byrjum á ljúfri siglingu inn í borgina frá bílastæðinu. Auður og íburður blasir hvarvetna við í borginni og á vegi okkar verða stórfenglegar sögulegar byggingar eins og hertogahöllin sem er ein glæsilegasta bygging borgarinnar. Við skoðum líka Markúsartorgið þar sem Markúsarkirkjan stendur. Hún er ein merkilegasta kirkjubygging veraldar, byggð í austrænum stíl og minnir á höllina úr ævintýrinu 1001 nótt. Við komum að hinni frægu Rialto brú sem liggur yfir Canal Grande skurðinn en hann mun vera 3,8 km langur og 900 m breiður og við hann standa hvorki fleiri né færri en 200 hallir. Síðdegis mun hverjum og einum gefast tími til þess að skoða þessa fallegu borg betur, njóta mannlífsins og jafnvel líta inn á söfn. Við endum daginn með trompi með því að sigla til baka með leigubátum um Canal Grande skurðinn og upplifum allar glæsilegustu hallir borgarinnar. Komið verður aftur á hótel undir kvöld. Sameiginlegur kvöldverður á hóteli.

Yndislegur dagur sem byrjar á að ekið verður suður með Gardavatni í gegnum fjölmarga litla bæi til Garda sem er litríkur og skemmtilegur bær. Þar gefst tími til að fá sér hressingu og skoða sig um í fallegu umhverfinu en einnig eru skemmtilegar litlar verslanir sem gaman er að kíkja í. Eftir það verður ekið upp í hæðir Monte Baldo fjallsins til Spiazzi. Þaðan förum við í stutta og rólega göngu að Pílagrímskirkjunni, Madonna della Corona, sem er byggð í 774 m hæð og er ekki hægt að segja annað en að mikil dulúð hvílir yfir þessum helga stað. Eitt af sérkennum kirkjunnar er staðsetning hennar og arkitektúr og ekki síst það að hún var að hluta til byggð beint inn í klettinn. Stórkostlegt og magnað útsýni er yfir Adige ána og dalinn. Kvöldverður á eigin vegum.

Dagur í rólegheitum í Riva del Garda þessu töfrandi bæ, upplagt er að nota aðstöðuna við hótelið. Skoða sig betur um í bænum eða taka sér göngu með ströndinni eða bara njóta þess að vera á þessum yndislega staða þar sem náttúrufegurðin umleikur okkur. Kvöldverður á eigin vegum.

Nú verður ekið til Veróna, elstu borgar Norður-Ítalíu, og er þetta einn hápunktur ferðarinnar. Veróna er borg menningar og lista en frægust er hún sem sögusvið leikrits Shakespeare um Rómeó og Júlíu. Farið verður í skoðunarferð um borgina og staldrað við helstu staði þessarar merku borgar. Þar má nefna þriðja stærsta hringleikahús veraldar, Arena, og Kryddtorgið en þar stendur fjöldi fagurra bygginga og minnisvarða. Allur miðbær borgarinnar eins og hann leggur sig er skráður á heimsminjaskrá UNESCO og ekki að ástæðulausu. Eftir skoðunarferðina um borgina verður gefin frjáls tími til að fá sér hressingu og kanna líf bæjarbúa. Sameiginlegur kvöldverður á hóteli.

Farið verður í ljúfa siglingu á Gardavatni. Haldið til Limone, eins fallegasta bæjarins við vatnið og þar áð í dágóða stund. Þaðan verður siglt yfir sægrænt Gardavatnið yfir til Malcesine sem er sögufrægur ferðamannabær við austurströnd vatnsins. Í Malcesine gefum við okkur góðan tíma, fáum okkur hressingu og skoðum okkur um í bænum. Áhugasamir geta farið með kláf upp á Monte Baldo, hæsta fjallið við Gardavatn, en aðrir geta litið inn í mjög áhugaverðan gamlan kastala sem er að finna í bænum. Siglt til baka til Riva del Garda. Kvöldverður á eigin vegum.

Dagur í slökun og rólegheitum. Upplagt að nota aðstöðuna við hótelið eða skoða sig betur um í þessum töfrandi bæ. Einnig er hægt að fara í skemmtilega göngu með ströndinni til næsta bæjar, Torbole, sem er enn einn hrífandi bærinn við vatnið. Þeir hressustu geta gengið upp í Santa Barbara kapelluna sem er í 625 m hæð yfir bænum. Sameiginlegur kvöldverður á hóteli.

Eftir glæsilega og skemmtilega ferð verður ekið út á Malpensa flugvöll í Mílanó. Brottför þaðan kl. 15:30 og lending í Keflavík kl. 17:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.